Chivkeeb 1:26-27
Nqe cim:
“Yog li ntawd, Vajtswv thiaj tsim neeg, kom lawv muaj yam ntxwv zoo li Vajtswv ntag. Nws tsim muaj tus txivneej thiab tus pojniam.” (Chivkeeb 1:27)
Lus nug rau sawvdaws xav:
– Vajtswv tsim neeg zoo li cas?
– Tibneeg tau tsim raws Vajtswv tus yamntxwv muaj lub ntsiab li cas?
– Kawm paub qhov no pab tau peb lub neej li cas?
Tom qab uas tsim tau lub ntuj lub ntiajteb thiab txhua yam nroj tsuag xyoob ntoos, tej hnub ya saum nruab ntug, ntses hauv hiavtxiav, tsiaj nyeg tsiaj qus, Vajtswv thiaj tsim tibneeg. Qhov uas tsim muaj tej no tsis yog lam tsim, tiamsis Vajtswv Vaj Peb Leeg muaj homphiaj meej tseeb nrog rau kev tsim tibneeg, “Nimno peb yuav tsim neeg kom muaj yam ntxwv zoo li peb” (nqe 26). Hauv txhua yam uas Vajtswv tsim “raws li tsheej hom”, ces qhov kev tsim tibneeg nws tshwjxeeb heev, “Vajtswv thiaj tsim neeg, kom lawv muaj yam ntxwv zoo li Vajtswv ntag. Nws tsim muaj tus txivneej thiab tus pojniam.” (nqe 27). Tibneeg tsis yog ib yam uas tau tsim zoo li txhua yam uas Vajtswv twb tau tsim muaj xwb. Ib qho tseemceeb uas Vajtswv tsim neeg yog muaj pojniam thiab txivneej – thiab nkawd puavleej muaj yam ntxwv zoo li Vajtswv ib yam nkaus.
Tibneeg tau tsim “muaj tus yam ntxwv zoo li Vajtswv” tsis tau txhais tias tibneeg zoo li Vajtswv los ntawm sab nqaij tawv thiab tus duab, vim Vajtswv yog ntsujplig qhov muag ntsia tsis pom (Yauhas 4:24). “Zoo li Vajtswv” yog hais txog qhov uas tibneeg tseemceeb dua tej uas tau tsim muaj los. Dhau ntawm tibneeg, tsis muaj ib yam uas yuav muaj qhov zoo li Vajtswv xws li paub xav, dawbhuv, ncaj ncees, sib hlub… Tibneeg muaj kev xav, paub thiab muaj kev ywjpheej, muaj qhov kev sib txuas thiab pehawm Vajtswv, dua li ntawd, tibneeg kuj tau Vajtswv muab lub meejmom “kav” txhua yam uas Nws tsim (nqe 26).
Yog cov uas muaj tus yam ntxwv zoo li tus Tswv, peb muaj qhov zoo thiab muaj homphiaj ua neej. Tagnrho txhua tus neeg uas nyob hauv ntiajteb no, tsis hais haivneeg twg, hais yam lus twg, kev coj noj coj ua, mojyam, hnub nyoog, meejmom…, puavleej muaj nqis rau Vajtswv. Kawm paub qhov no, peb txhua tus yuav tsum saib kev ua neej kom muaj nqis rau yus thiab txhua tus neeg uas nyob ib ncig peb. Dua li, vim peb zoo li Vajtswv, peb txojkev ua neej yuav tsum qhia tshwm Nws lub tshwj chim. Peb yuav tsum muaj kev hlub zoo li Vajtswv hlub, zam txim zoo li Vajtswv zam, thiab yuav tsum dawbhuv vim Vajtswv yog tus dawbhuv, kom lwm tus ntsia peb kev ua neej, lawv yuav pom tus uas tsim peb qhov zoo, lub hwjchim.
Thov Vajtswv,
Tus Tswv, nyuam yaus ua Koj tsaug vim Koj tsim nyuam yaus muaj tus yam ntxwv zoo li Koj, muaj nqis, tseemceeb thiab muaj homphiaj ua neej. Thov Koj qhia kom nyuam yaus saib qhov no tsim txiaj rau nyuam yaus thiab lwm tus. Thov Koj pab kom nyuam yaus ua neej qhia tawm txojkev dawbhuv, kev hlub thiab koob hmoov hlub kom lwm tus pom Vajtswv. Nyuam yaus tuav Tswv Yexus lub npe thov. Amees.
Peb tabtom qhia tshwm Vajtswv tus yam ntxwv zoo li cas los ntawm peb kev ua neej txhua hnub?
Nyeem Vajluskub hauv peb lub xyoo: Yelemis 8
Kênh Youtube BHKTHN:
