Mathais 22:34-40
Nqe cim:
“Nej yuav tsum hlub tus Tswv uas yog nej tus Vajtswv kawg siab kawg ntsws, kawg plab kawg plawv thiab kawg nej lub dag lub zog. Nqe ob uas tseemceeb hais li no hais tias, hlub koj tej kwvtij zejzog ib yam li koj hlub koj lub cev.”(Malakaus 12:30-31)
Lus nug rau sawvdaws xav:
– Cov neeg Falixais nug Tswv Yexus yam dabtsi? Vim li cas lawv nug li ntawd?
– Tus Tswv hais sau zog txoj kevcai hauv Vajluskub Qub zoo li cas?
– Peb kawm tau zaj kawm twg rau peb dhau los ntawm ntu Vajluskub no?
Tom qab uas Tswv Yexus nug, “cov Xadukais tsis muaj lus teb tau Yexus li” (nqe 34), cov neeg Falixais koom siab tuaj nug ua kom Yexus ua txhaum. Ib tug xibhwb qhia Vajtswv txoj Kevcai hauv lawv pab tuaj nug tus Tswv: “Xibhwb, Vajtswv txoj Kevcai nqe twg yog nqe uas tseemceeb dua ntais huv tibsi?” (nqe 36). Lub homphiaj tus xibhwb qhia Vajtswv txoj Kevcai nug no yog ua kom Tswv Yexus ua txhaum, thaum hais txog txoj Kevcai. Cov neeg Falixais thiab cov Xadukais puavleej saib Mauxes thiab Mauxes tsib phau Kevcai tseemceeb, yog tus Tswv hais nqe kevcai no lossis lwm nqe kevcai tseemceeb dua, Nws yuav raug cov neeg Yudais tawmtsam.
Tswv Yexus teb kiag rau lawv, lo lus teb yeej raws li Mauxes txoj Kevcai uas cov Yudais ib txwm coj thaum ub los hauv phau Vajluskub Qub. Tim ib, “Hlub tug Tswv uas yog nej tus Vajtswv kom kawg siab kawg ntsws, kawg plab kawg plawv thiab kawg nej lub dag lub zog” (nqe 37), tus Tswv qhia rau Nws haivneeg yuav tsum hlub Nws los ntawm lub cev, lub siab thiab ntsujplig, yuav tsum qhia tshwm lub siab ncaj ncees thiab mloog Vajtswv lus tiag tiag, vim tus Tswv yog “tus uas muaj hwjchim loj thiab peb sawvdaws hwm koj nkaus xwb” (Nehemis 1:5). Tim ob, “Hlub koj tej kwvtij zejzog ib yam li koj hlub koj lub cev” (nqe 39), Tswv Yexus qhia rau Nws cov menyuam hlub tus Tswv npaum twg ces sib hlub npaum ntawd ntag. Vajtswv xav pom tej kev sib hlub nyob hauv Nws cov menyuam. Nov yog yam uas nyuaj ntawm cov neeg Falixais thiab cov Xadukais, rau qhov lawv qia dub, tsuas xam pom lawv xwb tsis pom lwm tus lub neej es hlub txog lawv. Tswv Yexus hais meej rau tus xibhwb qhia Vajtswv txoj Kevcai hais tias ob nqe no puavleej tseemceeb ib yam nkaus, nov yog lub ntsiab sau zog Mauxes txoj kevcai thiab cov cev Vajtswv lus tej lus qhia.
Cov ntseeg nimno kuj ntsib raug ob nqe kevcai uas hlub Vajtswv thiab hlub neeg. Thaum hlub Vajtswv kawg siab peb yuav tsis mus pe tej mlom, peb yuav ua neej kom Vajtswv tau ntsejmuag, pehawm Nws tas siab thiab ncaj ncees. Thiab thaum hlub Vajtswv kawg siab, peb yuav paub hlub lwm tus, yuav tsis muaj tej “lub siab phem, ua nruj ua tsiv, siab heev, sib cav sib ceg, thuam lwm tus, xav ib yam phem hlo li” (Efexus 4:31), peb yuav “ua siab dawb siab zoo, ib tug hlub ib tug, thiab ib tug zam txim rau ib tug, ib yam li Vajtswv twb zam txim rau nej cov uas ntseeg Yexus Khetos lawm” (Efexus 4:32). Cov ntseeg uas hlub Vajtswv thiab sib hlub yuav yog ib npoj neeg ua ntsev las neeg ntiajteb, ua teeb ci rau ntiajteb, thiab ua tus Tswv zoo siab.
Thov Vajtswv,
Vajtswv, thov pub Koj txojkev hlub los kav nyuam yaus lub siab. Thov Koj pab kom nyuam yaus hlub Vajtswv kawg siab thiab hlub tej kwvtij zej zog thiaj haum Vajtswv siab. Nyuam yaus tuav Tswv Yexus lub npe thov, Amees.
Ib tsoom mloog uas hmov thiab tshua,
Peb puas hlub Vajtswv thiab ib leeg hlub ib leeg li Vajtswv hlub peb?
Nyeem Vajluskub hauv peb xyoo: Yelemis 37
Kênh Youtube BHKTHN:
