Klei Aê Diê Blŭ: Klei Bi Hriêng 26:23-28
Êlan kliăng: “Msĕ si čeh lăn siam êbhơr ti tač, msĕ snăn mơh klei blŭ siam mơ̆ng ai tiê jhat” (Klei Bi Hriêng 26:23)
Klei êmuh ksiêm mĭn: Klei blŭ luar mâo bi msĕ hŏng ya klei? Ai tiê bi roh, mplư luar knhal tuč si srăng jing? Ya klei brei drei ngă čiăng kơ klei blŭ jing sĭt nik bŏ hŏng klei khăp leh anăn đru bi mđĭ ai?
Amâo djŏ knŏng jih jang mnơ̆ng ƀlêč ƀlir jing mah doh ôh. Tăp năng klei bi msiam ti êngao lŏ mdăp hĕ klei jhat ƀai hlăm lam. Mtao Salômôn hưn brei răng kơ phung yua klei blŭ mmih čiăng mdăp klei mĭn jhat. Ñu lač kơ klei huĭ hyưt mơ̆ng klei mgưt leh anăn boh jhat srăng truh kơ klei blŭ luar.
Tal sa, klei blŭ mmih mdăp sa ai tiê jhat ƀai (êlan 23-25). Klei blŭ luar bi msĕ čeh lăn luôm ti êngao hŏng êa kông, mngač siam ƀiădah amâo mâo ênoh yuôm ôh. “Msĕ si čeh lăn siam êbhơr ti tač, msĕ snăn mơh klei blŭ siam mơ̆ng ai tiê jhat” (êlan 23). Ăt msĕ snăn mơh, mâo mnuih blŭ klei mmih, jăk knga hmư̆, ƀiădah hlăm lam bŏ hŏng klei bi êmut kheh amâodah klei mĭn jhat ƀai. Khua Yang hưn brei răng đăm drei tŭ ôh klei mplư bi êdah ti êngao,“Tơdah ñu blŭ hŏng klei mmih, đăm đăo kơ ñu ôh, kyuadah mâo kjuh mta klei arăng bi êmut kheh hlăm ai tiê ñu” (êlan 25). Hrô kơ anăn, brei drei mdih čiăng ƀuh klei mdăp hlăm lam, wăt hlăm pô mkăn leh anăn hlăm drei pô. Klei blŭ drei brei bi êdah ai tiê kpă ênô ti anăp Khua Yang.
Tal dua, ai tiê bi roh mdăp ƀiădah knhal tuč srăng êdah (êlan 26). Arăng dưi mdăp klei bi êmut hŏng klei bi êdah ti êngao jing jăk, ƀiădah knŏng hlăm sa wưng bhiâo đuč. “Wăt tơdah ñu mdăp klei bi êmut hŏng klei mplư, klei jhat ƀai ñu srăng êdah hlăm phung bi kƀĭn” (êlan 26). Anei jing klei mñă kơ klei kpă ênô Aê Diê. Ñu amâo brei klei mgưt dôk lă lar ôh. Djăp klei mdăp leh anăn srăng êdah, amâodah hlăm ênuk anei, amâodah ti anăp Khua Yang hlăm hruê phat kđi.
Knhal tuč, klei mplư luar srăng ngă jhat kơ pô mkăn leh anăn bi rai phung luar (êlan 27-28). “Hlei pô klei ƀăng srăng lĕ hlăm ƀăng anăn, leh anăn boh tâo srăng lŏ wĭt djŏ kơ pô bi klŭng gơ̆” (êlan 27). Klei mplư luar amâo djŏ knŏng bi êka pô mkăn ôh, ƀiădah lŏ atăt pô blŭ luar kơ klei djiê. Klei blŭ mmih leh anăn mgao srăng ba klei mơak bhiâo kơ pô ƀiădah knhal tuč ñu srăng atăt kơ klei dlưh rai.
Hlăm sa lăn ala khăng bi mđĭ klei jăk siam ti êngao hĭn kơ knuih hlăm lam, Klei Aê Diê Blŭ iêô mthưr drei hdĭp hŏng klei kpă ênô leh anăn klei sĭt nik, amâo djŏ knŏng hŏng pô mkăn ôh ƀiădah wăt hŏng ai tiê pô. Brei blŭ nanao klei sĭt nik wăt tơdah luč liê ti lăn ala anei ƀiădah Khua Yang srăng mơak, Ñu srăng brei klei hơêč hmưi kơ phung hdĭp hlue si klei sĭt nik.
Drei blŭ klei sĭt nik, bŏ hŏng klei khăp leh anăn bi mđĭ ai hlăm djăp boh klei mơ̆?
Wah lač: Ơ Khua Yang, akâo kơ Ih ksiêm dlăng ai tiê kâo. Akâo kơ Ih lăm lui klei mplư luar leh anăn mplư hlăm ai tiê kâo. Akâo kơ Ih mtrang čiăng kâo ƀuh klei mplư luar hlăm klei hdĭp, leh anăn răng kriê kâo mơ̆ng klei mplư klei blŭ mmih ƀiădah bŏ hŏng mnêč. Akâo kơ klei blŭ leh anăn klei hdĭp kâo lač kơ klei mngač leh anăn klei sĭt nik Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Đaniêl 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
