Blŭng a 2:18-25
“Kră Yang ‘Bok Kei-Dei khan thoi âu: Kon bơngai oei minh ‘nu minh drô̆ ưh kơ ‘lơ̆ng ôh; Inh gô pơjing ăn minh ‘nu dơ̆ng wă tơgŭm sư păng hơbŏ thoi sư.” (Blŭng a 2:18)
Nơ̆r jet tơchĕng pơwao:
– Yua kơ kiơ Kră Yang khan “kon bơngai oei minh ‘nu minh drô̆ ưh kơ ‘lơ̆ng ôh”?
– Kră Yang đei pơm tơdrong kiơ wă kơ kon bơngai hoei kơ đei oei minh ‘nu minh drô̆?
– Lu bơ̆n đei pơhrăm iŏk tơdrong kiơ lăm tơdrong kơnhăm đơ̆ng Kră Yang wă kơ kon bơngai đei tơ’bưh?
Lăm tơdrong ‘Bok Kei-Dei đei pơjing lu bơ̆n đei ‘bôh nơ̆r mă đei chih pơlơ̆k lơ wơ̆t noh jơ̆ “‘Bok Kei-Dei ‘bôh tơdrong noh noh jing ‘lơ̆ng tơpă” (Blŭng a 1:25). Đơ̆ng rŏng kơ pơjing keh đĭ tôm tơdrong, Sơ̆p hla bơar Nơ̆r ‘Bok Kei-Dei tơbăt “Kră Yang ‘Bok Kei-Dei ‘bôh dôm tơdrong đơ̆ng Sư pơjing ‘lơ̆ng tơpă” (Blŭng a 1:31). Mă lei, kơplah pơjing kon bơngai păng dan kon bơngai lăm pơgar Ê-đen, Kră Yang ‘bôh minh tơdrong noh jơ̆ “kon bơngai oei minh ‘nu minh drô̆ ưh kơ ‘lơ̆ng ôh” (trong 18). Yua kơ lăm sem dơrong, sem păr, sem bri brah đei tơno hơkăn, mă lei ‘Bok A-đam “chă minh ‘nu bơngai tơgŭm sư lei lăi thoi sư ră mă lei ưh kơ đei” (trong 20). ‘Bok Kei-Dei đei pơjing ‘Bok A-đam ‘lơ̆ng tôm tơdrong bơih ră, mă khan ‘Bok A-đam đei dan a-năn kơ rim kơ sem dơrong noh jơ̆ tơbôh kơ sư minh ‘nu bơngai pơgơ̆r dôm tơdrong đơ̆ng ‘Bok Kei-Dei pơjao ‘lơ̆ng dêh bơih ră. Mă khan minh ‘nu jang ‘lơ̆ng dêh bơih ră mă lei lăm tơdrong kơnhăm đơ̆ng ‘Bok Kei-Dei, kon bơngai kăl kơ đei minh ‘nu bơngai yak năm hơdai.
Wă kơ tơgŭm ‘Bok A-đam hlôi đơ̆ng tơdrong “oei minh ‘nu”, ‘Bok Kei-Dei đei pơjing minh ‘nu bơngai drŏ kăn hăm tơdrong “pơm ăn kơ ‘Bok A-đam tep blêk, iŏk minh hlak kơ ting jơmir, na dui iŏk sĕch…na jing minh ‘nu bơngai drŏ kăn, ba ăn kơ ‘Bok A-đam” (trong 21-22). Thoi noh na A-đam đei minh ‘nu bơngai yak năm hơdai. Lăm tơdrong ‘Bok A-đam, bơngai yak năm hơdai noh jơ̆ yă Ê-wơ, jing akăn sư, minh ‘nu bơngai yak năm hơdai wă tơgŭm kơ A-đam keh tơdrong jang đơ̆ng Kră Yang ‘Bok Kei-Dei pơjao. Năm hơdai lăm pơjing hnam dơnŏ Kră Yang ‘Bok Kei-Dei yua tơdrong noh ba ăn đei tơdrong tơ’bưh lăm hnam dơnŏ năm hơdai. Tơdrong kăl dêh đơ̆ng Kră Yang ‘Bok Kei-Dei noh jơ̆ Sư ‘bôh tơdrong kăl wă lăm jơhngơ̆m kon bơngai păng Sư hơmet lăm tơdrong kăl yua đơ̆ng lăm jơhngơ̆m bơngai noh. Kră Yang ba ăn bơngai mă bơ̆n kăl wă tơgŭm băl lăm chăl arih păng tơgŭm băl wă pơm keh lăm tơdrong jang Kră Yang đei pơjao ăn.
Tơdrong ‘Bok Kei-Dei jao ăn kơ ‘Bok A-đam bơngai tơgŭm sư noh jơ̆ tơdrong hơmet ăn tơdrong ‘lơ̆ng đơ̆ng Kră Yang ăn kơ kon bơngai. Kră Yang kơnhăm ăn kơ kon bơngai arih hăm tơdrong wă kơ năm hơdai, tơgŭm păng tơ’bưh dih băl. Mă khan tơdrong tơ’bưh noh lăm hnam dơnŏ, buŏl juăt, Khŭl bơngai lui…Kră Yang đei tơbăt ăn kơ bơ̆n kăl păng gĭt dih băl. Lu bơ̆n đơ̆ng ‘Bok Kei-Dei pơjing ưh kơ wă kơ bơ̆n oei minh ‘nu minh drô̆ ôh. Lu bơ̆n kăl kơ tơbưh dih băl ưh kơ trŏ đơ̆ng minh ‘nu đĕch ôh kăl kơ đei tơdrong tơbưh dih băl ‘bar pah. Rim ‘nu kơ bơ̆n kăl kơ đei tơdrong pơjing păng tơiung tơdrong tơ’bưh đơ̆ng Kră Yang dan ăn wă arih đei yua ăn kơ Kră Yang.
Kơkuh bơnê kơ Ih Kră Yang, yua kơ Ih đei pơjing Inh ưh kơ ăn minh drô̆ ôh. Tơdrong kơnhăm ăn kơ lu nhôn wă kơnhôn arih lăm tơdrong tơ’bưh dih băl lăm hnam dơnŏ, dah buăl juăt, lei mă arih lăm rim ‘nu hnam dơnŏ kăl kơ tơbưh dih băl…apinh Ih ăn kơ inh băl gĭt kăl păng đei tơdrong tơiung wă kơ tơdrong tơ’bưh đei tơdrong ‘lơ̆ng, ba ăn tơdrong đei yua, păng hloh kơ đĭ đăng ba ăn tơdrong ư-ang anăn Kră Yang. Yua anăn Kră Yang Yêsu Krist. Amen
Lu bơ̆n gĭt kơ tơdrong tơ’bưh lu bơ̆n hăm bơngai hăm tơdrong kiơ?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Hơriso 66-67.
Kênh Youtube BHKTHN:
