I Kôrintô 4:1-5
“Gah inh mă iĕm jô̆ kơ inh bơngai thoi yơ kư̆m bưh mơ̆n; mă dah đe wă sek tơdrong inh thoi yơ, inh huay kơ klai ôh; inh kơdih rai loi, ưh kơ băt tơchĕng tơdrong kơdih thoi yơ.” (I Kôrintô 4:3)
Nơ̆r jet tơchĕng pơwao:
– ‘Bok Pôl tơbăt hơđăl tơdrong jang sư kơdih păng lu buăl jang hơdai sư thoi yơ?
– Sư lăng git dêh kơ tơdrong ayơ mă đe lăng khan?
– Lăm tơdrong jang păng tơdrong bơ̆jang tơdrong mă đe nai lăng khan kơ bơ̆n gĭt kăl thoi yơ hăm bơ̆n?
Minh ‘măng dơ̆ng ‘bok Pôl tơbăt tơdrong jang sư, tơdrong jang Apôlê, ‘bok Pêtrôs jơ̆ “đĭch đam Yêsu Krist” (trong 1). Bơngai bơ̆jang kơ Kră Yang kăl kơ tơ’blŏk kơdih akâu gah tơdrong jang bơ̆n kơdih wă kơ lăng ‘bôh tơdrong trŏ gah akâu jăn kơdih, gah bơngai nai păng gah Kră Yang, yua kơ jơhngơ̆m đĭch đam ưh kơ sĭ ‘noh jơhngơ̆m bơngai mă tơ gar iŏk tơdrong ‘lơ̆ng rŏ dah tơdrong jang ăn kơdih ôh. Bơngai đĭch đam ling lang tơchĕng wă pơm ‘lơ̆ng trŏ tơdrong jang yŏng Tơ’ngla pơjao, ưh kơ pơtŏ pơting, ưh kơ chă tơdrong kiơ wă ‘bônh, tơproh dah mă đei bơnê.
‘Bok Pôl tơbăt dơ̆ng tơdrong jang lu bơngai jang tơdrong jang Kră Yang thoi sư noh “bơngai pơgơ̆r” dah “bơngai wei lăng” dôm tơdrong hlĭch hrơp Kră Yang ‘Bok Kei-Dei (trong 1). Bơngai wei lăng, dah bơngai kai pơgơ̆r jơ̆ bơngai đĭch đam tơnăp hlôh wao đơ̆ng yŏng tơ’ngla mălei bơ̆n ưh kơ đei kiơ. Bơngai pơgơ̆r athei ling lang tơchĕng wă kơ pơm trŏ, ‘lơ̆ng hiơ̆k tơm tơdrong jang kơdih noh “tơpăt kiơ̆” yŏng tơ’ngla sư (trong 2). Ưh kơ sĭ hăm lu đam nai dah mă hăm bu lăm hnam dơnŏ. Đơ̆ng noh bơih, na đei nơ̆r jet hăm trŏ. ‘Bok Pôl đei ‘bơ̆r đon gơh hơgei thoi Apôlê dah mă ‘bok Pêtrôs ưh? Na đĭ đăng kơ bơ̆n hăm tơnăp hăm tơdrong jang Kră Yang pơjao kơ bơ̆n ưh? Lăm âu lăp pơđăm trong, ‘bok Pôl yua nơ̆r “sek pơma” dah “sek tơlang” wă khan “lăng khan”, truh tơ pơđăm ‘măng tơ’bôh jơhngơ̆m “tơnăp” noh hiơ̆k dah lăng gĭt tơdrong đe nai lăng khan: Đơ̆ng yŏng tơ’ngla, đơ̆ng đĭch đam nai dah mă đơ̆ng tơ’ngla bơngai wei lăng?
Pha ‘biơ̆ hăm lơ bơngai lăm bơ̆n, mă khan ‘bok Pôl bơngai mă pơjing Khul Bơngai Lui Kôritntô păng hiơ̆k tơgŭm dêh kơ tơdrong lui Khul Bơngai Lui, mălei sư tơbăt hơđăl, tơdrong lu bơngai lăm Khul Bơngai Lui Kôrintô lăng gah sư thoi yơ, sư hloh dah lŭch kơ ‘bok Apôlê dah ‘bok Pêtrôs, “iem jô̆ kơ inh bơngai thoi yơ kư̆m bưh mơ̆n”, wă khan ưh kơ đei gĭt kiơ hăm sư ôh (trong 3) blŭng a lăm jơhnơr 21 ‘nâu, teh đak oei arih druh kiơ̆ kon bơngai pơhlŭ lăng akâu jăn kơdih kơjung hloh. Hăm ‘bok Pôl “ưh kơ băt tơchĕng tơdrong kơdih thoi yơ” (trong 3). Yua kơ phŏ phŏ bơ̆n ưh kơ băt hơđăl kơdih bơ̆n pơm glăi mălei yua kơ juăt jao bơih hăm tơdrong pơm glăi noh, kư̆m ưh kơ đei chrih khă kơ bơ̆n. Nơ̆r khan tơbăt gĭt găl hloh hăm ‘bok Pôl noh đơ̆ng Kră Yang lăng (trong 4). Tơ’ngla “’Bok Kei-Dei đĕch gơh băt sek tơlang inh”. Tơdrong lăng khan đơ̆ng Tơ’ngla băt tơdrong bơ̆n wă pơm tơchĕng lăm jơhngơ̆m bơ̆n noh bơih tơdrong lăng gĭt găl.
Kơkuh kơ Kră Yang, apinh Ih tơgŭm inh huay kơ chă tơdrong lăng đơ̆ng kon bơngai mălei ‘blŏk răk păng lăng gĭt tơdrong đơ̆ng Kră Yang, wă kơ inh huay kơ pơang dah đe pơư păng huay kơ bơ̆l hăl kơplah đe chrih khă. Krao khan yua anăn Kră Yang Yêsu Krist, Amen.
Jơhngơ̆m bơ̆n thoi yơ kơplah đe pơtŏ pơting, dah đe chrih khă?
Đŏk Sơ̆p Hla bơar ‘Bok Kei-Dei lăm pêng sơnăm: Êsêkiên 11
Kênh Youtube BHKTHN:
