Blŭng a 1:26-27
“Kră Yang ‘Bok Kei-Dei đei pơjing kon bơngai hơbŏ thoi rup Sư kơdih; Sư pơjing kon bơngai hơbŏ nhen thoi Kră Yang ‘Bok Kei-Dei; Sư pơjing bơngai drŏ-nglo păng bơngai drŏ-kăn.” (Blŭng a 1:27)
Nơ̆r jet tơchĕng pơwao:
– Kră Yang ‘Bok Kei-Dei pơjing kon bơngai thoi yơ?
– Kon bơngai đei pơjing hơbŏ thoi rup Kră Yang wă khan kiơ?
– Pơhrăm băt tơdrong âu đei ‘bơm tơdrong arih bơ̆n thoi yơ?
Đơ̆ng rŏng kơ ‘Bok Kei-Dei pơjing plĕnh teh, plĕnh păng teh ‘bĕnh ‘bang kơ tơmam đơ̆ng Sư đei pơjing, đơ̆ng lu sem păr tơ kơpal plĕnh, ka lăm đak dơsĭ, truh tơ kon sem brem arih tơ bri brah, Kră Yang ‘Bok Kei-Dei đei pơjing kon bơngai. Tơdrong pơjing ‘noh ưh kơ trŏ thar pơjing đĕch ôh, mălei đei kơnhăm rơđah hơđăl kơplah Pêng ‘nu Yang ‘Bok Kei-Dei hơdai pơjing kon bơngai. “Bĕ lu bơ̆n pơjing kon bơngai (trong 26). Lăm kơplah dôm tơmam arih nai Kră Yang đei pơjing “kiơ̆ kơ adrĕch”, lei tơdrong pơjing kon bơngai phara hloh kơ đĭ đăng. “Kră Yang ‘Bok Kei-Dei đei pơjing kon bơngai hơbŏ thoi rup Sư kơdih; Sư pơjing kon bơngai hơbŏ nhen thoi Kră Yang ‘Bok Kei-Dei; Sư pơjing bơngai drŏnglo păng bơngai drŏkăn (trong 27). Kon bơngai ưh kơ trŏ kơ tơmam arih thoi lu tơmam nai mă Kră Yang đei pơjing. Kon bơngai thoi rup Kră Yang ‘Bok Kei-Dei. Minh tơdrong đei khan dơ̆ng noh Kră Yang pơjing kon bơngai đei ‘bar ‘nu phara – drŏnglo păng drŏkăn păng ‘bar ‘nu bre sư hơbŏ thoi rup Kră Yang ngăl.
Kon bơngai Kră Yang pơjing “hơbŏ thoi rup Kră Yang ‘Bok Kei-Dei.” Ưh kơ trŏ khan kon bơngai lei lăi hăm Kră Yang gah akâu akar păng akâu jăn yua kơ Kră Yang ‘Bok Kei-Dei Sư Yang tơpă ưh kơ đei akâu (Yôhan 4:24). “Hơbŏ thoi rup Kră Yang ‘Bok Kei-Dei” wă pơma tơdrong kon bơngai nhen thoi Kră Yang ‘bơ̆t anih đei tơdrong gĭt găl hloh kơ dôm tơmam nai. ‘Nguaih kơ kon bơngai, ưh kơ đei tơmam ayơ nai gơh đei dôm tơdrong ‘lơ̆ng rŏ Kră Yang thoi kơ tơdrong gơh hơgei, ‘lơ̆ng rơgoh ‘lơ̆ng tơpăt, ‘mêm mơnat… kon bơngai đei tơdrong tơchĕng, păng đei tơdrong rơngei, gơh rơih iŏk pơm dah rơih iŏk kuă kơ pơm, gơh tơ’bưh păng kơkuh kơ Kră Yang ‘Bok Kei-Dei. Đơ̆ng noh, kon bơngai kư̆m đei Kră Yang pơjao tơdrong jang “pơgơ̆r” đĭ đăng dôm tơmam mă Sư đei pơjing (trong 26).
Kon bơngai bơih hơbŏ thoi rup Kră Yang, bơ̆n đei tơdrong gĭt păng đei kơnhăm tơdrong arih kăl dêh. Đĭ đăng bơngai tơ ala teh âu, ưh kơ đei pơdê kơ akar phara, nơ̆r pơma, tơdrong gơh hơgei, bơngai thoi yơ, sơnăm ‘lơ̆p ‘lŏ, tơdrong jang… đĭ đăng Kră Yang lăng gĭt kăl ngăl. Pơhrăm băt tơdrong âu, rim ‘nu lu bơ̆n athei lăng gĭt tơdrong arih bơ̆n kơdih păng gĭt kơ đĭ đăng bơngai jum dăr bơ̆n. Đơ̆ng noh, yua kơ bơ̆n hơbŏ thoi rup Kră Yang, tơdrong arih lu bơ̆n athei pơchrang tơdrong ‘lơ̆ng rŏ Sư. Bơ̆n athei ‘mêm kơ bôl buăl thoi Kră Yang ‘mêm kơ bơ̆n. ‘Nĕ kơ jô̆ yo kơ đe thoi Kră Yang huay kơ jô̆ yo kơ bơ̆n, păng athei ‘lơ̆ng rơgoh yua kơ Kră Yang ‘lơ̆ng rơgoh, wă kơ đe nai lăng tơdrong arih lu bơ̆n, lu sư gô lăng ‘bôh rup ‘lơ̆ng rŏ Tơ’ngla pơjing ‘noh lăm bơ̆n.
Ơ Kră Yang, inh bơnê kơ Ih yua kơ Ih pơjing hơbŏ thoi rup Ih; kon bơngai gĭt tơpă đei bơhngol păng tơdrong arih đei kơnhăm rơđah hơđăl. Apinh Ih bơtho inh băt gĭt kơ tơdrong arih inh kơdih păng gĭt kơ tơdrong arih bơngai nai. Apinh Ih tơgŭm inh tơ’bôh tơdrong ‘lơ̆ng rơgoh, tơdrong ‘mêm păng tơdrong mơnat Ih wă kơ lơ bơngai ‘bôh Ih lăm tơdrong arih inh. Yua anăn Kră Yang Yêsu Krist, Amen.
Lu bơ̆n oei tơ’bôh rup Kră Yang ‘Bok Kei-Dei thoi yơ lăm tơdrong arih bơ̆n rim năr?
Đŏk Sơ̆p Hla bơar ‘Bok Kei-Dei lăm pêng sơnăm: Jêrêmi 8
Kênh Youtube BHKTHN:
