Ntawv Nkauj 5:1-12
Nqe cim:
“Koj yeej hnov kuv lub suab thov thaum sawv ntxov;thaum lub hnub tawm tuaj kuv thov koj thiab tos rawv koj teb kuv” (Ntawv Nkauj 5:3)
Lus nug xav:
– Vajntxwv Daviv ua dab tsi hauv kev sib ntsib Vajtswv thaum sawv ntxuv?
– Peb kawm tau dabtsi ntawm vajntxwv Daviv tus cwjpwm thiab kev thov Vajtswv?
– Vajtswv Txojlus ntuas peb yuav tsum hloov yam dabtsi hauv kev thov Vajtswv?
Hauv lub tsamthawj puv npo tej kev txhawj uas yeebncuab ua tuaj, Vajntxwv Daviv tseg lub sijhawm xubthawj txhua tagkis thaum sawv ntxuv mus sib ntsib Vajtswv. Nws thov Vajtswv tus uas yog nws tus Vajtxwv (nqe 1-2). Nws zeem paub Vajtswv yog tus ncajncees thiab khib heev; Vajtswv, ntxub cov neeg tua neeg thiab ua tsis tseeb (nqe 4-6). Tiamsis Vajtswv puv npo kev hlub, tiv thaiv, pub kev zoo siab thiab foom koob hmoov rau tus uas hwm Nws (nqe 11-12).
Vajntxwv Daviv mus hauv tus Tswv Lub Tsev thiab pehawm tus Tswv hauv Lub Tuamtsev, nws thov Vajtswv mloog Nws tej lus thovVajtswv tshuaj xyuas nws txoj kev xav. Nws qhia tawm nws lub tsamthawj, kev nyuaj siab thiab tos Vajtswv taw qhia txoj haukev rau nws. Nov yog txoj kev sib tham ob sab tuaj ntawm Vajtswv thiab vajntxwv Daviv hauv txoj kev sib raug zoo thiab sib ntseeg siab tagnrho. Nws pib piav nws zaj uas txog cov yeebncuab, lawv yog cov uas tsis ncajncees, muaj lub siab ua tsis tseeb, lub ncauj hais tej rhuav tshem, hais twm lwm tus. Nws thov Vajtswv rau txim rau lawv, vim lawv tawmtsam Vajtswv thiab ua tej haujlwm phem. Nws thov Vajtswv tshem yeebncuab tej vojhlua cuab tos kev mus kom nws ntog rau yeebncuab txoj kev. Vajntxwv Daviv ntseeg hais tias Vajtswv yog tus uas ncajncees thiab tabtom tswj rawv, Nws yuav ua raws li kev ncajncees. Vim li ntawd Daviv puv npo kev cia siab nyob tos Vajtswv kev pab cawm, txais kev zoo siab thiab tej koob hmoov uas Vajtswv pub (nqe 7, 11-12).
Vajntxwv Daviv yog tus neeg uas hwm Vajtswv thiab ua raws li Vajtswv lub siab nyiam. Vajntxwv Daviv tsis vamkhom nws kev txawj ntse thiab lub dag zog tiamsis tso siab plhuav rau Vajtswv, thaum ntsib yeebncuab tos Vajtswv teb thiab cia Nws coj kev. Daviv cia Vajtswv txiav txim thiab ua pauj rau Yeebncuab raws li Nws txojlus qhia hauv 2 Kevcai 32:35: “Tus TSWV yuav pauj thiab rau txim rau lawv; hnub uas lawv raug kev puastsuaj twb los yuav txog, lub sijhawm ntawd twb los ze lawm”.
Thov Vajtswv pab kom peb pom tes haujlwm thov Vajtswv thaum sawv ntxov muaj nqis heev rau hnub tshiab. Yog peb tsis tau ua, cia li ua kiag hnub no. Cia lub sijhawm nyob ntsiagto, tom qab uas yuav qhia txhua yam rau Vajtswv, yuav pab peb pom peb nyob ze Vajtswv, tau txais kev txhawb zog, ntuas peb txog Vajtswv siab nyiam, paub tseeb dua kev coj ntawm Vaj Ntsujplig xav kom peb coj li cas rau lwm tus, tsis tas li ntawd peb kuj txais tau Vajtswv kev coj kev qhia hauv tes haujlwm uas cheem tsum ua.
Thov Vajtwv,
Vajtswv tus ncajncees thiab muaj kev hlub. Thov pab nyuam yaus nco ntsoov qhuas Koj pehawm Koj taij thov Koj txhua tagkis sawv ntxov, kom kovyeej lub ntiajteb uas muaj puv npo tej kev phem, kev sim siab, kev dag ntxias. Thov Vaj Ntsujplig niaj hnub coj nyuam yaus kev ntawm tej kev xav, kev hais, haujlwm ua kom txhua yam haum Vajtswv Koj siab. Nyuam yaus tuav Tswv Yexus Khetos lub npe thov, Amees.
Peb puas teem sijhawm sib ntsib Vajtswv thaum sawv ntxov hauv txhua hnub?
Nyeem Vajluskub hauv peb lub xyoos: Exekees 28
Kênh Youtube BHKTHN:
