Klei Aê Diê Blŭ: I Y-Pêtrôs 4:7-9
Êlan kliăng: “Klei knhal tuč kơ jih jang mnơ̆ng giăm truh leh. Kyuanăn brei diih jing djŏ hnơ̆ng leh anăn thâo răng kơ klei wah lač. Êgao hĭn kơ jih jang, brei diih bi khăp hdơ̆ng diih nanao” (I Y-Pêtrôs 4:7-8a)
Klei êmuh ksiêm mĭn: Ya klei phung đăo kơ Krist srăng ngă êjai dôk guôn hruê Ñu lŏ hriê? Ya ngă? Si klei siam klei dôk dơ̆ng ƀơ̆ng huă phung dôk guôn Khua Yang hriê bi êdah? Ya klei drei mprăp kăp guôn hruê Khua Yang lŏ hriê?
Khua ƀĭng kna Y-Pêtrôs mtă brei răng, “klei knhal tuč kơ jih jang mnơ̆ng giăm truh leh” (êlan 7). Khua Yang Yêsu dơ̆ng lŏ hriê jing klei mñă brei phung đăo dôk răng kăp guôn Ñu lŏ hriê. Phung đăo bi êdah kơ klei guôn Khua Yang lŏ hriê hŏng klei hdĭp đĭ hriê kơ prŏng nanao hlăm klei khăp kơ Aê Diê leh anăn khăp kơ pô mkăn msĕ si klei Khua Yang Yêsu mtă leh (Y-Markôs 12:30-31). Kyuadah hlăm hruê knhal tuč, drei srăng hưn jih klei drei ngă leh êjai drei dôk hdĭp hlăm asei mlei anei: “Kyuadah jih jang drei srăng dôk ti anăp jhưng phat kđi Yang Krist, čiăng kơ grăp čô dưi mă tŭ tui si ñu ngă leh klei jăk amâodah klei jhat êjai ñu dôk hdĭp hlăm asei mlei anei.” (II Kôrantô 5:10).
Khua ƀĭng kna Y-Pêtrôs mtă, brei klei khăp kơ Aê Diê leh anăn klei khăp kơ pô mkăn bi êdah msĕ si klei siam kbiă mơ̆ng ai tiê. Tal sa, kơ Aê Diê, brei drei “jing djŏ hnơ̆ng leh anăn thâo răng kơ klei wah lač” (êlan 7). Wah lač amâo djŏ bruă ngă tui si klei bhiăn klei đăo ôh, ƀiădah wah lač jing klei bi êwa myang, jing klei bi mguôp hŏng Aê Diê hŏng klei mĭn êngeh leh anăn dôk răng. Anei jing klei čiăng amâo mâo dưi kƀah ôh kơ grăp čô phung đăo kơ Krist êjai dôk guôn Khua Yang lŏ hriê. Tal dua, kơ jih jang mnuih “brei diih bi khăp hdơ̆ng diih nanao, kyuadah klei khăp guôm lu klei soh” (êlan 8). Knŏng hŏng klei khăp Aê Diê dôk hlăm drei yơh drei dưi pap brei lu blư̆ klei soh sa čô mnuih, msĕ si klei Khua Yang Yêsu lač leh (Y-Mathiơ 18:21-22). Ênưih snăk drei lač drei “khăp”, ƀiădah klei khăp hlăm Khua Yang brei drei bi êdah hŏng bruă ngă klă msĕ snei: “Bi jum bĕ hdơ̆ng diih amâo blŭ dŭñ dŭñ ôh” (êlan 9). Hŏng klei mơak, ngă jăk bĕ kơ phung ayŏng amai adei dôk guôn Khua Yang lŏ hriê mbĭt hŏng drei, kyuadah drei srăng lŏ bi tuôm mbĭt hlăm Ƀuôn Ala Mtao Aê Diê hruê Khua Yang Yêsu lŏ hriê.
Êjai dôk ti lăn ala anei, klei hdĭp phung đăo kơ Krist ăt mâo lu klei uêñ hnĭng kơ klei hdĭp pô leh anăn kơ gŏ sang pô…Ƀiădah klei hdĭp êjai bhiâo anei srăng êgao, klei hdĭp mrâo Khua Yang brei hruê Ñu lŏ hriê jing klei hdĭp hlŏng lar. Akâo Khua Yang brei kơ drei klei thâo mĭn leh anăn thâo dôk răng čiăng thâo ya klei drei srăng ngă leh anăn ya mnơ̆ng drei srăng mprăp kơ drei pô leh anăn kơ gŏ sang drei êjai dôk guôn Khua Yang lŏ hriê. Brei drei dôk răng wah lač, bi êdah klei khăp sĭt kơ jih jang mnuih hŏng klei ngă jăk, leh anăn hŏng klei hơ̆k mơak bi jum hdơ̆ng drei hlăm klei khăp Khua Yang. Anei mơh jing hdră jăk pioh hưn Klei Mrâo Mrang Jăk kơ klei bi mtlaih kơ phung riêng gah drei (Y-Yôhan 13:34-35).
Si drei dôk hdĭp čiăng bi êdah kơ klei drei dôk răng kăp guôn Khua Yang lŏ hriê?
Wah lač: Ơ Khua Yang khăp ơi, đru kâo hdơr nanao kơ Khua Yang Yêsu dơ̆ng lŏ hriê čiăng kơ kâo dôk răng leh anăn wah lač, hdĭp hŏng klei thâo khăp, thâo pap, leh anăn hưn Klei Mrâo Mrang Jăk kơ jih jang mnuih. Brei klei hdĭp kâo đru lu mnuih thâo kral Ih leh anăn đăo kơ Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Êskiêl 18
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
