Klei Aê Diê Blŭ: Klei Mphŭn Dơ̆ng 2:18-25
Êlan kliăng: “Khua Yang Aê Diê lač, “Amâo jăk ôh êkei anăn dôk hjăn; Kâo srăng mjing brei kơ ñu sa čô pô đru năng kơ ñu.” (Klei Mphŭn Dơ̆ng 2:18)
Klei êmuh ksiêm mĭn: Si ngă Khua Yang lač “Amâo jăk ôh êkei anăn dôk hjăn”? Ya bruă Khua Yang ngă leh čiăng bi mgaih mkra klei jing anei? Ya klei hriăm kơ drei mơ̆ng hdră bruă Khua Yang mkra kơ klei bi mguôp anak mnuih?
Hlăm bruă hrih mjing jih jang mnơ̆ng, drei ƀuh klei blŭ ksiêm mñă lu blư̆, “Aê Diê ƀuh klei anăn jing jăk” (Klei Mphŭn Dơ̆ng 1:25). Leh bi ruê̆ ênŭm jih bruă hrih mjing, Klei Aê Diê Blŭ brei thâo “Aê Diê ƀuh jih jang mnơ̆ng Ñu mjing leh, leh anăn nĕ anei, diñu jing jăk snăk.” (Klei Mphŭn Dơ̆ng 1:31). Ƀiădah lĕ, tơdah hrih mjing mnuih leh anăn dưm mnuih hdĭp hlăm war Êđen, Khua Yang ƀuh mâo sa mta klei hlăm mnuih, anăn jing “Amâo jăk ôh êkei anăn dôk hjăn” (êlan 18). Phŭn knhal jing kyuadah jih jang hlô mnơ̆ng, čĭm čap, hlô dliê mâo sơăi găp tui si mta djuê digơ̆, ƀiădah Y-Ađam “amâo ƀuh ôh sa čô năng dưi jing pô đru gơ̆” (êlan 20). Aê Diê hrih mjing leh Y-Ađam jăk siam tloh ênoh, leh anăn bruă ñu bi anăn kơ jih jang mnơ̆ng hrih mjing leh, bi êdah kơ ñu thâo kiă kriê bruă kngan Aê Diê ngă leh. Čiăng lač wăt tơdah hjăn păn dưn ăt ñu dưi mă bruă mơh, ƀiădah hlăm hdră Aê Diê, anak mnuih brei mâo pô đru mbĭt.
Čiăng mkra msir kơ klei Y-Ađam “dôk hjăn”, Aê Diê čuăn leh srăng hrih mjing sa čô mniê hŏng klei “brei êkei anăn pĭt prŏng; êjai gơ̆ pĭt, Ñu mă sa ƀĕ klang grưh, leh anăn lŏ bi msir hŏng kđeh anôk mă anăn… mjing sa čô mniê, leh anăn Ñu atăt ba gơ̆ kơ êkei anăn” (êlan 21-22). Snăn yơh Y-Ađam mâo leh sa čô mnuih dôk mbĭt hŏng ñu. Hlăm boh klei kơ Y-Ađam, pô dôk mbĭt hŏng ñu jing H-Êwơ, mô̆ ñu, đru ngă bruă Aê Diê jao. Ƀiădah ti djiêô klei bi mguôp ung mô̆, Aê Diê ăt yua lu klei bi mguôp mkăn msĕ mơh čiăng kơ anak mnuih mâo ƀĭng găp hrăm mbĭt. Mta klei yuôm bhăn hĭn, anăn jing Aê Diê thâo săng klei anak mnuih čiăng hlăm lam ai tiê, leh anăn Aê Diê srăng mgaih msir klei čiăng anăn. Ñu srăng ba mnuih kơ drei čiăng êbat hrăm mbĭt hlăm klei hdĭp leh anăn bi đru ngă bi leh hdră bruă Aê Diê jao.
Bruă Aê Diê brei mâo mnuih hrăm mbĭt hŏng Y-Ađam bi êdah hdră jăk Aê Diê pioh brei kơ anak mnuih. Ñu mkra hdră kơ anak mnuih hdĭp hlăm klei bi mguôp, čiăng mâo mnuih hrăm mbĭt, bi đru leh anăn bi mguôp hdơ̆ng găp. Thâodah klei bi mguôp hdơ̆ng ung mô̆, gŏ sang găp djuê, ƀĭng găp, Phung Sang Aê Diê, đa đa mkăn…, Aê Diê ăt čiăng kơ anak mnuih thâo snei, drei čiăng mâo mnuih hrăm mbĭt nanao. Aê Diê hrih mjing drei amâo djŏ pioh dôk hdĭp hjăn păn ôh. Leh anăn klei bi mguôp brei mâo klei wĭt lač mơ̆ng dua nah tĭng, amâo djŏ knŏng hjăn sa tĭng ôh. Grăp čô mâo sơăi bruă klam pioh mkŏ mdơ̆ng, bi kjăp leh anăn bi mđĭ klei bi mguôp, Aê Diê mdưm leh drei hlăm anôk anăn pioh dôk hdĭp ba klei tŭ dưn kơ Khua Yang.
Hŏng si hdră êlan drei mpŭ kơ klei bi mguôp drei dôk mâo?
Wah lač: Ơ Khua Yang, lač jăk kơ Khua Yang kyuadah Ih hrih mjing mnuih amâo dôk hjăn păn ôh. Hdră Khua Yang pioh kơ hmei brei dôk hdĭp hlăm klei bi mguôp hdơ̆ng găp, thâodah klei bi mguôp ung mô̆, amâodah ƀĭng găp, amâodah ti krah phung hlăm sang,… Akâo Khua Yang đru kâo thâo mpŭ leh anăn hur har rŭ mdơ̆ng, čiăng mâo klei bi mguôp ktang kjăp, ba klei tŭ dưn kơ hdơ̆ng găp, leh anăn ti dlông kơ jih jang jing pioh bi guh kơang kơ Anăn Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 66-67
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
