Klei Aê Diê Blŭ: Y-Mathiơ 23:16-22
Êlan kliăng: “Diñu hưn kơ diñu thâo kral Aê Diê, ƀiădah diñu hngah Aê Diê hŏng bruă diñu ngă. Diñu jing phung arăng bi êmut, phung amâo gưt asăp ôh, leh anăn amâo dưi ngă sa mta bruă jăk ôh” (Y-Tit 1:16)
Klei êmuh ksiêm mĭn: Khua Yang phat kđi phung khua čih hră leh anăn phung Pharisi kơ ya klei? Diñu lač klei amâo djŏ anăn ya pioh ngă? Si klei thâo săng kơ Klei Aê Diê Blŭ đru klei hdĭp klei đăo drei?
Khua Yang Yêsu lŏ phat kđi phung khua čih hră leh anăn phung Pharisi tơdah Ñu pia kơ digơ̆ jing “phung bum ală atăt êlan”. Ñu čiăng lač klei digơ̆ thâo săng kơ Klei Aê Diê Blŭ soh kluôm dhuôm ƀiădah jing hĕ phung atăt êlan kơ phung mkăn, sĭt nik jih dua srăng lĕ hlăm ƀăng (Y-Mathiơ 15:14). Phung Yuđa bi mni leh anăn bi mđĭ diñu pô snăk hlăm klei thâo săng kơ Klei Aê Diê Blŭ, diñu “jing pô atăt gai phung bum ală, jing klei mngač kơ phung dôk hlăm klei mmăt, pô bi hriăm phung mluk, pô mtô kơ phung hđeh…” (Rôm 2:19-20). Diñu lač jih jang klei bhiăn diñu mtrŭn mă mơ̆ng hdruôm hră Klei Aê Diê Blŭ sơăi, ƀiădah Khua Yang Yêsu ktrâo brei ƀuh klei diñu kƀah klei thâo săng kơ klei Aê Diê čiăng leh anăn klei diñu amâo mâo djŏ ôh. Tal sa, diñu lač: “Tơdah sa čô kat asei hŏng Sang Kkuh Mpŭ amâo mâo klei ôh, ƀiădah tơdah sa čô kat asei hŏng mah hlăm Sang Kkuh Mpŭ, brei klei anăn truh sĭt”, Khua Yang Yêsu ktrâo kơ klei diñu soh hŏng sa klei êmuh amâo čiăng kơ klei wĭt lač ôh, “Ya jing prŏng hĭn, mah amâodah sang yang mjing mah mâo klei mpŭ?” (êlan 16-17). Mah yuôm snăk ƀiădah mah yua hlăm Sang Kkuh Mpŭ amâo djŏ knŏng yuôm ôh ƀiădah mâo wăt klei mjing doh jăk mơh, snăn yơh, kyua Sang Kkuh Mpŭ yơh mah mâo ênoh yuôm. Tal dua, diñu lač: “Tơdah sa čô kat asei hŏng knưl ngă yang, amâo mâo klei ôh, ƀiădah tơdah ñu kat asei hŏng mnơ̆ng ngă yang ti knưl anăn, brei ñu bi truh klei anăn”, diñu mpŭ kơ mnơ̆ng ngă yang hĭn kơ knưl ngă yang. Khua Yang êmuh diñu snei: “Ya jing prŏng hĭn, mnơ̆ng myơr amâodah knưl mjing mnơ̆ng myơr anăn doh mâo klei mpŭ?” (êlan 18-19), čiăng lač kyua mâo knưl ngă yang yơh mnơ̆ng ngă yang mâo klei bi doh.
Phung khua čih hră leh anăn phung Pharisi bi mtrŭn hĕ ênoh yuôm knưl ngă yang leh anăn Sang Kkuh Mpŭ ƀiădah bi mđĭ ênoh mah leh anăn mnơ̆ng ngă yang. Klei diñu kñăm jing čiăng bi mđĭ ênoh yuôm mnơ̆ng myơr leh anăn dêč kơ klei srăng bi sĭt klei kat asei. Khua Yang Yêsu ƀuah ktang snăk kơ phung anei, Khua Yang pia kơ diñu jing “phung ai ngăm leh anăn bum ală”, diñu amâo thâo ôh kơ diñu dôk ngă soh leh anăn mgao hlăm klei diñu kat asei (êlan 21-22).
Klei thâo săng kơ Klei Aê Diê Blŭ jing yuôm snăk kơ klei hdĭp klei đăo drei. Thâo săng djŏ kơ klei Aê Diê Blŭ đru drei ngă djŏ tui si klei Aê Diê čiăng hŏng klei kluôm ênŭm, leh anăn amâo srăng tŭ klei Khua Yang phat kđi ôh. Klei Aê Diê Blŭ mtă kơ drei đăm kat asei ôh, ƀiădah “Brei klei ih blŭ ‘Ơ’ jing Ơ amâodah ‘Ơ ơh’ jing Ơ ơh; klei lŏ thiăm kơ klei anăn kbiă mơ̆ng yang jhat” (Y-Mathiơ 5:37), Khua Yang čiăng drei “hưn klei sĭt nik hŏng klei khăp” (Êphêsô 4:15). Snăn yơh, drei amâo srăng jing phung atăt êlan bum ală ôh ƀiădah jing phung thâo săng Klei Aê Diê Blŭ leh anăn yua Klei Aê Diê Blŭ bi mđĭ phung ayŏng adei drei hlăm klei đăo.
Si ngă drei hriăm leh anăn thâo săng djŏ kơ Klei Aê Diê Blŭ čiăng hdĭp hŏng klei djŏ leh mơ̆?
Wah lač: Ơ Khua Yang, đru kâo mâo klei êpa mhao čiăng hriăm nanao Klei Ih Blŭ čiăng thâo kral Ih hĭn grăp hruê čiăng kơ klei hdĭp kâo bi guh kơang kơ Anăn Ih hlăm klei kâo blŭ leh anăn bruă kâo ngă. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Ôsê 3-4
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
