Klei Aê Diê Blŭ: Klei Mmuñ Hđăp 5:1-12
Êlan kliăng: “Ơ Yêhôwa, êjai aguah Ih hmư̆ asăp kâo; êjai aguah kâo srăng wah lač kơ Ih leh anăn dôk kăp guôn.” (Klei Mmuñ Hđăp 5:3)
Klei êmuh ksiêm mĭn: Ya Mtao Đawit ngă leh hlăm klei bi tuôm aguah ưm ñu hŏng Aê Diê? Ya klei drei hriăm mơ̆ng knuih leh anăn klei ñu wah lač? Ya klei mñă kơ drei brei bi mlih hlăm klei pô wah lač?
Hlăm boh klei knap mñai snăk kyua phung roh ngă, Mtao Đawit êlâo hĭn tui duah Yêhôwa grăp aguah ưm. Ñu wah lač hŏng Aê Diê jing Mtao ñu (êlan 1-2). Ñu thâo Khua Yang jing Pô kpă ênô leh anăn bi êmut kơ klei jhat; Ñu bi êmut kơ jih jang phung ngă klei wê, bi rai hĕ phung luar; bi êmut kheh kơ mnuih tuh êrah leh anăn ngă klei mplư (êlan 4-6). Ñu bŏ hŏng klei pap; răng mgang, brei klei mơak leh anăn klei jăk kơ phung huĭ mpŭ kơ Ñu (êlan 11-12).
Mtao Đawit mŭt hlăm Sang Kkuh Mpŭ leh anăn buôn kkuh ti anăp Sang yang Ñu, ñu kwưh akâo kơ Aê Diê mđing hmư̆ klei ñu kwưh akâo leh anăn ksiêm dlăng klei mĭn ñu. Ñu hưn kơ boh klei, ai tiê leh anăn dôk guôn klei Aê Diê atăt êlan. Anei jing sa klei bi blŭ hrăm dua nah plah wah Aê Diê leh anăn ñu hlăm sa ai êwa jĕ giăm leh anăn đăo knang kluôm dhuôm. Ñu mphŭn hưn kơ boh klei pô kơ phung roh, jing phung amâo sĭt suôr, mâo ai tiê jhat, ƀăng êgei blŭ klei rai luč leh anăn hiu luar. Ñu akâo kơ Aê Diê bi kmhal digơ̆ kyua digơ̆ bi kdơ̆ng hŏng Aê Diê leh anăn ngă klei ƀai. Ñu akâo kơ Aê Diê mkra êlan kơ ñu amâo êbuh ôh kyua klei phung jhat mplư. Mtao Đawit đăo sĭt Aê Diê jing Pô kpă ênô dôk kiă kriê, Ñu srăng ngă klei kpă ênô. Kyua anăn, ñu bŏ hŏng čang hmăng dôk guôn klei Aê Diê bi mtlaih leh anăn tŭ mă klei hơ̆k mơak, klei jăk mơak Aê Diê brei (êlan 7, 11-12).
Mtao Đawit jing pô huĭ mpŭ leh anăn hlue ngă klei Aê Diê čiăng. Ñu amâo đăo knang ôh kơ klei thâo mĭn leh anăn ai ktang ñu pô ƀiădah knang kluôm dhuôm kơ Aê Diê, dôk guôn klei Aê Diê wĭt lač leh anăn ktrâo atăt čiăng bi tuôm hŏng phung roh. Ñu brei Aê Diê phat kđi leh anăn rŭ ênua msĕ si Klei Aê Diê Blŭ mtô hlăm Klei Mtô Mñă Klei Bhiăn 32:35: “Kâo yơh srăng rŭ ênua, leh anăn bi kmhal, pioh kơ hruê jơ̆ng diñu srăng ksak; kyuadah hruê knap mñai diñu giăm leh, leh anăn klei phat kđi diñu truh djăl”
Akâo Khua Yang brei drei ƀuh klei wah lač aguah ưm jing yuôm bhăn snăk hlăm sa hruê mrâo. Tơdah ka dưi ngă, akâo kơ phung drei kčưm mtam mơ̆ng hruê anei. Pioh mnĭt mmông kriêp ñăt leh myơr jih klei kwưh akâo pô srăng đru drei ƀuh klei jĕ giăm hŏng Khua Yang, mâo klei bi juh, klei mñă kơ klei Ñu čiăng, leh anăn pral hĭn hŏng klei Yang Mngăt Jăk ktrâo atăt hlăm klei dôk dơ̆ng ƀơ̆ng huă hŏng pô mkăn, mbĭt anăn ăt mâo klei Khua Yang ktrâo atăt hlăm bruă drei čiăng ngă.
Drei hlue ngă mơ̆ klei bi tuôm aguah ưm grăp hruê hŏng Khua Yang?
Wah lač: Ơ Khua Yang kpă ênô, jing Ama khăp hơiêng kâo. Aguah kâo tui duah Ih čiăng bi mni, kkuh mpŭ leh anăn blŭ hrăm hŏng Ih. Krah lăn ala lu phung hiu mplư leh anăn măk ƀai, akâo kơ Ama răng mgang kâo mơ̆ng klei jhat, mñă kâo thâo dôk guôn Ih. Akâo kơ klei blŭ, bruă ngă leh anăn klei mĭn kâo hruê anei bi mơak kơ Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsêkiêl 28
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
