Klei Aê Diê Blŭ: Klei Mphŭn Dơ̆ng 4:8-10
Êlan kliăng: “Leh anăn Khua Yang lač, “Ya klei ih ngă leh? Asăp êrah adei ih ur mơ̆ng lăn truh kơ kâo.” (Klei Mphŭn Dơ̆ng 4:10)
Klei êmuh ksiêm mĭn: Si ngă Y-Kain bi mdjiê adei pô? Leh mâo klei mdjiê mnuih, ya klei Aê Diê lač hŏng ñu? Ya klei drei hriăm kơ hdră êlan truh kơ klei soh?
Klei mâo hlăm sa hruê msĕ hŏng yang đar, hlăk dua ayŏng adei Y-Kain leh anăn Y-Aƀel dôk nao mă bruă hlăm hma. Y-Kain ăt bi blŭ hrăm hŏng adei pô msĕ yang đar. Ƀiădah bi kngăr snăk, ñu kjač nao leh anăn mdjiê Y-Aƀel. Y-Aƀel amâo mâo klei čŏng mgang ôh kyua amâo mâo ôh klei pô bi mĭn ayŏng sa tian hŏng pô, khăng bi blŭ hrăm hŏng pô, ară anei lŏ mdjiê hĕ pô! Anei jing klei bi kngăr snăk hŏng Y-Aƀel, hŏng Y-Ađam leh anăn H’Êwơ, ƀiădah amâo mâo ya klei bi kngăr ôh hŏng knuih Y-Kain. Kyuadah êlâo anăn, ñu bi êdah leh ai tiê ăl hŏng Aê Diê tơdah Aê Diê tŭ ư kơ mnơ̆ng Y-Aƀel myơr leh anăn hngah kơ mnơ̆ng pô myơr. Aê Diê hưn brei ñu răng klei soh dôk kăp ti boh ƀăng, leh anăn bruă klam ñu jing brei dưi kriê dlăng klei soh. Klă nik anei jing sa êlan toh hroh, leh anăn boh jhat mâo hưn êlâo leh tơdah Y-Kain amâo mâo mdei. Djăp klei truh djŏ si klei Aê Diê hưn brei răng, Y-Kain brei leh klei soh dưi hĭn leh anăn truh kơ klei ngă soh, mdjiê adei sa amĭ ama hŏng pô.
Leh mâo klei mdjiê mnuih, Aê Diê nao kơ Y-Kain leh anăn êmuh snei: “Ti adei ih Y-Aƀel lĕ?” leh anăn “Ya klei ih ngă leh?” (êlan 9-10). Dua klei êmuh anei atăt Y-Kain kơ klei tlă anăp hŏng klei soh pô, hlei pô mdjiê leh leh anăn klei soh pô. Aê Diê thâo klă ya klei mâo leh, Ñu êmuh amâo djŏ čiăng thâo ôh ƀiădah čiăng kơ Y-Kain mâo mmông găl lŏ dlăng wĭt klei soh pô. Klei soh snăn brei tŭ leh anăn kmhal. Năng ênguôt snăk, Y-Kain yua leh klei luar čiăng mdăp klei soh leh anăn ñĕ kơ bruă klam.
Klei Aê Diê Blŭ mblang kơ êlan atăt kơ klei soh snei: “Ƀiădah grăp čô mnuih mâo klei mplư tơdah klei ñu pô tluh hrip leh anăn mdluh ñu. Tơdah klei tluh hriê kơ prŏng, ñu kkiêng kơ klei soh; tơdah klei soh hriê kơ prŏng, ñu bi truh klei djiê” (Y-Yakơ 1:14-15). Amâo mâo ôh klei sa čô mnuih, leh sa mlam mdih pĭt snăn jing hĕ sa čô mdjiê mnuih, tlĕ piu, knĕ. Boh sĭt klei čiăng kđeh asăr ktŭng, mplư pô anăn hlăm wưng sui, leh anăn pô anăn rông ba leh hlăm ai tiê. Truh wưng prŏng leh, klei čiăng anăn mđĭ kơ anak mnuih truh kơ klei ngă soh, ngă klei măk ƀai. Kyua anăn, grăp čô drei brei răng ksiêm dlăng ai tiê pô leh anăn bi kdơ̆ng hŏng klei mplư mơ̆ng mphŭn mtam. Bi tơdah ngă soh leh, snăn brei jhŏng tlă anăp, kmhal klei soh hŏng Khua Yang akâo kơ Ñu pap brei, bi mrâo, đăm duah mdăp klei soh ôh.
Tơdah ngă soh, drei pral kmhal klei soh hŏng Khua Yang amâodah duah klei mdăp klei soh?
Wah lač: Ơ Khua Yang, kâo yap ai tiê kâo bŏ hŏng klei jhat ƀai leh anăn lu blư̆ ngă soh. Akâo kơ Ih đru kâo jhŏng tlă anăp leh anăn kmhal klei soh hrô kơ duah hdră mdăp, ñĕ đuĕ. Akâo kơ klei myang Aê Diê bi mlih kâo grăp hruê, đru kâo dưi hŏng klei soh leh anăn hdĭp klei hdĭp năng hŏng klei jing anak Ama hlăm adiê. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Kôrantô 13
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
