Ma-thi-ơ 23:16-22
“Lu bơngai bơtho hơ’mon tơdrong bơngai Juđê ‘noh sư khan sư lui kơ ‘Bok Kei-Dei boih mă-lei sư ưh kơ kiơ̆ tơdrong ‘Bok Kei-Dei wă. Đon lu sư thoi noh, bơ̆n băt lu sư tam mă lui tơpă. ‘Bok Kei-Dei ưh kơ lăp đon kơ tơdrong lu sư pơm ôh. Lu sư bơngai kơnê̆ krưp ưh kơ chu. Lu sư ưh kơ đei pơm minh tơdrong kiơ ‘lơ̆ng thoi yơ.” (Tit 1:16 )
Nơ̆r jet tơchĕng pơwao:
– Kră Yang Yêsu chrih kơ lu thây bơtho tơdrong juăt păng khul Pharasi gah tơdrong kiơ?
– Lu sư tơl ưh kơ trŏ wă kơnhăm tơdrong kiơ?
– Hlôh băt nơ̆r Kră Yang tơgŭm tơdrong arih đon lui ih thoi yơ?
Kră Yang Yêsu pơma chrih dơ̆ng kơ lu thây bơtho tơdrong juăt đe Juđê păng lu bơngai Pharasi thoi âu: “Bơngai chông trong”,Kră Yang kơ lu sư hlôh glăi nơ̆r Kră Yang mă-lei khan chông bơngai nai kiơ̆ trong sư noh,lei ưh kơ jor bre sư gô huŏng lăm sơlŭng jrŭ (Mathiơ 15:14). Lu bơngai Juđê chhôk dêh, pơ-ư kơdih khan lu sư hlôh băt nơ̆r Kră Yang, lu sư pơang khan: “Iĕm khan iĕm pơm ‘bok bơtho lu bơngai ưh kơ hlôh tơdrong’Bok Kei-Dei wă tơ’bôh trong kơ bơngai măt tol păng ŭnh pơchrang hơdah kơ lu bơngai măng-mu.Iĕm bơngai ưh kơ hlôh păng lu bơngai oei moh.”(Rôm 2:19-20). Lu sư tơchĕng khan dôm tơdrong juăt noh lĕch đơ̆ng nơ̆r Kră Yang ngăl, mă-lei Kră Yang pơdah tơdrong kơhlôh kơwao, ưh kiơ̆ thoi nơ̆r Kră Yang lăp đon păng tơdrong lu sư pơjah kư̆-kă. Mă mônh, lu sư khan : “Ơ lu iĕm khan bơngai ‘bôh hơdah wă tơ’bôh kơ đe trong,mă-lei iĕm dang bơngai măt tol,ning-mônh iĕm pơmat tat dêh, yua kơ iĕm khan dah bu wă mơng tơmam kiơ kiơ wă kơ băt wă kơ băt sư gô ‘mong,athei bơngai ‘noh tơhlâu hnam akŭm ‘Bok Kei-Dei tơm. Mă-lei dah sư pơm thoi noh tơpă, iĕm khan tŭk tơdrong ‘mong dơ̆ng kư̆m bưh.Dah sư tơhlâu maih hnam akŭm ‘Bok Kei-Dei noh iĕm khan trŏ kơ ‘mong. Ơ bơngai kơhlôh thoi bơngai măt tol,lơ liơ iĕm tơchĕng thoi noh?Hnam ‘Bok Kei-Dei kăl hloh kơ maih.Maih yua kơ đe man tơ hnam ‘Bok Kei-Dei đĕch na lăng nhen kăl” (tr. 16-17). Maih gĭt dêh mă-lei maih đe yua lăm hnam ‘Bok Kei-Dei tơm, ưh kơ trŏ gĭt đĕch mă-lei rơgoh, thoi noh yua kơ đơ̆ng hnam akŭm na maih jing gĭt. Mă ‘bar, lu sư khan: “Păng iĕm khan