Chivkeeb 4:8-10
Nqe cim:
“Ces tus TSWV hais tias: Vim li cas koj yuav ua nruj ua tsiv li ko? Koj tus kwv cov ntshav uas ntws rau hauv av twb quaj hu kuv, thov kom kuv ua pauj rau koj ntag.” (Chivkeeb 4:10)
Lus nug xav:
– Ka-ees tau tua nws tus kwv li cas?
– Tomqab uas tua neeg li ntawd, tus Tswv tau hais li cas rau nws?
– Peb kawm tau dab tsi txog txojkev coj mus ua txhaum?
Qhov teebmeem no tshwmsim ncaj rau ib hnub zoo li txhua hnub, thaum uas ob kwvtij Ka-ees thiab Anpees tabtom mus ua haujlwm nram teb. Ka-ees tseem nrog nws tus kwv sibtham li qub. Tiamsis xav tsis txog tias, nws tau ntxeev siab rau nws tus kwv thiab muab nws tus kwv tua tuag lawm. Anpees tsis ceevfaj dabtsi li rau qhov nws tsis xav txog hais tias tus tijlaug uas koom roj koom ntshav, tus uas niaj hnub nrog nws sibtham, ho yuav muaj lub siab phem tua nws! Qhov no yog ib yam uas ntsigtxog rau Anpees, rau Adas thiab Evas, tiamsis ho tsis yog ib yam xav tsis txog rau Ka-ees. Rau qhov ua ntej ntawd, nws twb qhia tshwm nws lub siab chim rau tus Tswv thaum tus Tswv txais Anpees cov khoom fij tiamsis ho tsis txais nws cov. Nws twb raug Vajtswv ceebtoom hais tias kev txhaum zov rawv ntawm qhovrooj, thiab nws yuav tsum tswj tus kheej kom kovyeej tej kev txhaum ntawd. Qhov no yog ib txojkev uas poob qis zuj zus, thiab teebmeem twb xub tau qhia tseg ua ntej lawm, yog tias Ka-ees tsis tsum. Txhua yam tshwmsim raws nkaus li tus Tswv lo lus ceebtoom, Ka-ees tau cia tej kev dagntxias kovyeej nws thiab mus txog qhov uas ua txhaum, tua nws tus kwv koom roj koom ntshav.
Tom qab uas muaj qhov kev tua neeg lawm, tus Tswv tau los cuag Ka-ees thiab nug hais tias: “Koj tus kwv Anpees mus dua qhov twg lawm?” thiab “Vim li cas koj yuav ua nruj ua tsiv li ko?” (nqe 9-10). Ob nqe lus nug no coj Ka-ees mus txog qhov uas yuav tsum sawv tabmeeg ntawm nws tej kev txhaum, tabmeeg tus neeg uas nws ua phem rau thiab tabmeeg tej haujlwm yuamkev uas nws tau ua. Vajtswv twb paub meej txhua yam uas tshwm sim lawm, Nws nug tsis yog nug kom paub, tiamsis yog tseg rau Ka-ees muaj sijhawm zeem paub nws txoj kev txhaum. Ua txhaum lawm ces yuav tsum lees thiab hloov siab. Tiamsis tu siab kawg nkaus, Ka-ees ho siv lus dag los npog nws txojkev txhaum thiab tsis lees txim.
Vajluskub piav txog txojkev coj mus ua txhaum li no: “Tiamsis tus uas ua txhaum, yeej yog nws lub siab uas nyiam ua phem coj nws mus ua txhaum. Thaum nws lub siab xeeb txojkev xav phem lawm, ces nws yuav mus ua txhaum, thiab thaum nws ua txhaum lawm, nws yuav raug kev ploj kev tuag” (Yakaunpaus 1:14-15). Tsis muaj ib zaug uas ib tug neeg pheej tshaj, tomqab ib hmos cia li dhau los ua tus neeg tua neeg, ua nkauj ua nraug, lossis ua tub sab tub nyiag. Qhov tseeb tiag, ces tej kev xav phem hauv lub siab twb ntxias tus neeg ntawd tau ntev lawm, thiab tus neeg ntawd twb khaws tej ntawd cia rau hauv nws lub siab. Thaum muaj sijhawm, tej kev xav phem ntawd yuav thawb tus neeg ntawd mus txog qhov uas ua txhaum thiab ua tej haujlwm phem. Yog li ntawd, peb txhua tus yuav tsum ceevfaj xyuas peb lub siab thiab tawmtsam tej kev ntxias txij thaum nyuam qhuav pib. Tiamsis yog tias twb yuamkev ua txhaum lawm, yuav tsum ua ib siab tig rov los lees txim rau tus Tswv thiab taij thov Nws zam txim, hloov pauv lubneej, txhob nrhiav kev muab npog cia.
Thov Vajtswv,
Tus Tswv, nyuam yaus zeem paub hais tias nyuam yaus lub siab phem heev thiab ntau zaus twb ua txhaum lawm. Thov pab nyuam yaus kom muaj lub siab tawv tig los lees kev txhaum, tsis nrhiav kev los npog lossis khiav nkaum. Thov Koj lub hwjchim hloov nyuam yaus txhua hnub, pab nyuam yaus kovyeej kev txhaum thiab muaj lubneej tsim nyog yog Koj menyuam. Nyuam yaus tuav Yexus Khetos lub npe thov, Amees.
Thaum ua txhaum lawm, peb puas nrawm nroos hloov siab lees txim nrog tus Tswv, lossis peb nrhiav kev los npog cia?
Nyeem Vajluskub hauv peb xyoos: I Kauleethaus 13
Kênh Youtube BHKTHN:
