Mathais 23:27-33
Nqe cim:
“Cov xibhwb uas qhia Vajtswv txoj Kevcai thiab cov Falixais uas ntsejmuag ncaj siab nkhaus, nej yuav raug kev puastsuaj! Nej zoo ib yam li lub ntxa uas pleev hmoov sib sab nraud dawb paug, tiamsis sab hauv puv nkaus pobtxha neeg tuag thiab tsw lwj ntxiag xwb.” (Mathais 23:27)
Lus nug xav:
– Vim licas Tswv Yexus ho cem cov xibhwb uas qhia Vajtswv txoj Kevcai thiab cov Falixais?
– Vim licas tus Tswv ho hais tias lawv yog neeg ntsejmuag ncaj siab nkhaus?
– Peb yuav sawv tabmeeg tus Tswv lo lus cem ntawd li cas?
Tswv Yexus rov cem cov xibfwb uas qhia Vajtswv txoj Kevcai thiab cov Falixais txog ob yam ntsejmuag ncaj siab nkhaus. Qhov thib ib, Nws cem hais tias: “Nej zoo ib yam li lub ntxa uas pleev hmoov sib sab nraud dawb paug, tiamsis sab hauv puv nkaus pobtxha neeg tuag thiab tsw lwj ntxiag xwb” (nqe 27). Tomqab lub caij ntuj nag, cov neeg Yudais feem ntau rov pleev hmoov sib rau tej ntxa, tshwjxeeb yog cov ntxa nyob cheebtsam Yeluxalees kom cov neeg nyob kev deb tuaj pehawm Vajtswv tsis mus chwv raug tej ntxa ntawd, rau qhov yog tias mus chwv raug ces lawv yuav tsum raug qias tsis huv mus txog xya hnub (Teev Npe 19:16), thiab raug txwv tsis pub mus koom tej kevcai tseemceeb. Tswv Yexus tabtom taw qhia txog qhov tseeb ntawm cov neeg uas niaj hnub qhia Vajtswv txoj Kevcai rau lwm tus, tiamsis lawv ho hnav lub tsho ncaj ncees cuav los npog lawv lub siab phem thiab tsis muaj kev ntseeg!
Qhov thib ob, Tswv Yexus cem lawv hais tias: “Nej txhim cov cev Vajtswv lus tej ntxa zoo nkauj heev, thiab ua rau tej pejthuam uas neeg puab nco txog cov neeg ncaj ncees thaum ub, kom zoo nkauj” (nqe 29), qhov ntawd txhais hais tias lawv ua txuj saib hlob cov Cevlus los ntawm kev kho cov Cevlus li ntxa kom zoo nkauj, thiab lawv tseem khavtheeb hais tias: “Yog peb nyob tiam uas peb cov yawgkoob nyob, peb yuav tsis nrog lawv tua cov cev Vajtswv lus” (nqe 29). Lawv yog cov neeg ntsejmuag ncaj siab nkhaus kawg nkaus, rau qhov lawv lub ncauj lees hais tias saib hlob cov Cevlus tiamsis lawv ho tabtom npaj siab yuav ntes Tswv Yexus uas yog tus Cevlus Loj tshajplaws! Lawv kuj zoo ib yam li lawv cov yawgkoob, thiab lawv tseem ua txhaum hnyav dua thaum lawv tsis txais yuav thiab muab Vajtswv Leej Tub ntsia rau saum tus ntoo khaublig. Tswv Yexus hu lawv hais tias yog “Cov niag nab, thiab nab cov menyuam!” (nqe 33), Nws hais li no qhia txog qhov tseeb tias cov thawjcoj Yudais tabtom muab toj taug lom lawv haiv neeg thaum lawv pheej tawmtsam thiab tsis lees yuav Tswv Yexus yog tus Mexiyas uas phau Vajluskub Qub tau hais tseg, yog li ntawd lawv yuav tsum raug txim hnyav hauv ntujtawg.
Cov ntseeg Tswv Yexus niaj hnub nimno kuj tabtom raug Tswv Yexus lo lus ceebtoom no. Yog tias peb tseem nyob hauv kev txhaum, lub siab puv nkaus kev qias neeg tiamsis nrauv ho ua txuj dawbhuv heev, ces peb kuj yog neeg ntsejmuag ncaj siab nkhaus, ua rau lwm tus neeg uas nyob ze peb raug qias neeg ib yam nkaus. Yog tias peb tsis xam pom peb lubneej lossis xam pom tias yus yuamkev lawm, tiamsis tseem ho txhob txwm ua li ntawd kom lwm tus poob rau lub vojhluas thiab raug qias; yog tias peb nrog lwm tus tham cov lus qab zib tiamsis tsis yog txoj tseeb, ua tej haujlwm pab lwm tus tiamsis tsis yog los ntawm kev hlub, hais lus tiamsis ho tsis ua raws… ces yog peb tabtom lom peb cov kwvtij, thiab ua rau cov neeg uas nyuam qhuav los ntseeg tshiab hauv Pawg Ntseeg totaub yuamkev txog Tswv Yexus thiab Nws txojkev ntseeg. Thov tus Tswv pab peb xyuamxim hauv lubneej thiaj tsis raug tus Tswv cem hais tias yog neeg ntsejmuag ncaj siab nkhaus (Hanpakus 2:15).
Thov Vajtswv,
Tus Tswv, thov pab nyuam yaus ua lubneej kom yog, ua neej tseeb nrog Koj thiab nrog lwm tus kom nyuam yaus lubneej niaj hnub ua haum Koj siab thiab txhawb lwm tus lub zog. Thov kom nyuam yaus lo lus hais thiab tej haujlwm tsis ua rau lwm tus yuamkev. Nyuam yaus tuav Yexus Khetos lub npe thov, Amees.
Peb puas tabtom ceevfaj ntsuamxyuas peb lubneej saib puas muaj kev cuamtshuam phem lossis zoo rau cov neeg nyob puag ncig peb?
Nyeem Vajluskub hauv peb xyoos: I Kauleethaus 16
Kênh Youtube BHKTHN:
