Klei Aê Diê Blŭ: Y-Mathiơ 23:27-33
Êlan kliăng: “Knap mñai yơh kơ diih, Ơ phung Pharisi leh anăn phung khua čih hră, phung ai ngăm! Kyuadah diih jing msĕ si msat arăng mia čŭr kô̆, ti êngao dlăng msĕ si siam, ƀiădah hlăm lam bŏ hŏng klang mnuih djiê leh anăn djăp mta mnơ̆ng čhŏ” (Y-Mathiơ 23:27)
Klei êmuh ksiêm mĭn: Khua Yang Yêsu lŏ dơ̆ng lač kơ phung khua čih hră leh anăn phung Pharisi kơ ya klei? Ya ngă Khua Yang lač diñu jing phung ai ngăm? Si drei tlă anăp hŏng klei Khua Yang lač?
Khua Yang Yêsu lŏ dơ̆ng lač kơ phung khua čih hră leh anăn phung Pharisi dua klei ai ngăm. Tal sa, diñu “msĕ si msat arăng mia čŭr kô̆, ti êngao dlăng msĕ si siam, ƀiădah hlăm lam bŏ hŏng klang mnuih djiê leh anăn djăp mta mnơ̆ng čhŏ.” (êlan 27). Leh yan hjan phung Yuđa lŏ mia dŭm boh msat, boh nik jŭm dar Yêrusalem čiăng đru kơ phung wĭt kơ ƀuôn sang amâo sô̆ ôh, kyua tơdah bi sô̆ diñu srăng čhŏ mrŏ hlăm kjuh hruê (Klei Yap 19:16), hnui hĕ knăm yuôm bhăn. Khua Yang Yêsu dôk lač kơ boh klei phung mtô klei bhiăn kơ pô mkăn jing phung hơô ao knuih mgưt čiăng mdăp ai tiê mplư luar, soh jhat!
Tal dua, diñu “mkra msat phung khua pô hưn êlâo leh anăn mprăp bi siam msat phung kpă”(êlan 29), jing diñu ngă mgưt mpŭ kơ phung Khua pô hưn êlâo hŏng klei mkra msat kơ phung anăn siam snăk, leh anăn diñu ăt blŭ hŏng klei mgao snei, “tơdah hmei dôk hdĭp hlăm ênuk phung aê hmei, hmei amâo tui hlue mbĭt hŏng diñu ôh čiăng tuh êrah phung khua pô hưn êlâo” (êlan 30). Diñu jing ai ngăm snăk kyuadah lač pô mpŭ kơ phung Khua pô hưn êlâo ƀiădah lŏ mkŏ mjing hdră mă Khua Yang jing Khua pô hưn êlâo prŏng! Diñu ăt msĕ si phung aê diñu mơh leh anăn kjham hĭn jing ngă soh kjham hĭn tơdah diñu hngah leh anăn pơ̆ng Anak Aê Diê ti kyâo bi kal. Khua Yang Yêsu pia diñu jing “găp djuê ala pui” (êlan 33) čiăng lač kơ boh klei phung khua gĭt gai klei đăo Yuđa dôk mtô soh kơ djuê ana pô tơdah diñu bi kdơ̆ng nanao, hngah kơ Khua Yang Yêsu jing Yang Mêsi hlăm Hdruôm Hră Klei Bi Mguôp Hđăp lač leh, snăn diñu srăng tŭ klei bi kmhal kjham snăk hlăm war pui.
Phung đăo kơ Krist hruê anei ăt tuôm hŏng klei Khua Yang Yêsu hưn brei răng anei. Tơdah drei dôk hdĭp hlăm klei soh, ai tiê bŏ hŏng čhŏ mrŏ ƀiădah hŏng sa klei bi êdah ti êngao hŏng klei siam, yuôm bhăn snăn drei ăt jing phung ai ngăm mơh, ngă bi čhŏ phung bi tuôm hŏng pô. Tơdah drei amâo ƀuh ôh klei soh pô amâodah ƀuh leh klei soh ƀiădah čŏng čiăng hdĭp snăn čiăng bi msoh phung mkăn leh anăn jing čhŏ mrŏ; tơdah drei lač hŏng pô mkăn hŏng klei blŭ êdu êun ƀiădah amâo djŏ jing klei sĭt nik ôh, hŏng klei bi êdah đru ƀiădah amâo kbiă mơ̆ng klei khăp ôh, lač ƀiădah amâo ngă ôh… snăn drei dôk bi msoh ayŏng adei, leh anăn ngă kơ phung mrâo mŭt hlăm Phung Sang Aê Diê čhuai kơ Khua Yang Yêsu leh anăn klei đăo Ñu. Akâo kơ Khua Yang đru drei thâo răng hlăm knuih hdĭp čiăng kơ Khua Yang amâo lač ôh drei jing ai ngăm (Y-Haƀakuk 2:15).
Drei răng ksiêm dlăng knuih hdĭp drei dôk hmăi jhat amâodah jăk hŏng phung riêng gah?
Wah lač: Ơ Khua Yang, akâo kơ Ih đru kâo hdĭp djŏ, hdĭp sĭt hŏng Khua Yang leh anăn hŏng pô mkăn čiăng kơ klei hdĭp kâo bi mơak kơ Khua Yang nanao leh anăn bi mđĭ ai hdơ̆ng pô. Akâo kơ klei blŭ leh anăn bruă kâo ngă amâo jing klei bi msoh kơ phung riêng gah ôh. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Kôrantô 16
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
