Klei Aê Diê Blŭ: I Kôrantô 1:10-16
Êlan kliăng: “Ơ phung ayŏng adei, kâo kwưh kơ diih hŏng anăn Khua Yang drei Yêsu Krist, brei jih jang diih blŭ klei msĕ, leh anăn đăm mâo klei bi kah mbha ôh hdơ̆ng diih, ƀiădah brei mâo klei bi mguôp hlăm sa klei mĭn leh anăn sa ai” (I Kôrantô 1:10)
Klei êmuh ksiêm mĭn: Si klei mâo tal êlâo hlăm Phung Sang Aê Diê Kôrantô? Ya klei blŭ Khua ƀĭng kna Y-Pôl yua leh čiăng mtô mtă kơ diñu mâo sa ai tiê? Ya klei mñă kơ drei mơ̆ng klei Khua ƀĭng kna Y-Pôl mtô?
Leh klei kkuh čhưn leh anăn bi mni, Khua ƀĭng kna Y-Pôl lač mtam kơ klei ñu mđing hmư̆ mơ̆ng phung hlăm sang Klôê, anăn jing ti krah Phung Sang Aê Diê Kôrantô mâo klei bi mneh msao. Boh blŭ “klei bi mneh msao” (êlan 11), “bi kah mbha” (êlan 10, 13) mâo yua bi mklă hŏng boh blŭ “blŭ klei msĕ “leh anăn “klei bi mguôp hlăm sa klei mĭn leh anăn sa ai” (êlan 10). Dua klei blŭ anei lač kơ klei sa ai hlăm ai tiê wăt klei blŭ. Mta phŭn kơ Phung Sang Aê Diê Kôrantô bi kah mbha jing hlăm wang phung đăo grăp čô lač: “Kâo jing phung Y-Pôl”, amâodah “Kâo jing phung Y-Apôlôs”, amâodah “Kâo jing phung Y-Sêphas”, amâodah “Kâo jing phung Krist” (êlan 12). Klei anei brei ƀuh phung đăo ruah tui hlue si sa čô mnuih mtô klei đăo mkăn mâo diñu mpŭ, amâodah tui hlue pô ngă ƀap tem kơ lu mnuih hĭn (êlan 14-17).
Dôk ti anăp klei bi mneh msao anăn, Khua ƀĭng kna Y-Pôl mâo dua klei êmuh, leh anăn ăt mơ̆ng anăn mkăp kơ drei tur knơ̆ng čiăng sa ai tiê amâo uêñ kơ klei mdê: Tal sa, djŏ mơ̆ Y-Pôl pô tŭ leh klei arăng pơ̆ng ti kyâo bi kal hrô kơ ayŏng amai adei? Tal dua, ayŏng amai adei yua hŏng anăn Y-Pôl tŭ klei ƀap tem hĕ? Klei wĭt lač kơ dua klei êmuh anei mđing drei kơ klei yuôm bhăn hĭn, anăn jing brei sa ai tiê hrô kơ bi kah mbha. Lu blư̆ hlăk êjai bi mneh msao, đa đa mnuih lač pô thâo mĭn hĭn, mâo klei ruah djŏ hĭn, thâo săng êlam hĭn kơ klei đăo hŏng pô mkăn, kyua anăn khăng wơr hĕ klei yuôm bhăn hĭn, phŭn hĭn hlăm klei đăo drei.
Hƀuê ênuk Phung sang Aê Diê giăm dua êbâo thŭn ăt adôk lu blư̆ bi kah bha kyua klei hlăk amâo jing boh phŭn kơ Klei Mrâo Mrang Jăk ôh, msĕ si klei thâo săng dŭm êlan Klei Aê Diê Blŭ amâo djŏ jing boh phŭn hŏng klei bi mtlaih amâodah knuih hdĭp, amâo mâo Klei Aê Diê Blŭ lač klă mngač ôh; amâodah klei mdê hlăm klei kkuh mpŭ, klei mmuñ kkuh mpŭ, kdrăp tông ayŭ yua hlăm klei kkuh mpŭ; amâodah mñă kơ klei thâo mtô mơ̆ng pô mtô Klei Aê Diê Blŭ…Anăn jing mta phŭn mơ̆ng klei kah mbha hlăm Phung Sang Aê Diê. Tơdah hlei pô hlăm phung drei ăt dôk mâo ai tiê bi kah mbha, kah êpul, snăn klei Khua ƀĭng kna Y-Pôl êmuh phung đăo ti Sang Aê Diê Kôrantô ăt jing klei êmuh kơ drei hruê anei: Djŏ mơ̆ phung gĭt gai, amâodah phung Sang Aê Diê, amâodah klei kkuh mpŭ… tŭ klei djiê ti kyâo bi kal kơ drei? Drei yua anăn pô gĭt gai, Sang Aê Diê, klei kkuh mpŭ anăn čiăng tŭ klei ƀap tem hĕ? Yang Krist bi kah mbha hĕ? Čang hmăng dŭm klei êmuh anăn bi mdih grăp čô drei.
Ya klei brei drei ngă čiăng lăm lui klei bi mneh msao, bi kah mbha hŏng phung đăo mkăn?
Wah lač: Ơ Aê Diê, akâo kơ Ih đru kâo ƀuh phŭn agha klei bi kah mbha hlăm kâo čiăng kâo lăm lui. Akâo kơ Ih đru hmei mâo sa ai tiê, sa klei blŭ, čiăng mơ̆ng anăn lăn ala thâo hmei jing ƀĭng kna Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yêrêmi 48
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
