Pajlug 10:1
Nqe cim:
“Tej no yog Xalumoos tej pajlug: Tus tub uas muaj tswvyim ua rau leej txiv zoo siab heev rau nws; tus tub uas ruam coj kev ntxhov siab los rau nws niam” (Pajlug 10:1).
Lus nug rau sawvdaws xav:
– Menyuam kev ua neej cuamtshuam txog dabtsi rau niam txiv?
– Ntawm no, peb zeem pom txoj kev cuamtshuam twg hauv yus lub neej ntsig txog rau tej kwvtij zejzog?
Tibneeg tau Vajtswv tsim los cia los nyob ua ke, vim li ntawd, lub neej zoo lossis tsis zoo ntawm peb txhua tus yuav cuamtshuam mus rau lwm tus. Hauv nqe pajlug no, niam lossis txiv txawm yog hais txog ob feem sib txawv tiamsis nov yeej yog tus duab uas sawv cev rau ob leeg. Thaum ib tug menyuam ua neej ntse, paub mloog lus ua raws li Vajtswv Txojlus qhia thiab mloog niam txiv hais ces yuav ua rau leej niam thiab leej txiv zoo siab, tiamsis yog menyuam ua neej ruam tawmtsam Vajtswv Txojlus qhia thiab niam txiv ces niam txiv yuav nyuaj siab. Yog li ntawd, cov ua menyuam yuav tsum zeem paub hais tias, yus tsis yog ua neej rau yus xwb, tej uas peb ua yuav cuamtshuam txog yus tsev neeg uas yus hlub.
Leej niam leej txiv ntawm no yog sawv cev rau leej niam leej txiv uas hwm Vajtswv thiab txawj ntse hauv Pajlug 4, lawv yog cov uas hlub lawv cov menyuam thiab qhia Vajtswv Txojlus rau cov menyuam. Yog li ntawd, hauv lub tsev neeg, niam txiv yuav tsum xyaum ua lub neej hwm Vajtswv, thiab pab yus cov menyuam kawm xyaum hwm Vajtswv. Vim niam txiv hwm Vajtswv thiab mloog Nws lus thiaj qhia tau yus cov menyuam rau txoj kev tseeb thiab thiaj zeem tau yus cov menyuam tabtom ua neej ruam lossis ntse. Thiab cov menyuam yuav ntsia niam txiv tus cwjpwm, thiab zeem paub hais tias lawv ua neej yog lossis txhaum. Niaj hnub nim no, thaum menyuam tau haujlwm zoo, npluanuj thiab muaj meejmom nrog tebchaws kuj yog kev zoo siab, tiamsis ua ntej dua huv tibsi tej ntawd yog kev hwm Vajtswv thiab ua neej ntse raws li Nws Txojlus qhia. Yog hais tias lawv cov menyuam tabtom ua tau yam ub yam no tiamsis tsi yog yam haum Vajtswv siab, ua neej ruam, tsis muaj Vajtswv Txojlus ci pom kev ces cov niam txiv uas hwm Vajtswv ntawd yuav nyuaj siab. Yog li ntawd, qhov teebmeem tsis yog kom menyuam ua tau tej yam uas peb twb ua tau lawd, tiamsis tej yam ntawd yog dabtsi thiab muaj tus cwjpwm li cas rau Vajtswv.
Ib qhov ntxiv, cia li nco ntsoov hais tias peb kev ua neej yuav cuamtshuam txog ib pab neeg lossis lub tebchaws. Ua neej yuam kev thiab ua kev txhaum yuav coj kev mob los rau cov uas nyob ib ncig ntawm peb tiamsis yog ua zoo yuav coj kev zoo siab los rau kwvyij zejzog. Vim xav hais tias yus kev ua neej tsis cuamtshuam txog lwm tus, ntau tus thiaj ua neej qia dub thiab tsis quav ntsej leejtwg. Muaj ntau tus ntseeg xav ces mus pehawm tsis xav ces nyob tsev, thiab xav hais tias qhov ntawd tsis cuamtshuam txog leejtwg, tiamsis ntawd yog ib txoj kev xav qia dub thiab tsis xav txog leejtwg. Vajtswv tus uas ncajncees tseeb yuav txiav txim rau txhua tus uas pheej ua neej yuam kev thiab tsis tso kev txhaum tseg.
Thov Vajtswv,
Vajtswv, thov pab nyuam yaus hwm Koj thiab mloog Koj lus, kom ua tau qauv thiab qhia nyuam yaus cov menyuam paub hwm Koj thiab ua tau neej rau coobleej pom Koj hauv nyuam yaus lub neej. Nyuam yaus tuav Tswv Yexus Khetos lub npe thov, Amees.
Zaj kawm no pab peb hloov peb kev xav ntawm peb lub neej li cas?
Nyeem Vajluskub hauv peb lub xyoos: Amauj 9
Kênh Youtube BHKTHN:
