Mathais 24:9-11
Nqe cim:
“Kuv qhia tej no rau nej kom nej cov uas txuas rau ntawm kuv muaj kev kaj siab. Neeg ntiajteb yuav tsimtxom nej. Tiamsis nej yuav tsum ua siab tawv, rau qhov kuv twb kovyeej lub ntiajteb no lawm!” (Yauhas 16:33)
Lus nug xav:
– Tswv Yexus qhia hnub kawg cov ntseeg Nws yuav ntsib yam dabtsi?
– Tswv Yexus txhawb cov nrog Nws mus li cas?
– Peb cheem tsum ua dabtsi kom sawv ruaj hauv txoj kev ntseeg thaum “tej cua daj cua dub tshuab tuaj”?
Tswv Yexus rov qab qhia rau cov thwjtim paub hais tias hauv lub sijhawm hnub kawg lawv yuav ntsib ntau yam kev txomnyem thiab kev tsimtxom. Qhov no tus Tswv twb ceebtoom dua lawd “Neeg ntiajteb yuav tsimtxom nej” (Yauhas 16:33), tiamsis kev txomnyem hnub kawg yuav muaj ntau thiab huam loj heev. Txoj kev tawmtsam cov ntseeg Tswv Yexus tsis yog ntawm txoj kev xav lossis tej lus hais xwb tiamsis yuav ua los ntawm tej haujlwm ua “ntes” thiab “tua pov tseg” ntawd tsis yog qee tus uas tsis nyiam Txojmoo Zoo xwb tiamsis “txhua haivneeg” puavleej muaj tib tus cwjpwm “ntxub” cov ntseeg Tswv Yexus.
Tswv Yexus qhia cov thwjtim thiab cov ntseeg Nws pom tus duab txog tej kev txomnyem hnub kawg thiab tej kev tsimtxom uas loj heev lawv yuav ntsib thaum lub sijhawm kawg. Hauv tej kev txomnyem ntawd, cov uas tsuas ntseeg raws kevcai ntseeg yuav yoojyim tso kev ntseeg tseg, nov yog tus Tswv txoj kev lim tawm. Ntau tus ntseeg yuav mus mloog tej lus haub ntxias qab zib ntawm cov xibhwb cuav thiab tso kev ntseeg Tswv Yexus tseg, lawv tsis yog tuam mom yus txoj kev ntseeg xwb tiamsis tseem sawv tuaj ib tog tsimtxom cov ntseeg Tswv Yexus. Tswv Yexus siv lo lus “coob leej” qhia rau peb paub hais tias yuav muaj neeg coob heev ntxeev siab tso kev ntseeg tseg tshwm tuaj, thiab yuav ua rau coob tus sawv tsis ruaj yus kev ntseeg, vim pom yus cov kwvtij ntseeg yav dhau los nim no lawv tawmtsam thiab tsim txom cov ntseeg.
Tshab plaws hauv keebkwm kev ntseeg, cov ntseeg yeej pheej ntsib kev tawmtsam lossis kev tsim txom ntawd yog txoj kev cheem tsum uas yuav tsum tau lim kom Pawg ntseeg huv. Vajtswv Pawg ntseeg niaj hnub nim no yuav tsum tsim dheev thiab npaj siab los twb taubhau rau txoj kev tawmtsam thiab kev ntxeev siab ntawm lub sijhawm kawg. Vajtswv yeej pom zoo cia muaj tej kev txomnyem, kev tsim txom, tsis tas li ntawd xwb tseem yuav tsum tau tuag rau kev ntseeg thiab vim nrog Tswv Yexus mus. Yuav tsum sawv ruaj kev ntseeg thaum pom coob leej tso kev ntseeg tseg, dhau los ua yeeb ncuab rau Tswv Yexus, tsim txom cov ntseeg. Peb yuav tsum txhawb kev ntseeg ruaj khov kho rau ntawm Tswv Yexus kiag hnub no, kom thiaj yuav twb tauhau taus rau tej kev tsim txom thiab kev ntxeev siab loj heev tsis deb rau yav tom ntej no, tiamsis “Thaum los nag xob nag cua, dej nyab thiab cua ntsawj lub tsev ntawd. Lub tsev ntawd tsis vau, rau qhov nws ua rau saum pobzeb” (Mathais 7:25).
Thov Vajtswv,
Vajtswv, thov tuav nyuam yaus rau hauv Koj ob txhais tes. Thov pab nyuam yaus cog ruaj kev ntseeg rau ntawm Koj, txawm yuav muaj kev tsim txom thiab kev ntxeev siab loj npaum li cas los xij kom nyuam yaus nyob ze Koj txhua lub sijhawm. Nyuam yaus tuav Tswv Yexus Khetos lub npe thov, Amees.
Thaum ntsib kev tsim txom, ntxeev siab peb puas thim rov qab thiab tso kev ntseeg tseg?
Nyeem Vajluskub hauv peb lub xyoos: Kalatias 5
Kênh Youtube BHKTHN:
