Klei Aê Diê Blŭ: II Klei Yăl Dliê 36:4-10
Êlan kliăng: “Duah bĕ Yêhôwa êjai arăng dưi ƀuh ñu; iêô wah lač bĕ kơ ñu êjai ñu dôk giăm.” (Y-Êsai 55:6)
Klei êmuh ksiêm mĭn: Mtao Y-Jêhôyakim leh anăn Mtao Y-Jêhôyakin mâo čih jing si ngă? Ya boh jhat kơ dua čô mtao anei tŭ? Si drei ba yua mmông găl kmhal klei soh leh anăn mă bruă kơ Aê Diê?
Trăn Klei Aê Diê Blŭ anei brei thâo kơ klei kiă kriê Mtao Y-Jêhôyakim leh anăn anak êkei mtao jing Mtao Y-Jêhôyakin. Jih dua mtao anei mâo phung mtao ti êngao mđĭ jing mtao sơăi. Mtao Y-Jêhôyakim mâo Mtao Nêkô čar Êjip mđĭ ngă mtao, bi Mtao Y-Jêhôyakin mâo Mtao Y-Nebukatnetsar mơ̆ng Ƀaƀilôn brei ngă mtao. Mâo hĕ klei bi mlih mtao ngă khua kyua leh Mtao Y-Jêhôyakim jing mtao sa wưng snăn mtao Êjip amâo dưi hlăm klei bi blah leh anăn mâo kahan Ƀaƀilôn suôt đuĕ mơ̆ng krĭng Yŭ Asi, hlăm anăn mâo krĭng Yuđa (II Bruă Mtao 24:7). Mtao Y-Jêhôyakim gưt kơ mtao Ƀaƀilôn hlăm tlâo thŭn ƀiădah êdei anăn bi mlih klei mĭn leh anăn bi kdơ̆ng (II Bruă Mtao 24:1). Kyua anăn, Mtao Ƀaƀilôn mă Mtao Y-Jêhôyakim ba wĭt kơ Ƀaƀilôn leh anăn mđĭ Y-Jêhôyakin jing mtao.
Hlăk êjai hdruôm hră Bruă Mtao brei thâo lu klei mâo truh leh hŏng dua čô mtao anei snăn hdruôm hră Klei Yăl Dliê čih klah čŭn snăk, ƀiădah brei ƀuh klei msĕ hlăm klei hdĭp leh anăn boh tŭ diñu mâo leh. Hdruôm hră Klei Yăl Dliê brei thâo thŭn dua čô mtao anei tơdah ngă mtao, Y-Jêhôyakim jing mtao hlăk dua pluh êma thŭn, bi Y-Jêhôyakin đĭ ngă mtao hlăk pluh spăn thŭn. Leh anăn brei thâo Y-Jêhôyakim kiă kriê pluh sa thŭn, bi Y-Jêhôyakin knŏng tlâo mlan pluh hruê. Jih dua ngă klei ƀai ti anăp Yêhôwa (êlan 5 leh anăn êlan 9). Boh tŭ jing diñu tŭ klei jing mnă ti Ƀaƀilôn. Hdruôm hră Klei Yăl Dliê knŏng mñă kơ klei anei čiăng ƀuh tơdah amâo kmhal leh anăn ăt lŏ dơ̆ng hdĭp măk ƀai snăn boh jhat kơ jih dua diñu srăng luč jih jang, luč anôk bruă, klei êngiê leh anăn tŭ klei jing hlŭn.
Truh ară anei, wăt tơdah Aê Diê yua phung mtao ti êngao mdê mdê čiăng bi kmhal phung mtao Yuđa ƀiădah Yuđa ăt adôk čang hmăng. Kyua klei Aê Diê kiă kriê, anak čô Mtao Đawit ăt dôk dưi jing mtao. Aê Diê ƀuăn leh hŏng Mtao Đawit jing sang mtao leh anăn ala čar mtao srăng dôk kjăp, ƀiădah anak čô mtao tơdah ngă soh hŏng Aê Diê srăng amâo tlaih ôh kơ klei bi kmhal (II Y-Samuel 7:12-16). Tơdah dua čô mtao anei kmhal klei soh leh anăn gưt kơ Aê Diê snăn năng ai diñu dưi ñĕ leh kơ jông bi kmhal. Khădah snăn diñu bi luč leh klei găl kmhal klei soh leh anăn luč jih jang. Hlăm klei hdĭp drei mâo ya klei amâo mơak kơ Aê Diê, brei lŏ wĭt tui duah Aê Diê, kmhal klei soh leh anăn lui mtam tơdah adôk mâo mmông găl. Hlăm klei hdĭp drei mâo ya klei amâo bi mơak kơ Aê Diê, brei lŏ tui duah Aê Diê, kmhal klei soh leh anăn lui mtam tơdah adôk mâo klei găl. Ăt brei jih ai tiê hiu hưn Klei Mrâo Mrang Jăk kơ phung ka đăo thâo kral Aê Diê hlăk êjai adôk mâo klei găl. Brei “yua hruê mmông”, yua djăp klei găl (Kôlôs 4:5), kyua klă sĭt klei Aê Diê bi kmhal srăng amâo dưi bi kdung nanao ôh.
Drei tuôm lăm lui hĕ ya mmông găl amâo kmhal klei soh amâodah lui hĕ asăp Aê Diê iêô mă bruă mơ̆? Ya klei brei drei ngă hruê anei?
Wah lač: Ơ Khua Yang, akâo kơ Ih đru kâo amâo bi luč ôh mmông găl kmhal klei soh hlăm klei hdĭp kâo, ăt msĕ mơh kƀah klei mđing uêñ hlăm klei đru kơ pô mkăn ka thâo kral Khua Yang kmhal klei soh leh anăn tui duah Ih. Akâo kơ Ih đru kâo thâo yua hruê mmông mtam tơdah adôk mâo mmông găl. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yôel 3
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
