Pajlug 26:23-28
Nqe cim:
“Tus neeg uas ncauj zoo tiamsis siab phem, mas zoo ib yam li lub hub uas muab vuam kom ci xwb.” (Pajlug 26:23)
Lus nug xav:
– Tej lus hais tsis tseeb tau muab piv rau yam dabtsi?
– Lub siab ntxub ntxaug, ua tsis tseeb thaum kawg yuav zoo li cas?
– Peb cheem tsum ua dabtsi kom peb tej lus hais tseeb, muaj kev hlub thiab txhawb tau lwm tus?
Tsis yog txhua yam ci ntsia iab puavleej yog tseem nyiaj tseem kub. Ntau zaus kev zoo nkauj sab nraud npog kev phem rau sab hauv. Vajntxwv Xalumoos ceebtoom txog cov neeg uas siv tej lus zoo qab zib cia los npog nws lub siab xav phem. Vajntxwv Xalumoos nthuav tawm txoj kev ntshai ntawm txoj kev dag thiab nujnqi ntawm txoj kev dag.
Tim 1, tej lus zoo qab zib tej zaum yuav npog tau lub siab phem (nqe 23-25). Tej lus tsis tseeb tau muab piv rau lub hub uas muab nyiaj vuam rau, ci ntsia iab tiamsis tsis muaj nqis. “Tus neeg uas ncauj zoo tiamsis siab phem, mas zoo ib yam li lub hub uas muab vuam kom ci xwb” (nqe 23). Ib yam li ntawd, muaj ib txhia neeg hais tej lus qab zib zoo mloog kawg, tiamsis sab hauv puv nkaus kev ntxub ntxaug thiab ua neeg qias dub. Tus Tswv ceebtoom tsis tsimnyog cia sab nraud dag tau peb. “Txawm yog nws hais lus zoo los tsis txhob ntseeg, rau qhov hauv nws lub siab puv nkaus kev ntxub ntxaug” (nqe 25”. Peb yuav tsum meej pem kom saib pom yam uas zais rau sab hauv tagnrho hauv lwm tus thiab hauv yus. Peb tej lus hais yuav tsum qhia tawm lub siab tseeb tabmeeg Vajtswv.
Tim 2, lub siab ntxub ntxaug tau muab zais cia lawd tiamsis thaum kawg yuav raug muab nthuav tawm (nqe 26). Luag yuav zais tau lub siab ntxub ntxaug los ntawm kev ua ntsejmuag luag ntxhi, tiamsis tsuas yog ib lub nyaug sijhawm xwb “Txawm yog nws zais qhov uas nws ntxub luag los sawvdaws yeej paub tej kev phem uas nws ua” (nqe 26). Nov yog tej lus ntuas txog ntawm Vajtswv txoj kev ncajncees. Nws tsis cia tej lus hais tsis tseeb nyob mus ib txhis. Txhua yam uas muab zais cia lawd yuav raug muab nthuav tawm nyob rau tiam no lossis tabmeeg ntawm Vajtswv hnub Nws txiav txim.
Thaum kawg, txoj kev dag yuav ua tsis zoo rau lwm tus thiab yuav rhuav yus kiag (nqe 27-28). “Tus neeg uas khawb qhov cuab luag kev, yog nws rov cuab nws xwb. Leejtwg cuab yej, yej yuav rov tais nws tes” (nqe 27). Txoj kev dag tsis yog ua rau lwm tus mob xwb tiamsis tseem coj kev puastsuaj los raug kiag rau tus uas hais lus tsis tseeb thiab. Tej lus qab zib thiab qhuas luag tshaj qhov tseeb yuav ua rau yus zoo siab ib nyuag pliag, tiamsis thaum kawg tej ntawd yuav coj txoj kev puastsuaj los.
Hauv lub ntiajteb uas tibneeg pheej nyiam qhuas txoj kev zoo nkauj sab nraud heev dua tus cwjpwm zoo sab hauv, Vajtswv Txojlus nqua hu kom peb ua neej los ntawm kev ncajncees thiab qhov tseeb, tsis yog rau lwm tus xwb tiamsis kiag rau yus lub siab thiab. Cia li hais qhov tseeb, txawm yuav poob yam ub yam no tamsim no los xij tiamsis Vajtswv txaus siab, Nws yuav foom koob hmoov rau tus uas ua neej raws qhov tseeb.
Thov Vajtswv,
Vajtswv, thov Koj tshuaj xyuas nyuam yaus lub siab, yog qhov tsis tseeb, tsis zoo thov muab tshem tawm mus. Thiab thov pab nyuam yaus kuj zeem paub txog lwm tus tej lus qab zib sab nraud, kom ceevfaj txhob cia mag lawv lub vojhlua ntawm txoj kev puastsuaj. Thov pab nyuam yaus ua neej qhia tawm qhov kaj thiab qhov tseeb ntawm Koj rau lwm tus. Nyuam yaus tuav Tswv Yexus Khetos lub npe thov, Amees.
Peb puas hais lus tseeb, muaj kev hlub thiab txhawb lwm tus hauv txhua yam uas peb ua?
Nyeem Vajlus kub hauv peb lub xyoos: Daniyees 1
Kênh Youtube BHKTHN:
