Chivkeeb 2:18-25
Nqe cim:
“Ces tus TSWV uas yog Vajtswv hais tias, “Tsis tsimnyog cia tus txivneej no nyob ib leeg. Kuv yuav tsim dua ib tug los nrog nws nyob ua txij ua nkawm pab nws” (Chivkeeb 2:18).
Lus nug rau sawvdaws xav:
– Vim li cas Vajtswv hais tias “Tsis tsimnyog cia tus txivneej no nyob ib leeg”?
– Vajtswv ua dabtsi los daws qhov tsamthawj no?
– Peb kawm tau dabtsi txog Vajtswv kev npaj tseg rau tibneeg kev sib raug zoo?
Hauv Vajtswv kev tsim, peb pom Vajtswv qhuas mus qhuas los ntau zaus, “Vajtswv pom tej uas nws tsim tau los ntawd, nws txaus siab heev” (Chivkeeb 1:25). Tom qab uas tsim tiav txhua yam lawd, Vajluskub qhia paub “Vajtswv saib ib puas tsav yam uas nws tsim ntawd, thiab ua rau nws txaus siab heev” (Chivkeeb 1:31). Txawm thaum tsim tiav thiab tso tibneeg nyob rau hauv vaj Edees, Vajtswv pom muaj ib yam cheemtsum ntawm tibneeg yog “Tsis tsimnyog cia tus txivneej no nyob ib leeg” (nqe 18). Qhov vimchiv vim txhua yam tsiaj puavleej nyias muaj nyias yam, tiamsis Adas nrhiav “tej tsiaj ntawd yeej tsis muaj ib tug uas pab tau nws thiab yuav nrog nws ua tau txij nkawm li” (nqe 20). Adas tau tsim los zoo kawg nkaus thiab zoo nkauj kawg li, thiab qhov uas nws ti npe rau tej tsiaj qhia hais tias nws muaj peevxwm saib xyuas Vajtswv tes haujlwm. Txhais hais tias txawm ib leeg xwb los, yeej muaj peevxwm ua tau haujlwm, tiamsis hauv Vajtswv kev npaj tseg, tibneeg yuav tsum muaj phoojywg nrog yus ua haujlwm.
Cia los daws yam cheemtsum “nyob ib leeg” ntawm Adas Vajtswv txiav txim siab tsim ib tug pojniam los ntawm “Tus TSWV uas yog Vajtswv thiaj ua kom tus txivneej ntawd tsaug zog heev, thaum nws tsaug zog lawm, Vajtswv thiaj muab tus txivneej ib tug txha tav rho tawm… los tsim ua ib tug pojniam thiab coj tus pojniam ntawd mus cob rau tus txivneej” (nqe 21-22). Yog li ntawd, Adas muaj neeg nrog nws ua ke lawm. Ntawm Adas, tus uas nrog nws ua ke yog Evas, yog pojniam, yog tus uas pab Adas ua tes haujlwm uas Vajtswv cob. Tiamsis hauv txoj kev sib raug zoo hauv kev txijnkawm, Vajtswv kuj siv muaj ntau txoj kev sib txuas kom tibneeg muaj phoojywg nrog ua haujlwm. Qhov tseemceeb tshaj Vajtswv yeej paub neeg txoj kev cheem tsum hauv tibneeg lub siab thiab Vajtswv yuav pub txoj kev cheem tsum ntawd rau tibneeg. Vajtswv yuav coj tus neeg uas peb cheem tsum los nrog peb ua neej thiab sib pab ua tiav tes haujlwm Vajtswv cob.
Qhov uas Vajtswv pub ib tug neeg nrog Adas ua neej qhia pom Vajtswv kev npaj tseg pub rau tibneeg zoo kawg nkaus. Vajtswv teeb kom tibneeg muaj txij nkawm ua neej, sib pab, koom siab ua ke. Txawm yog kev sib raug zoo hauv kev txij nkawm, tsev neeg, phoojywg, Pawg Ntseeg… ces Vajtswv kuj xav kom tibneeg paub hais tias peb txhua tus ib tug cheemtsum ib tug. Peb tsis tau raug tsim los nyob ib leeg. Thiab txoj kev sib raug zoo thaum twg los yuav tsum muaj mus muaj los tsis mus ib seem xwb. Peb txhua tus puavleej muaj feem xyuam txhim kho, txhawb nqa kom loj hlob txoj kev sib raug zoo uas Vajtswv muab tau tso rau yus ua neej kom muaj nqi rau Nws.
Thov Vajtswv,
Vajtswv, nyuam yaus ua Koj tsaug, vim Koj tsis yog tsim nyuam yaus ib leeg xwb. Tiamais hauv Koj kev npaj tseg Koj pub rau nyuam yaus muaj ntau txoj kev sib txuas, sib raug zoo hauv kev txijnkawm, phoojywg, tsev neeg, pawg ntseeg…Thov pab nyuam yaus saib txoj kev sib raug zoo no muaj nqi thiab paub txhim kho kom loj hlob mus rau qhov zoo thiab muaj nqi rau sawvdaws. Nyuam yaus tuav Tswv Yexus Khetos lub npe thov, Amees.
Peb saib txoj kev sib raug zoo uas peb tabtom muaj, muaj nqi los ntawm qhov twg?
Nyeem Vajluskub hauv peb lub xyoos: Ntawv Nkauj 66-67
Kênh Youtube BHKTHN:
