Klei Aê Diê Blŭ: Y-Êsai 30:18-26
Êlan kliăng: “Kyuadah Yêhôwa jing Aê Diê kpă. Jăk mơak yơh kơ jih jang phung čang guôn kơ Ñu.” (Y-Êsai 30:18b)
Klei êmuh ksiêm mĭn: Khua pô hưn êlâo Y-Êsai brei thâo ya klei Khua Yang srăng ngă kơ phung ƀuôn sang Ñu? Si mblang kơ jih jang klei Khua Yang ƀuăn? Ya klei čang hmăng kơ drei mơ̆ng mta klei anei, êjai tlă anăp hŏng klei ênguôt hnĭng luč liê amâodah boh jhat mơ̆ng klei soh hlăm klei hdĭp?
Hlăm trăn Klei Aê Diê Blŭ êlâo anăn (Y-Êsai 30:8-17), Khua pô hưn êlâo Y-Êsai čih leh sa pŏk rup sa găp djuê bi kdơ̆ng, lui wir Khua Yang. Hrô kơ đăo knang kơ Khua Yang, phung buôn sang Yuđa êran nao mbăng kơ phung Êjip čang hmăng mgang brei diñu mơ̆ng roh. Klei diñu bi kdơ̆ng năng kơ klei phat kđi. Ƀiădah lĕ, kčưm dơ̆ng hlăm trăn anei (êlan 18-26), Khua pô hưn êlâo Y-Êsai kñăm kơ sa klei hưn bŏ hŏng klei čang hmăng: “Kyuanăn Yêhôwa ăt čiăng snăk ngă klei jăk kơ diih; kyuanăn Ñu kgŭ čiăng pap kơ diih.” (êlan 18a).
Wăt tơdah phung ƀuôn sang Aê Diê ruah bi kdơ̆ng hŏng Ñu, Khua Yang ăt bi êdah klei pap hŏng diñu. Khua Yang “kgŭ” amâo djŏ čiăng bi rai diñu ôh ƀiădah čiăng tuh brei klei pap kơ diñu. Wăt tơdah phung ƀuôn sang Ñu nao êlan wê, Khua Yang ăt hmăng hmưi ktŭng diñu wĭt, bi hlao leh anăn hơêč hmưi kơ diñu. Ai tiê bŏ hŏng klei pap Khua Yang tui hlue drei nanao (Klei Mmuñ Hđăp 23:6). Khua Yang kăp čiăng pap brei kơ drei leh anăn lŏ bi mrâo drei. Ñu čang guôn drei lŏ wĭt kơ Ñu čiăng kơup guôm drei hlăm klei pap Ñu.
Ƀiădah lĕ, klei pap amâo lăm lui hĕ klei kpă ênô ôh. Hlăm êlan 18, Khua pô hưn êlâo Y-Êsai ăt kñăm mơh snei: “Yêhôwa jing Aê Diê kpă” Aê Diê amâo lui hgao hĕ klei soh ôh. “Ñu amâo yap kpă ôh mnuih soh” (Klei Kbiă 34:7). Klei kpă Khua Yang srăng lŏ bi mrâo jih jang mnơ̆ng. Ƀiădah klei pap leh anăn klei kpă Khua Yang amâo tuôm bi kdơ̆ng hdơ̆ng pô ôh. Klei kpă ênô Khua Yang rơ̆ng kơ klei soh srăng klam boh jhat ñu, ƀiădah klei pap rơ̆ng snei Khua Yang srăng lŏ bi mrâo tơdah phung ƀuôn sang Ñu kmhal lŏ êran wĭt kơ Ñu leh anăn čang guôn Ñu.
Khua pô hưn êlâo Y-Êsai hưn klei ƀuăn yuôm bhăn mơ̆ng Khua Yang pioh kơ phung ƀuôn sang Ñu. Khua Yang srăng wĭt lač tơdah phung ƀuôn sang kwưh akâo kơ Ñu (êlan 19). Khua Yang srăng atăt gai diñu leh anăn lač snei: “Nĕ anei êlan, êbat tinei!” (êlan 21). Khua Yang srăng hơêč hmưi kơ bruă diñu ngă leh anăn thiê brei kơ diñu êbeh dlai (êlan 23-24). Khua Yang srăng bi hlao anôk êka leh anăn păn brei anôk mčah diñu (êlan 26).
Hruê anei, grăp blư̆ tlă anăp hŏng klei ênguôt hnĭng, klei luč liê amâodah hŏng boh jhat mơ̆ng klei soh, hrô kơ nao tui duah anôk hơĭt ênang amâo sĭt, êran tiŏ phung mnuih, boh nik kơ klei dưi mnuih, kơ anôk bruă msĕ si phung ƀuôn sang Yuđa hlăk đưm ngă leh, drei mâo klei iêô mthưr čang guôn bĕ kơ Aê Diê leh anăn đăo knang kơ klei Aê Diê pap leh anăn klei kpă Ñu. Klei kpă ênô amâo tlaih ôh kơ klei bi kmhal tơdah grăp blư̆ ngă soh, ƀiădah klei pap ba hriê klei bi hlao. Klei kpă ênô bi kdơ̆ng hŏng klei soh, ƀiădah klei pap pŏk brei kơ hruê êdei anăp leh anăn klei čang hmăng. Akâo kơ Khua Yang brei drei êran nao kơ Ñu hŏng klei đăo knang, kơup ti gŭ êyui klei khăp Ñu leh anăn čang guôn Ñu.
Tơdah tlă anăp hŏng klei lông dlăng, si ngă drei khăng čang guôn Khua Yang amâodah čang guôn klei bi mtlaih mơ̆ng mnuih?
Wah lač: Ơ Khua Yang, akâo Ih đru kâo čang guôn Khua Yang hlăm jih jang klei truh hlăm klei hdĭp, čiăng kơ kâo thâo kral klei jăk jĭn leh anăn klei pap Khua Yang tui hlue traih dlăng nanao jih klei hdĭp kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsêkiêl 6
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