dah bu wă mơng tơmam kiơ kiơ wă kơ băt sư gô ‘mong tơpă, iĕm athei bơngai noh tơhlâu chơnang ‘măn tơmam soi kơ ‘Bok Kei-Dei.Mă-lei dah bơngai noh sư pơm thoi tơpă, iĕm khan bơngai noh tŭk tơdrong ‘mong dơ̆ng kư̆m bưh.Dah sư tơhlâu tơmam soi ‘măn kơpal chơnang soi iĕm khan trŏ kơ ‘mong. Ơ bơngai dang kơ măt tol, iĕm hăm băt chơnang ‘măn tơmam soi kăl hloh kơ tơmam soi? Tơmam soi yua kơ măn kơpal chơnang soi noh đĕch na lăng thoi lĕ kăl (trong 18-19), wă khan chơnang soi đei tơmam soi na gơh rơgoh. Lu thây bơtho tơdrong juăt păng lu bơngai Pharisi pơjăm chơnang soi păng hnam akŭm na pơ-ư kơ maih păng tơmam soi. Tơdrong kơnhăm lu sư noh lu sư lăng tơmam soi noh gĭt kăl hloh na hơdĕ đơ̆ng nơ̆r pơkă đơ̆ng Kră Yang Yêsu đei pơma chrih kơ lu sư ‘nâu.Kră Yang khan lu sư noh “kơhlôh păng măt tol”, lu sư ưh kơ’bôh kơdih pơm glăi păng pơma kơnê̆ kơ anăn Kră Yang ‘bơ̆t lu sư tơlĕch nơ̆r pơma noh (tr.21-22). Tơdrong hlôh băt nơ̆r Kră Yang gĭt kăl dêh hăm tơdrong arih đon lui bơ̆n.Hlôh trŏ nơ̆r Kră Yang, gô tơgŭm kơ bơ̆n pơm kiơ̆ Kră Yang wă lăm tôm tơdrong, păng huay kơ đei Kră Yang chrih.Nơ̆r Kră Yang bơtho khan ‘nĕ pă pơkă pao Anăn ‘Bok Kei-Dei: “Iĕm wă pơkă kơ đe tơdrong kiơ kiơ, iĕm athei pơkă mă tơpăt hăm ‘bơ̆r hoh đĕch, ‘nĕ pă pơkă pao anăn ‘Bok Kei-Dei dah tơdrong kiơ kiơ nai.Dah iĕm pơkă kơ đe thoi noh hei,’noh đơ̆ng yang kơnê̆ pơhlŭ iĕm pơm thoi noh đĕch” (Mathiơ 5:37). Kră Yang wă kơ bơ̆n đei đon băt ‘mêm kơ bô buăl na tơdrong arih đon lui bơ̆n rai đunh rai wơ̆ lăm tôm tơdrong (Êphêsô 4:15). Thoi noh na bơ̆n huay pă thoi bơngai măt tol chông tơduă măt tol bơih, mă-lei bơ̆n bơngai hlôh nơ̆r Kră Yang, păng bơ̆n yua nơ̆r Sư wă pơlung tơiung lu ‘nhŏng, mai, oh bơ̆n lăm đon lui.
Kơkuh kơ Ih Kră Yang, apinh Ih tơgŭm inh rơring ‘maih pơhrăm nơ̆r Ih hlôh băt thim gah tơdrong Ih rim năr, wă kơ chăl arih inh pơ-ư pơang kơ anăn Ih đơ̆ng nơ̆r pơma truh tơ tơdrong jang, tơdrong pơm hloi.Inh krao khan yua anăn Kră Yang Yêsu Krist, Amen!
Bơ̆n hăm pơhrăm păng hăm hlôh trŏ kơ nơ̆r Kră Yang wă kơ arih ‘lơ̆ng trŏ ưh?
Đọc Kinh Thánh trong ba năm: Ô-sê 3-4
Kênh Youtube BHKTHN:
