I Kauleethaus 1:10-16
Nqe cim:
“Cov kwvtij, kuv tuav peb tus Tswv Yexus Khetos lub npe ntuas nej sawvdaws, kom nej hais tej lus uas ua rau sawvdaws nyob sib haum thiaj tsis ua rau nej tawg ua pab ua pawg. Nej yuav tsum koom ua ib lub siab, xav ib yam thiab muaj ib lub homphiaj xwb.” (I Kauleethaus 1: 10)
Lus nug sawvdaws xav:
– Qhov teeb meem xubthawj tshwm hauv Pawg Ntseeg Kauleethaus yog dabtsi?
– Timthawj Paulus siv hom kev sib cav twg los qhia kom lawv koom siab ua ke?
– Timthawj Paulus tej lus qhia ceeb toom peb txog yam dabtsi?
Tom qab uas hais lus txais tos thiab ua tsaug lawm, tamsim ntawd Timthawj Paulus txawm hais txog qhov teeb meem uas nws tau hnov dhau ntawm Khalau-es tsevneeg, uas yog muaj kev sib cav sib ceg nyob hauv Pawg Ntseeg Kauleethaus. Lo lus “sib cav sib ceg” (nqe 11), “tawg ua pab ua pawg” (nqe 10, 13) tau siv los sib piv rau lo lus qhia “nyob sib haum” thiab “tsis… tawg ua pab ua pawg.” (nqe 10). Tej lus no hais txog kev sib haum xeeb hauv lub siab thiab lus hais huv tibsi. Qhov laj thawj ua rau Pawg Ntseeg Kauleethaus faib pab pawg yog vim nyob hauv cov ntseeg ib leeg hais lawm ib yam: “Kuv yog Paulus pab”; muaj dua lwm tus hais tias, “Kuv yog Apaulaus pab”; muaj dua lwm tug hais tias, “Kuv yog Petus pab”; thiab muaj dua lwm tus hais tias, “Kuv yog Yexus Khetos pab” (nqe 12). Qhov no qhia tau tias cov ntseeg qee leej nyiam mus raws tus xibhwb uas lawv saib taus qab, lossis mus raws tus coj tau coob leej los ua kevcai raus dej qab (nqe 14-17).
Thaum hnov tej teeb meem no, Timthawj Paulus muab ob lo lus nug los qhia, thiab dhau qhov ntawd qhia rau peb tej yam tseemceeb txog kev sib koom siab txawm yuav muaj tej yam sib txawv. Lo lus nug xubthawj: “Paulus yog tus uas tuag saum ntoo khaublig theej nej lub txhoj los?” Thiab lo lus nug thib ob: “Lossis nej tuav Paulus lub npe muab neeg ua kevcai raus dej los?” Lo lus teb rau ob lo lus nug no coj peb rov qab mus rau qhov tseem ceeb tshajplaws, ntawd yuav tsum koom siab tsis txhob sib faib. Ntau zaus thaum muaj kev sib cav, ib txhia xav tias lawv muaj kev txawj ntse dua, nkag siab Vajtswv Txojlus tob dua, los sis lawv paub txoj kev ntseeg zoo dua lwm tus, ces lawv hnov qab qhov twg yog qhov tseemceeb tshajplaws hauv peb txoj kev ntseeg lawm.
Keeb kwm Pawg Ntseeg yuav luag ob txhiab xyoo dhau los lawm yeej tseem muaj kev sib faib ntau zaug vim tej yam uas tsis yog lub ntsiab lus ntawm Txojmoo Zoo, xws li kev totaub qee nqe Vajluskub uas tsis cuam tshuam txog txoj kev cawmdim lossis kev ua neej ntseeg, uas Vajluskub tsis hais meej; lossis kev sib txawv ntawm kev pehawm, tej hom nkauj hu lossis tej paj nruas siv thaum pehawm; lossis saib kev txawj cav ntawm tus qhia tseem ceeb dua…. Ntawd yog tej lajthawj ua rau muaj kev sib faib hauv Pawg Ntseeg. Yog leejtwg tseem muaj lub siab nyiam faib pab faib pawg, ces ob lo lus uas Timthawj Paulus nug cov ntseeg Kauleethaus kuj yog lus nug rau peb hnub no thiab ntag: Puas yog tus thawj coj, lossis Koom Haum, lossis hom kev pehawm twg,… yog tus uas tuag saum ntoo khaublig theej nej lub txhoj? Puas yog nej tuav tus thawj coj, lossis Koom Haum, lossis hom kev pehawm twg lub npe los ua Kevcai Raus Dej? Nej muab Yexus Khetos faib ua ob peb tug los? Cia siab hais tias cov lus nug no yuav ceeb toom rau peb txhua tus.
Thov Vajtswv,
Tus Tswv, thov pab nyuam yaus xam pom tej yam uas ua rau muaj kev faib pawg hauv nyuam yaus lub siab kom nyuam yaus tso tseg. Thov Koj pub kom peb muaj tib lub siab thiab tib lub suab, kom neeg ntiajteb paub tseeb tias peb yog Koj cov thwjtim. Nyuam yaus tuav Yexus Khetos lub npe thov, Amees.
Ib tsoom cov mloog uas hmov thiab tshua,
Peb yuav tsum ua dabtsi thiaj li tshem tau kev sib cav sib ceg thiab kev faib pab faib pawg tawm hauv cov ntseeg mus?
Nyeem Vajluskub hauv peb lub xyoo: Yelemis 48
Kênh Youtube BHKTHN:
