Rôm 10:13-15
“Thoi noh na bơ̆n athei adrin krao khan apinh tơ’ngla tơm mir âu wă wơh lơ bơngai năm tơgŭm kĕch iŏk ‘ba âu.” (Mathiơ 9:38)
Nơ̆r jet tơchĕng pơwao:
– ‘Bok Pôl tơlĕch nơ̆r jet hăm tơdrong kơnhăm kiơ?
– ‘Bok Kei-Dei păng khŭl bơngai lui gô pơm kiơ kơ lu bơngai tơl nơ̆r Kră Yang krao?
– Bơ̆n oei krao khan păng wang tơgŭm kiơ kơ tơdrong jang chă bơtho?
‘Bok Pôl chih “Noh kư̆m thoi hla bơar ‘Bok Kei-Dei khan sơ̆ thoi âu: “Đĭ-đăng bơngai mă băt kơ krao khan apinh Sư, Kră Yang tơgŭm pơklaih lu sư lei-lăi đĕch.” (trong 13), păng sư tơlĕch dôm nơ̆r jet tơnat biơ̆ wă kơ lu bơngai mă đŏk tơchĕng pơwao, “krao khan apinh Sư” noh krao apinh chă tơdrong dŏng pơklaih đơ̆ng Kră Yang. Păng trŏ thoi ei, tơdrong noh ưh kơ đei ôh hăm bơngai tam mă lui kơ Kră Yang. Mă lei pơm thoi yơ minh ‘nu bơngai gơh lui kơ Kră Yang Yêsu dah lu sư ưh tam mă kơtơ̆ng dah ưh kơ đei wơh đe năm bơtho, thoi yơ đe gơh năm bơtho adrol? (trong 14-15). ‘Bok Pôl tơbôh tơdrong gĭt găl lăm tơdrong Kră Yang wơh đe năm bơtho Tơdrong ‘Nao ‘Lơ̆ng sư kơ bơngai nai. Sư pơ ma hơđăl bơ̆n athei năm na đei jơnăr gơh tơ’bưh păng ră roi gah Kră Yang ăn kơ bơngai nai. Kơplah kơ tơ̆ng bơih Tơdrong ‘Nao ‘Lơ̆ng, lu sư gơh lui păng krao khan apinh Sư. Sư tơbăt nơ̆r khan lê̆ hơdrol lăm Êsai 52:7 “Đêl jơ̆ng lu bơngai ba tơdrong ‘nao ‘lơ̆ng tơ kơpal kông ‘lơ̆ng pă băt dang yơ. Lu bơngai roi tơdrong hiôk-hian, tơbăt tơdrong ‘nao ‘lơ̆ng. Tơbăt tơdrong dŏng pơklaih khan kơ Siôn: “Kră Yang ‘Bok Kei-Dei iĕm oei pơgơ̆r.” dah ưh kơ đei jơ̆ng lu bơngai ba Tơdrong ‘Nao ‘Lơ̆ng, gô ưh kơ đei bu gơh kơ tơ̆ng Tơdrong ‘Nao ‘Lơ̆ng dŏng pơklaih.
Thoi noh bu wă wơh đe năm bơtho? Tơpă ‘Bok Kei-Dei bơih tơngla wơh đe năm bơtho (Mathiơ 9:38), păng Kră Yang ngăl yua iŏk bơngai lui wă wơh lu sư năm bơtho thoi ‘Bok Pôl păng ‘Barnaba đei khul bơngai lui tơ Antiôt wơh năm bơtho đe (Tơdrong Jang 13:1-3). ‘Nâu bơih tơdrong jang ‘Bok Kei-Dei; ưh kơ đei bơngai bu lăng hơi tơdrong jang ‘nâu ôh. ‘Bok Kei-Dei wơh bơngai bơtho păng Kră Yang tuh pŭn hiôk kơ lu sư, na lu bơngai mă đơ̆ng khul bơngai lui wơh năm chă bơtho noh gô đei lu bơngai lui wang tơgŭm lăm tơdrong jang bơtho hăm nơ̆r krao khan tang păng pơyơ̆r. Păng kơ dih lu bơngai mă đe wơh năm athei lăp đon kiơ̆ thoi Kră Yang krao wă păng pơyơ̆r akâu lăm tơdrong jang bơtho, na tơl Kră Yang thoi Êsai bơngai khan lê̆ hơdrol khan: “Đei inh tơâu, apinh Ih wơh inh năm” (Êsai 6:8 BTTHĐ).
Rôm 10:14-15 jơ̆ nơ̆r krao wơh năm bơtho ‘bĕnh chơt hiôk, jơ̆ minh lăm lu nơ̆r krao wơh gĭt găl lăm hla boar ‘Bok Kei-Dei yua kơ bơtho Tơdrong ‘Nao ‘Lơ̆ng noh nơ̆r tơtă athei đơ̆ng Kră Yang ăn kơ đĭ đăng kon pơlei Sư. ‘Noh bơih nơ̆r athei năm kơ rim ‘nu bơ̆n jơ̆ bơngai gơh klaih bơih. Khŭl bơngai lui kơ Kră Yang păng rim bơngai lui kăl kơ krao khan mă lơ kơ tơdrong jang bơtho Tơdrong ‘Nao ‘Lơ̆ng, apinh Kră Yang wơh păng mơnat kơ lơ bơngai wă năm bơtho gah Kră Yang Yêsu kơ lơ bơngai tam mă đei tơdrong dŏng pơklaih. Bơ̆n athei hiơ̆k bơngơ̆t păng adrin krao khan tang kơ lu bơngai mă Kră Yang wơh năm bơtho Tơdrong ‘Nao ‘Lơ̆ng kơ lu bơngai jum dăr kơ bơ̆n.
Ơ Kră Yang, apinh Ih tơgŭm kơ inh hiơ̆k rai lơ hloh kơ tơdrong bơtho Tơdrong ‘Nao ‘Lơ̆ng păng đĭ jơhngơ̆m krao khan tang kơ lu bơngai mă Ih wơh năm bơtho. Apinh ăn kơ inh wă kiơ̆ thoi Ih krao wơh wă jing bơngai kĕch iŏk ‘ba đum djrŭng djrăng bơih tơmir. Yua anăn Kră Yang Yêsu Krist. Amen
Lu bơ̆n hăm đei krao khan kơ lu bơngai ră roi wă kơ ‘Bok Kei-Dei wơh lu sư năm chă bơtho Tơdrong ‘Nao ‘Lơ̆ng ưh?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Nhơ̆m hmoi 1
Kênh Youtube BHKTHN:
