Pajlug 21:3-15
Nqe cim:
“Ua ncaj ua ncees thiab ua zoo, txaus tus TSWV siab dua coj tej khoom tuaj fij rau nws” (Pajlug 21:3)
Lus nug rau sawvdaws xav:
– Vajtswv xav kom Nws cov menyuam lub neej qhia tawm yam dabtsi?
– Tus sau piav li cas txog tus neeg phem thiab tus neeg ncajncees?
– Peb ua peb lub neej ua ncaj ua ncees li cas?
Peb pheej ntaus nqi kev ua haujlwm, kevcai ntseeg, kev pehawm, kev fij nyiaj…nrog rau lub siab ntseeg hwm Vajtswv. Nov yog tej haujlwm cheem tsum ua thaum ib tug ntseeg muab siab rau ntseeg. Txawm li ntawd los ntu Vajluskub, tus vajntxwv txawj ntse ntuas peb hais tias: Vajtswv saib tibneeg tus cwjpwm tseemceeb dua li tej khoomfij thiab tej haujlwm kevcai ntseeg (nqe 3). Vajtswv xav kom Nws cov menyuam ua neej qhia tawm Nws txoj kev ncajncees rau lwm tus. Kiag tus cevlus Mikhas kuj qhia paub: “Yeej tsis tau hlo li, tus TSWV twb qhia yam zoo rau peb lawm. Tej uas nws xav kom peb ua yog li no: ua lub siab ncaj, cog kev sib hlub kom ruaj khov, thiab ua lub neej txo hwjchim nrog peb tus Vajtswv sib raug zoo” (Mikhas 6:8). Tseeb tiag, Vajtswv ibtxwm xav kom peb lub neej qhia tawm Nws lub siab thiab Nws tus yam ntxwv. Yam uas Vajtswv txaus siab tsis yog tes haujlwm pehawm sab nraum xwb tiamsis tseem yog txoj kev ua neej ncajncees, ua siab ntev thiab coj ncaj (nqe 3).
Vajntxwv Xalumoos ceebtoom txog “lub siab khavtheeb”, tej tswvyim maj nrooj ua yam tsis ncajncees los rau yus. Tsuas yog muaj txoj kev ncajncees thiab txo hwjchim xwb thiaj yuav coj mus tau qhov nqi zog nyob ruaj khov, tiamsis txoj kev nkhaus thiab lub siab khavtheeb yuav coj mus raug puatsuaj (nqe 4-6). Cov nqe txuas ntxiv piav txog tus neeg phem txoj kev ua neej, tus uas tsis muaj lub siab hlub tshua (nqe 7-10). Qhov no qhia pom tej haujlwm ntawm peb qhia tawm tej kev ntshaw sab hauv tuaj. Yog peb yug kev txhaum, thaum kawg kev txhaum yuav tswj kav peb. Tiamsis yog peb caum Vajtswv, peb lub neej yuav qhia tawm Vajtswv “txoj kev ncajncees”. Txuas ntxiv, tus sau qhia paub hais tias tus neeg ntse kawm luag tej lus qhuab ntuas, tiamsis tus neeg ruam tawmtsam (nqe 11). Nws qhia meej hais tias Vajtswv yog tus ncajncees Nws yuav rau txim rau tus neeg phem (nqe 12). Nqe 13 hais meej txog lub siab hlub tshua cov neeg txomnyem. Vajtswv hmov tshua cov neeg txomnyem thiab Nws samhwm kom peb yuav tsum muaj lub siab hlub tshua lawv (Ntawv Nkauj 41:1; Pajlug 19:17). Thaum kawg, nqe 15 hais tawm ib lo lus tseeb muaj zog khov kho: “Thaum muaj txojkev ncaj ncees, yog kev zoo siab rau cov neeg ncaj ncees, tiamsis cov neeg siab phem tas kev cia siab”. Kev ncajncees tsis tsuas yog ib qho teebmeem hauv lub tebchaws xwb tiamsis tseem yog ib txoj kevcai rau sab ntsujplig. Thaum Vajtswv txoj kev ncajncees ua haujlwm, yuav coj txoj kev zoo siab, kev kaj siab los rau tus neeg ncajncees, tiamsis yuav yog txoj kev txhawj ntshai rau tus neeg ntxeev siab.
Peb tabtom nyob rau ib lub tebchaws uas puv npo txoj kev tsis ncajncees thiab tsis dawbhuv. Vim li ntawd, cia ceev tau lub neej ncajncees rau Vajtswv hloov tagnrho peb lub neej, ntxiv kev ntseeg sawv ruaj rau qhov tseeb ntawm Vajtswv Txojlus.
Thov Vajtswv,
Vajtswv, nyuam yaus ua Koj tsaug uas Koj yog Tus uas ncajncees kawg nkaus. Thov qhia Koj txoj kevcai ncajncees rau nyuam yaus thiab pab nyuam yaus ua neej ncajncees ntawm Koj lub qhovmuag thiab ntawm tibneeg sawvdaws. Nyuam yaus tuav Tswv Yexus Khetos lub npe thov, Amees.
Thaum ntsib kev nyuaj vim peb ua neej ncajncees, peb yuav daws li cas?
Nyeem Vajluskub hauv peb lub xyoos: Amauj 8
Kênh Youtube BHKTHN:
