I Petus 4:3-6
Nqe cim:
“Tiamsis lawv cov ntawd nyias yuav tsum qhia nyias lub neej rau Vajtswv, Vajtswv twb npaj txhij lawm, nws yuav txiav txim rau cov neeg ciaj thiab cov neeg tuag” (I Petus 4:5)
Lus nug xav:
– Vim li cas cov neeg tsis ntseeg xav tsis thoob thiab thuam cov ntseeg Vajtswv?
– Yam dabtsi txhawb tus ntseeg kom ruaj kev ntseeg thaum raug thuam?
– Qhov uas qhia rau tus Tswv ua rau peb paub yam dabtsi?
Hauv I Petus 4:1-2, Timthawj Petus qhia tias, Yexus Khetos twb raug kev txomnyem vim peb tej kev txhaum, yog li, peb tsis txhob ua neej raws li peb nyiam tiamsis txiav txim siab ua raws li Vajtswv siab nyiam. Cia kom paub meej, Petus rov piav txog tus neeg uas tsis tau los ntseeg Yexus lub neej: “Yav tas los nej niaj hnub ua li cov uas tsis ntseeg Vajtswv ua. Nej nyiam ua phem ua qias, quav cawv, noj tsau haus qaug, qw ua nqj ua nqug thiab pe dab pe mlom” (nqe 3). Tiamsis lub neej ntawd twb hloov los ua zoo tom qab uas txais yuav Tswv Yexus. Txhais tau tias tso lub neej qub ua raws siab nyiam, ua txhaum, qaug dej qaug caw, tsis tswj siab, ua si lomzem. Yog li tus neeg uas tsis ntseeg tus Tswv yuav xav tsis thoob thaum pom cov ntseeg tsis mus koom nrog lawv noj haus lomzem, ua phem ua qias, tso kev pemlom, yog li lawv thiaj thuam thiab hais tsis zoo rau cov ntseeg xwb (nqe 4).
Yam uas txhawb Vajtswv cov menyuam lub zog kom muab siab rau ntseeg thaum raug thuam yog tagrnho txhua tus neeg puavleej yuav sawv ntawm Yexus Khetos xub ntiag qhia txhua yam. Nws yog tus uas muaj hwjchim txiav txim rau cov neeg ciaj thiab cov neeg tuag (nqe 5). Yog li, cov ntseeg uas ncaj ncees tsis tas yuav ntshai, vim Tswv Yexus yog tus txiav txim ncaj ncees, “Vajtswv yog tus uas ncaj ncees, nws yuav rau txim rau cov neeg uas tsimtxom nej” (II Thexalaunikes 1:6). Dua li ntawd, qhov uas qhia txhua yam uas yus ua thaum tseem ua neej nyob yog qhov ceebtoom rau cov neeg uas tabtom ua neej nrug deb Vajtswv, tsau rawv rau tej kev txhaum. “Nej yuav tsum ceevfaj thiab zov tos, niaj hnub thov Vajtswv pab kom nej nyiaj taus txhua yam uas yuav muaj los no, thiab nej thiaj yuav mus sawv taus ntawm Neeg Leej Tub lub xubntiag” (Lukas 21:36).
Timthawj Petus cov lus hais no qhia rau peb sawvdaws paub tias Tswv Yexus tiv kev txomnyem vim peb, yog li ntawd cia li ua neej pub rau tus Tswv. Txhua lo lus hais, tej haujlwm ua yuav tsum haum tus Tswv siab. Cia kom peb mus sawv taus ntawm tus Tswv ncaj ncees qhia tej haujlwm peb ua, ces hnub no peb yuav tau ua tib zoo saib peb lub neej. Yog peb tabtom “nyiam ua phem ua qias, quav cawv, noj tsau haus qaug, qw ua nqaj ua nqug thiab pe dab pe mlom” (nqe 3), ces yuav tau lees kev txhaum, thov Vajtswv zam txim. Dua li ntawd, yog peb tabtom raug thuam, tawmtsam vim tus Tswv lub npe, peb ua ncaj ncees rau Nws, ces yuav ua taus siab tawv taug txojkev dawbhuv. Yeem tiv txomnyem thiab tuag vim tus Tswv hauv lub ntiajteb yog ib ntus no, kom tau mus nyob ibtxhis kaj siab nrog Vajtswv (nqe 6).
Thov Vajtswv,
Vajtswv, thov Koj pab nyuam yaus zeem paub txojkev qaug zog, kev txhaum kom paub lees txim thiab tig los cuag tus Tswv. Thov Leej Txiv ua kom nyuam yaus sab ntsujplig tshiab, ncaj ncees thiaj ua taus siab tawv mus sawv ntawm Vajtswv xubntiag hnub uas Nws rov los. Nyuam yaus tuav Tswv Yexus lub npe thov, Amees.
Peb cheemtsum hloov yam dabtsi kom ua taus siab tawv qhia rau tus Tswv tej uas yus ua hnub tus Tswv los?
Nyeem Vajluskub hauv peb lub xyoos: Exekees 17
Kênh Youtube BHKTHN:
