Blŭng a 6:1-10
“ Sư ‘bôh bơ̆n đei tơdrong yoch tih na Sư ‘mêm kơ bơ̆n rai dêh” ( Rôm 5: 20b)
Nơ̆r jet tơchĕng pơwao:
– Yua kơ kiơ Kră Yang ‘Bok Kei-Dei sơ’ngonpăng wă phak lăm teh đak?
– Tơdrong ‘bok Nô ê đei pŭn hiôk ‘bơ̆t anăp Kră Yangwă tơ’bôh tơdrong kiơ?
– Lu bơ̆n đei tơ’blŏk athei pơm kiơ kơplah oeilăm teh đak yoch âu?
Sơ̆p Hla ar Nơ̆r ‘Bok Kei-Dei đei chih kơ plah kon bơngai rai chek lar rai lơ lăm teh đak na “lu kon tơdăm ‘Bok Kei-Dei” ‘bôh kon hơdruh kon bơngai ‘lơ̆ng hơiă na iŏk pơm akăn. Gah tơdrong wă bơtho “lu kon tơdăm ‘Bok Kei-Dei” noh jơ̆ lu đe bu mă đei pơjah pơjăng kơbăt dôm jơhnơr hăm ‘bar tơdrong pơma. Blŭng a đei tơchĕng na pơma khan lu sư ‘noh linh jang ‘lơ̆ng pơ̆k huŏng. Mă khan Kră Yang Yêsu đei tơblang lăm Mathiơ 22:30 khan linh jang ‘lơ̆ng ưh kơ đei chă klo kăn, mă-lei tơdrong âu ưh kơ đei khan linh jang pơ̆k huŏng ưh kơ đei, pơrơ̆ng pơm glăi tơdrongjuăt Kră Yang ‘Bok Kei-Dei. Lu sư đei iŏk rup lu bơngai drŏ nglo na năm hăm lu bơngai drŏ kăn. Kiơ̆ kơ tơdrong mă ‘bar đei tơblang “kon tơdăm ‘Bok Kei-Dei” ‘noh jơ̆ adrĕch adrŭng hli yom ‘ noh jơ̆‘bok Sêt; Mă khan oei đei tơdrong pơjah mă lei tơdrong kăl tơm lăm Sơ̆p Hla bơar ‘Bok Kei-Dei âu chih roi lơ tơdrong yoch ,lăm teh đak, druh kiơ̆ tơdrong ‘maih wă kiơ̆ kơdih, ưh kơ ‘maih pơm kiơ̆ tơdrong juăt Kră Yang. Tơdrong yoch ưh kơ sĭ pơm tơ’bôh hăm tơdrong đei pơm kơnê̆ gah ‘nguaih mă loi sư dôm tơdrong tơchĕng lăm jơhngơ̆m. Kră Yang ‘bôh đĭ păng Sư sơ’ngon lăm jơhngơ̆m tơdrong âu pơm kơ Kră Yang pơrăm đĭ dêh char ( trong 7).
Kơplah đei tơdrong tôch đon ei, Sơ̆p Hla bơar ‘Bok Kei-Dei đei tơ’bôh minh pôm rup ưh kơ lei lăi: “Mă-lei Nôê đei pŭn ‘bơ̆t anăp Kră Yang” (trong 8). Arih lăm teh đak yoch kơnê̆ mă lei ‘bok Nôê oei jing “minh ‘nu bơngai ‘lơ̆ng tơpăt,năm hơdai hăm Kră Yang ‘Bok Kei-Dei” (trong 9). Sư jơ̆ minh ‘nu bơngai mơn đêl minh ‘nu bơngai Kră Yang mơnat ăn đĕch păng chăl arih sư Kră Yang lăp đon . Tơdrong âu thoi pơih trong năm tơ anăp ưh kơ sĭ ăn kơ minh ‘nu sư đĕch mă noh ăn kơ đĭ-đăng dêh char – ‘bok Nôê Kră Yang rơih iŏk wă pơkeh tơdrong dŏng pơklaih kon bơngai.
Teh đak âu mă lu bơ̆n oei arih ‘bĕnh hăm tơdrong yoch păng tơdrong kơnê̆ rai đunh tơdrong yoch rai dêh. Jơhngơ̆m kon bơngai rai kret tơsen, tơchĕng dôm tơdrong kơnê̆ ‘mê̆ ‘mach. Kon bơngai ‘maih chă đon tơplih tơdrong juăt hmă mă đơ̆ng Kră Yang ăn wă kơ chơt hiôk kiơ̆ kơdih lăp đon. Tơpă Kră Yang ‘Bok Kei-Dei Tơ’ngla băt tôm tơdrong Sư sơ’ngon dêh yua kơ tơdrong yoch kon bơngai dang ei. Mă khan lei ră, bơnê kơ Kră Yang ‘Bok Kei-Dei ưh kơ layơ achăng pră kon bơngai “‘Bok Kei-Dei pơkă kơ bơ̆n tơdrong juăt Sư sơ̆, Sư wă tơbăt kơ bơ̆n đei tơdrong yoch tih ; Sư ‘bôh bơ̆n đei tơdrong yoch tih na Sư ‘mêm kơ bơ̆n rai dêh” (Rôm 5:20 ). Nhen thoi ‘bok Nôê đei tơdrong pŭn ‘bơ̆t anăp Kră Yang ‘Bok Kei-Dei, na Sư kư̆m pơm tơ’bôh tơdrong ‘mêm mơnat kơ lu đe bu mă gơnang kơ pham kăp Kră Yang Yêsu. Apinh Kră Yang tơgŭm lu bơ̆n wă kơ huay kơ arih kiơ̆ kơ teh đak, mă-lei yua nơ̆r pơma păng tơdrong arih bơ̆n wă kơ tơgŭm kơ lu bơngai ala teh băt kơ tơdrong ‘mêm mơnat rơkah rơkai đơ̆ng Kră Yang wă kơ lơ bơngai gơh klaih.
Ơ Kră Yang inh bơnê kơ Ih yua kơ kơplah inh lôch hiong lăm tơdrong yoch. Na Kon Ih jur lăm teh đak, chu lôch tơ ‘long pơglang, pơih trong dŏng pơklaih ăn kơ lu đe bu mă kơdâu tơkan năm tơ Ih. Apinh Ih tơgŭm inh pơ̆n nuih năm ră roi tơdrong chơt hiôk âu wă kơ rai đunh rai đei lơ bơngai gơh klaih păng mơn đei tơdrong mơnat Ih tơ ala teh âu. Yua anăn Kră Yang Yêsu Krist Amen
Lu bơ̆n hăm arih pha ra kơ lu bơngai lăm teh đak âu ‘bĕnh kơ tơdrong yoch wă kơ gơh pơm kơdranh tơdrong Kră Yang ưh?
Đŏk Sơ̆p Hla bơar ‘Bok Kei-Dei lăm pêng sơnăm: Hơriso 87-88
Kênh Youtube BHKTHN:
