II Xwmtxheej 36:4-10
Nqe cim:
“Cia li nrhiav tus TSWV thaum uas tseem yuav ntsib tau nws, cia li thov nws pab thaum nws tseem nyob ze nej.” (Yaxayas 55:6)
Lus nug xav:
– Vajntxwv Yehauyakees thiab Vajntxwv Yehauyakhees tau piav txog zoo li cas?
– Qhov xaus ntawm ob tug vajntxwv no yog dabtsi?
– Peb siv lub sijhawm zoo los lees txim thiab ua Vajtswv haujlwm licas?
Cov nqe Vajluskub no qhia txog txojkev tswjhwm ntawm Vajntxwv Yehauyakees thiab nws tus tub uas yog Vajntxwv Yehauyakhees. Ob tug vajntxwv no puavleej yog lwm haivneeg cov vajntxwv tsa los ua vajntxwv. Vajntxwv Yehauyakees yog Vajntxwv Nekaus uas kav Iziv tsa los ua vajntxwv, hos Vajntxwv Yehauyakhees yog Vajntxwv Nenpukanexales uas kav Npanpiloos tsa los ua vajntxwv. Qhov uas muaj txojkev hloov tebchaws tswjhwm no yog vim tomqab Vajntxwv Yehauyakees ua vajntxwv tau ib ntus ces Vajntxwv Iziv swb rog thiab raug cov Npanpiloos ntiab tawm hauv cheebtsam Axias sab hnub poob, uas muaj tebchaws Yudas nyob hauv (II Vajntxwv 24:7). Vajntxwv Yehauyakees mloog Vajntxwv Npanpiloos lus tau peb xyoos tiamsis tom qab ntawd hloov siab thiab tawmtsam (II Vajntxwv 24:1). Yog li ntawd, Vajntxwv Npanpiloos thiaj ntes Vajntxwv Yehauyakees coj mus rau Npanpiloos thiab tsa tub Vajntxwv Yehauyakhees los ua vajntxwv.
Phau Vajntxwv qhia ntxaws ntxaws txog tej yam tshwm sim rau ob tug vajntxwv no, hos Phau Xwmtxheej tsuas sau luv luv xwb, tiamsis qhia pom qhov sib xws hauv txojkev ua neej thiab qhov xaus uas nkawd tau txais. Phau Xwmtxheej qhia nkawd lub hnub nyoog thaum los ua vajntxwv, Yehauyakees ua vajntxwv thaum muaj nees nkaum tsib xyoos, hos Yehauyakhees muaj kaum yim xyoo. Tom qab ntawd qhia hais tias Yehauyakees kav tau kaum ib xyoos, hos Yehauyakhees tsuas kav tau peb hlis thiab kaum hnub xwb. Nkawd ob leeg puavleej tau ua txhaum rau tus Tswv (nqe 5 thiab nqe 9). Qhov xaus yog nkawd puavleej raug kaw hauv Npanpiloos. Phau Xwmtxheej tsuas hais txog cov ntsiab lus no kom pom tias yog tsis lees txim thiab pheej ua lub neej limhiam, ces qhov xaus uas yuav raug txais hauv ob zaj no yog poob tag nrho, poob meejmom, poob kev ywjpheej thiab raug mus ua qhev.
Txog lub sijhawm no, txawm tias Vajtswv tau siv ntau haivneeg tej vajntxwv los rau txim rau cov vajntxwv Yudas los Yudas tseem tshuav kev cia siab. Los ntawm Vajtswv txojkev tswjhwm, cov xeeb ntxwv ntawm Vajntxwv Daviv tseem tau ua vajntxwv. Vajtswv tau cog lus rau Vajntxwv Daviv hais tias vajntxwv tsev neeg thiab tebchaws yuav nyob ruaj khov, tiamsis yog vajntxwv cov xeeb ntxwv ua txhaum rau Vajtswv ces yuav tsis dim txojkev raug nplawm (II Xamuyees 7:12-16 – HMOWSV). Yog ob tug vajntxwv no lees txim thiab mloog tus Tswv lus ces ntshe nkawd twb tsis raug tej rab taus txiav txim tsis tu ncua li ntawd. Tiamsis nkawd tau poob lub sijhawm zoo los lees txim thiab poob tag nrho txhua yam lawm.
Nyob hauv peb lub neej muaj yam dabtsi tsis haum tus Tswv siab, cia li rov qab nrhiav tus Tswv, lees txim thiab tso tseg thaum tseem muaj sijhawm. Thiab yuav tsum muab siab npuab tshajtawm Moo Zoo rau cov neeg tseem tsis tau paub tus Tswv thaum tseem muaj sijhawm. Yuav tsum “tsis txhob cia nkim sijhawm” thiab siv txhua lub sijhawm kom muaj nqis (Kaulauxais 4:5), rau qhov Vajtswv txojkev rau txim yuav tsis ncua mus ibtxhis.
Thov Vajtswv,
Tus Tswv, thov pab kom nyuam yaus tsis txhob poob lub sijhawm zoo lees txim nyuam yaus tej kev txhaum hauv lub neej, thiab tsis txhob tsawg kev pab cov neeg tseem tsis tau paub Vajtswv kom lawv lees txim thiab tig nrhiav Koj. Thov Koj pub kom nyuam yaus paub siv lub sijhawm kom zoo thaum tseem muaj sijhawm. Nyuam yaus tuav Yexus Khetos lub npe thov, Amees.
Peb puas tau ua poob lub sijhawm zoo los lees txim lossis tsis mloog Vajtswv txojkev nqua hu ua Vajtswv haujlwm? Peb yuav tsum ua dabtsi hnub no?
Nyeem Vajluskub hauv peb lub xyoos: Yau-ees 3
Kênh Youtube BHKTHN:
