Hơriso 1:1-2
“Pŭn dêh kơ bơngai bu, ưh kơ kiơ̆ trong lu bơngai kơnê̆, kư̆m ưh kơ oei lăm trong lu bơngai yoch, kư̆m ưh kơ ngôi hơdai hăm lu pơjăm đe; Mă-lei chơt hiôk lăm tơdrong juăt Kră Yang, păng tơchĕng tơdrong juăt ei măng năr.” (Hơriso 1:1-2)
Nơ̆r jet tơchĕng pơwao:
– Bơngai chih hla bơar Hơriso mă mônh tơbăt ăn kơ bơngai đei pŭn hiôk đei dôm tơdrong kiơ?
– Tơdrong mă hloh kơ đĭ đăng bơngai đei pŭn hiôk noh kiơ?
– Tơchĕng tơdrong juăt Kră Yang gĭt kăl thoi yơ lăm chăl arih bơ̆n?
Bơngai chih hla bơar Hơriso mă mônh tơ băt ăn kơ bơngai pŭn hiôk jơ̆ bơngai đei dôm tơdrong ưh kơ kiơ̆ trong lu bơngai kơnê̆, ưh kơ wă arih rok kiơ̆ lu bơngai ala teh, ưh kơ oei lăm trong lu bơngai yoch, ưh kơ pơrơ̆ng blah plơ̆ Kră Yang mălei adrin yak năm lăm trong Sư, ưh kơ pơma pơjăm, kư̆m ưh kơ ngôi hơdai hăm lu bơngai pơjăm đe, ưh kơ pơm buăl juăt hăm lu sư, ưh kơ ngôi hơdai lu bơngai pơang pơma kơnê̆ kơ Kră Yang (trong 1). Mă đơ̆ng tơ’bơ̆p tơdrong pơmat tat thoi yơ, yang kơ satan pơlong lăng, na akŭm sư khan: “Hiap bĕ Kra Yang ‘Bok Kei-Dei na lôch!” mălei Jop khan kơ akăn sư pơma thoi noh jơ̆ kơwao, păng oei wei kơjăp jơhngơ̆m lui gơnang kơ Kră Yang (Jop 2:9-10).
Tơdrong mă hloh kơ đĭ đăng bơngai đei pŭn hiôk noh jơ̆ chơt hiôk lăm tơdrong juăt Kră Yang păng tơchĕng tơdrong juăt ei măng năr (trong 2). Hăm lu sư, nơ̆r Kră Yang jơ̆ ‘ngam ‘lơ̆ng, lu sư ‘mêm ‘maih pơhrăm nơ̆r Kră Yang ưh kơ trŏ kơ pơgŏ ôh. Pơtao Đawit đei mơn bơih: Hli yom kơ Kră Yang jơ̆ ‘lơ̆ng rơgoh, oei oei truh tơ ning mônh. Dôm tơdrong Kră Yang pơkă jơ̆ sĭt tơpă, đĭ đăng trŏ ngăl. Dôm tơdrong noh gĭt hloh kơ maih, gĭt hloh kơ ling maih, kư̆m ‘ngam hloh kơ đak sut đơ̆ng hơkoh sư.” (Hơriso 19:9-10). Bơngai đei pŭn hiôk ling lang tơ’bưh hăm Kră Yang lăm nơ̆r pơma sư. Wă kơ tơdrong juăt Kră Yang pơm trong tơ’bôh chông anhăk dôm tơdrong tơchĕng, pơm păng nơ̆r pơma lu sư. “Nơ̆r Ih jing ŭnh kơ đeng kơ jơ̆ng inh, nhơk pơchrang ăn kơ trong inh” (Hơriso 119:105). ‘Nâu bơih jơ̆ minh tơdrong wă kơ lu sư huay ơ druh kiơ̆ trong lu bơngai kơnê̆, kơchăng kơ dôm nơ̆r pơhlŭ pơlung lu bơngai kơnê̆, jơ̆ tơm păng jơhngơ̆m pran gah bơhngol wă kơ ưh kơ kiơ̆, ưh kơ oei, ưh kơ ngôi hơdai hăm lu bơngai yoch. Mă khan bơngai đei Kră Yang ăn pŭn hiôk kư̆m oei rơdu tơrăn, ‘bônh kơ pơ̆k kơtơih pơm glăi mălei lu sư ưh kơ wă năm lăm trong lu bơngai yoch dah mă môch glơ̆k lăm tơdrong yoch hloi ôh, mălei ling lang gơnang kơ nơ̆r Kră Yang bơtho khă, hơmet ming jơhngơ̆m, bơtho tơ’bôh wă kơ tơbral na gơh đei tơdrong mơnat ăn đơ̆ng Kră Yang păng khŏm yak năm hăm Kră Yang dơ̆ng wă kơ đei pŭn hiôk.
Bơngai lui đei đon lui tơpă gô ‘mêm kơ Kră Yang, ‘maih pơjing tơdrong tơ’bưh kơjăp hăm Sư. Hơdrol hloh ‘măn jơ hơdrô̆ tơ’bưh hăm Kră Yang, lăm minh anih hơđơ̆ng wă đŏk păng tơchĕng pơwao nơ̆r Kră Yang. Tơchĕng ‘măn jơ hơdrĭ hăm Kră Yang rim năr ba bơ̆n năm jê̆ Kră Yang, mơn ‘bôh tơdrong oei hơdai, tơdrong chông anhăk păng tơdrong dŏng tơgŭm trŏ lăp đơ̆ng Sư wă kơ bơ̆n đei pŭn hiôk đơ̆ng Kră Yang ăn.
Ơ Kră Yang, inh ‘mêm kơ Ih, inh kăl kơ đei tơdrong dŏng tơgŭm đơ̆ng Ih lăm chăl arih. Apinh nơ̆r Ih chông anhăk inh yak năm wei inh huay kơ kiơ̆ trong lu bơngai kơnê̆, păng weh ataih đơ̆ng tơdrong yoch, wă kơ dôm tơdrong tơchĕng, pơm păng nơ̆r pơma inh ling lang kiơ̆ thoi Ih lăp đon. Krao khan yua anăn Kră Yang Yêsu Krist, Amen.
Hơdrol hloh lu bơ̆n hăm đei ‘măn jơ tơchĕng pơwao nơ̆r Kră Yang rim năr ưh?
Đŏk Sơ̆p Hla bơar ‘Bok Kei-Dei lăm pêng sơnăm: Jêrêmi 10.
Kênh Youtube BHKTHN:
