Klei Aê Diê Blŭ: I Kôrantô 4:1-5
Êlan kliăng: “Bi kơ kâo, kâo amâo yap yuôm ôh klei diih amâodah phung mnuih phat kđi kâo. Wăt kâo kăn phat kđi kâo pô rei” (I Kôrantô 4:3)
Klei êmuh ksiêm mĭn: Si ngă Khua ƀĭng kna Y-Pôl bi klă kơ bruă ñu leh anăn phung mă bruă mbĭt hŏng ñu? Ti klei ksiêm mkă ñu dlăng yuôm? Hlăm bruă leh anăn klei mă bruă, si klei pô mkăn ksiêm mkă jing yuôm hŏng drei?
Lŏ sa blư̆ Khua ƀĭng kna Y-Pôl lŏ bi klă kơ bruă klam ñu, ñu, Y-Apôlôs leh anăn Khua ƀĭng kna Y-Pêtrôs “jing dĭng buăl Krist” (êlan 1). Brei mnuih mă bruă kơ Khua Yang bi hdơr nanao kơ ñu pô kơ bruă klam ñu čiăng ñu thâo dlăng djŏ kơ ñu pô, kơ pô mkăn leh anăn kơ Khua Yang. Kyuadah klei mĭn sa čô dĭng buăl jing amâo djŏ klei mĭn čiăng plah mă klei guh kơang amâodah ai mă bruă kơ ñu pô ôh. Dĭng buăl knŏng čiăng ngă bi jăk bruă khua ñu jao, amâo bi msĕ hlei pô jing kdlưn hĭn ôh, kăn čoh čuăn kơ klei ênưih, klei găl amâodah klei arăng bi mni rei.
Khua ƀĭng kna Y-Pôl lŏ bi klă bruă klam lŏ čuê kơ phung mă bruă kơ Khua Yang msĕ si ñu jing knŏng phung “kiă kriê” klei yuôm hgăm Aê Diê (êlan 1). Pô kiă kriê amâodah dĭng buăl kiă, jing dĭng buăl ngă jih jang bruă khua ñu ƀiădah ñu pô amâo mâo dưn sa mta mnơ̆ng ôh. Pô kiă kriê thâo săng klă kơ bruă klam ñu jing dôk “sĭt suôr” hŏng khua ñu (êlan 2), amâo djŏ dôk sĭt suôr hŏng phung dĭng buăl mkăn amâodah hŏng sa čô pô mkăn hlăm gŏ sang khua ñu ôh. Kyuanăn, amâo djŏ ôh klei êmuh phŭn jing si ngă Khua ƀĭng kna Y-Pôl thâo blŭ msĕ si Y-Apôlôs amâodah Khua ƀĭng kna Y-Pêtrôs mơ̆? Ƀiădah si ngă jih jang drei sĭt suôr leh hŏng bruă Khua Yang jao kơ grăp čô drei mơ̆? Tinei, knŏng hlăm êma êlan, Khua ƀĭng kna Y-Pôl yua boh blŭ “phat kđi”, lŏ mblang jing “ksiêm mkă”, truh kơ êma blư̆ brei ƀuh klei bi êdah kơ klei “sĭt suôr” jing klei uêñ mĭn amâodah yap yuôm klei ksiêm mkă mơ̆ng hlei pô: Mơ̆ng khua, mơ̆ng phung dĭng buăl mkăn amâodah mơ̆ng ñu pô?
Mdê hŏng lu mnuih hlăm phung drei, wăt tơdah Khua ƀĭng kna Y-Pôl jing pô mkŏ mjing Phung Sang Aê Diê ƀuôn Kôrantô leh anăn ñu uêñ mĭn snăk kơ klei hdĭp klei đăo Phung Sang Aê Diê tinăn, ƀiădah ñu lač, klei đa đa mnuih hlăm Phung Sang Aê Diê ƀuôn Kôrantô ksiêm mkă kơ ñu jing pô thâo hĭn amâodah amâo hmao ôh Y-Apôlôs amâodah Y-Sêphas, ñu “amâo yap yuôm ôh” kơ klei anăn (êlan 3). Hlăm kŏ ênuk 21 anei, lăn ala dôk hdĭp hŏng klei mtrŭt mnuih yap klei pô ksiêm mkă jing mrô sa. Bi Khua ƀĭng kna Y-Pôl, “wăt kâo kăn phat kđi kâo pô rei” (êlan 3), kyuadah tăp năng mâo blư̆ drei kăn thâo klă lei si drei pô jing. Drei ngă soh ƀiădah drei mưng leh hŏng klei ngă soh anăn, drei ăt kăn mâo klei ƀuah rei. Klei ksiêm mkă yuôm hĭn kơ Khua ƀĭng kna Y-Pôl jing klei ksiêm mkă mơ̆ng Khua Yang (êlan 4), Pô “srăng bi mngač jih jang klei mdăp leh hlăm klei mmăt”. Klei ksiêm mkă mơ̆ng Pô thâo săng klei mĭn, klei mtrŭt hgăm hlăm ai tiê drei yơh jing klei ksiêm mkă yuôm hĭn.
Si ngă drei lŏ wĭt ngă tơdah arăng mă drei ngă klei bi msĕ, amâodah ƀuah kơ drei?
Wah lač: Ơ Khua Yang, đru kâo amâo duah klei ksiêm mkă mơ̆ng mnuih ôh ƀiădah djă pioh leh anăn yap yuôm klei ksiêm mkă mơ̆ng Ih, čiăng kơ kâo amâo jing mgao ôh tơdah mâo klei bi mni leh anăn kăn êdu ai rei tơdah tŭ klei ƀuah. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Êskiêl 11
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
