Mathais 5:6-8
Nqe cim:
“Cov uas xav ua raws li Vajtswv lub siab nyiam, cov ntawd tau koob hmoov; Vajtswv yuav muab rau lawv kom txaus nkaus li lawv lub siab xav. Cov uas muaj lub siab hlub lwm tus, cov ntawd tau koob hmoov; Vajtswv yuav hlub lawv!” (Mathais 5:6-7)
Lus nug xav:
– Tswv Yexus qhia li cas txog tus neeg nyiam ua ncaj ncees thiab hlub tshua?
– Tus neeg dawbhuv yuav tau dabtsi?
– Peb tabtom ua neej ncaj ncees, dawbhuv thiab hlub zoo li cas?
Peb qhov koob hmoov thawj nyob hauv zaj lus Tswv Yexus qhia saum roob yog peb qhov yamntxwv qhia paub tus neeg nyob hauv Vajtswv lub Tebchaws. Tim ib, tshaib nqhis txojkev ncaj ncees. “Cov uas tshaib thiab nqhis rau txojkev ncaj ncees, cov ntawd muaj kev zoo siab, rau qhov Vajtswv yuav pub rau lawv tsau npo” (nqe 6 – Phau Txhais 2022). Tswv Yexus qhia tias ncaj ncees yog yam uas Vajtswv cov menyuam yuav tsum nqhis zoo ib yam li zaub mov txhua hnub. Ncaj ncees tsis yog ua raws li kevcai tiamsis yog ua neej nyob hauv txojkev sib raug zoo yog nrog Vajtswv thiab lwm tus. Qhov kev tshaib nqhis no pib ntawm txojkev hlub tus Tswv, xav qhia tawm Vajtswv txojkev dawbhuv, thiab xav pom Vajtswv txojkev ncaj ncees tswj kav nyob hauv ntiajteb no. Ntawm no, muaj ib lo lus cogtseg zoo heev, leejtwg tshaib nqhis txojkev ncaj ncees yuav tsis poob siab. Vajtswv yuav pub kom txaus qhov kev nqhis ntawd dhau los ntawm Yexus Khetos, Nws yog txojkev ncaj ncees rau peb; thiab Vaj Ntsujplig yog tus uas pub lub zog rau peb ua neeg dawbhuv. Yog li ntawd, thaum tshaib nqhis txojkev ncaj ncees ces Vajtswv yuav pub rau peb sab ntsujplig tsau npo thiab ua neej kaj siab.
Tim ob, qhia tawm lub siab hlub. “Cov uas muaj lub siab hlub lwm tus, cov ntawd tau koob hmoov; Vajtswv yuav hlub lawv!” (nqe 7). Hlub lwm tus yog muaj lub siab txhawj txog, zam txim thiab ua siab ntev rau cov neeg uas tsis tsimnyog. Tus Tswv txojkev ncaj ncees qhia tawm los ntawm kev hlub thiab hmov tshua neeg ntiajteb. Thaum qhia tawm lub siab hlub, yog peb qhia tshwm tus Tswv txojkev zam txim rau peb txaus nkaus uas peb tau hauv Yexus Khetos. Thiab muaj lus cogtseg tias, leejtwg muaj lub siab hlub lwm tus yuav muaj kev zoo siab hauv tus Tswv.
Tim peb, sab ntsujplig dawbhuv. “Cov uas muaj lub siab dawbhuv, cov ntawd muaj kev zoo siab, rau qhov lawv yuav pom Vajtswv” (nqe 8 – Phau txhais 2022). Lub siab dawbhuv yog qhov kev fij tus kheej tagnrho rau tus Tswv: hlub tus Tswv heev tshaj txhua yam thiab tso taus txhua yam vim tus Tswv. “Pom Vajtswv” ces yog koob hmoov zoo kawg nkaus: Nyob ze Vajtswv kiag tamsim no thiab muaj kev cia siab ib hnub yuav pom Nws tim ntsej tim muag mus ibtxhis. Peb yuav ua tsis tau kom peb muaj lub siab dawbhuv, tiamsis nov yog Vaj Ntsujplig tes haujlwm, thaum peb tshaib nqhis thiab txaus siab hlo cia tus Tswv lub hwjchim ntxuav thiaj tau.
Peb qhov koob hmoov no qhia paub Vajtswv txojkev ncaj ncees thiab kev hlub. Tshaib nqhis txojkev ncaj ncees ua rau peb ua tau neeg dawbhuv. Qhia tawm lub siab hlub tshua ua tabpov tias txojkev ncaj ncees nyob hauv peb lub siab. Rau siab ntso tuav txojkev dawbhuv, tswj txojkev hlub Vajtswv kom tsis txhob tu. Nov yog lub neej uas tus Tswv hais tias “tau koob hmoov”, yog lub neej qhia tawm Vajtswv tus yamntxwv thiab qhia tias muaj Vajtswv.
Thov Vajtswv,
Vajtswv, thov pab nyuam yaus paub meej txojkev zoo siab thaum ua neej qhia tawm txojkev ncaj ncees, sib hlub uas Vajtswv pub thiab tswj rawv lub neej dawbhuv. Nyuam yaus tuav Tswv Yexus lub npe thov, Amees.
Peb tau txais cov koob hmoov twg lawm?
Nyeem Vajluskub hauv peb lub xyoo: Exekees 45
Kênh Youtube BHKTHN:
