Nêhêmi 1:1-11
“Inh apinh Ih lăng păng đon Ih mơ̆ng nơ̆r krao khan inh bơngai đĭch đam Ih, dang ei inh oei krao khan rim năr rim măng yua kơ adrĕch Isơrael, lu đĭch đam Ih, oei ‘bơ̆t anăp Ih păng roi tơbral dôm tơdrong yoch kon pơlei Isơrael mă lu nhôn pơm glăi bơih hăm Ih, inh păng hnam dơnŏ ‘bok inh kư̆m pơm yoch” ( Nêhêmi 1:6)
Nơ̆r jet tơchĕng pơwao:
– ‘Bok Nêhêmi đei pơm kiơ kơplah sư kơtơ̆ng đơ̆ng ‘bok Hanani?
– ‘Bok Nêhêmi đei krao khan thoi yơ ăn kơ adrĕch adrŭng sư?
– Lu bơ̆n kăl kơ pơm kiơ wă kơ adrĕch adrŭng bơ̆n đei lơ bơngai gơh klaih?
Đơ̆ng rŏng kơ kon pơlei Isơrael đe puh păng wih brŏk, ‘bok Nêhêmi oei oei lăm hnam pơtao, pơm ‘bok kuan glơng tơdrô ăn kơ pơtao ‘Ba tư. Mă khan đei pơtao lui gơnang păng ‘mêm kơeng, mă lei jơhngơ̆m sư oei ‘blŏk kơ adrĕch adrŭng sư măng năr păng pơlei Jêrusalem. Yua thoi noh, sư ling lang jet gia wă kơ băt tơdrong kơplah lu bơngai đơ̆ng kon pơlei sư năm tơ dêh ‘Ba tư, păng băt kơ kon pơlei sư oei “ đei tơdrong đe pơm kơnê̆ pơ’brơh dêh; păng dur pơlei Jêrusalem pơchah pơchek đĭ…”(tr.3). Dôm nơ̆r lu sư ră roi dôm tơdrong đei truh pơm ăn kơ ‘bok Nêhêmi sơ’ngon truh rơ mah “ hơoei nhơ̆m hmoi grong lăm hơdôm năr, inh ơ̆t kơ sŏng sa krao khan kơ Kră Yang ‘Bok Kei-Dei hơtăl plĕnh” (tr.4).
Mă khan oei tơ anih mơdrŏng mă lei ‘bok Nêhêmi ưh kơhiơt kơ pơlei pơla kơdih, sư oei ‘blŏk ling-lang kơ sư jơ̆ bơngai Isơrael kon pơlei Kră Yang. Sư pơtơm krao khan adrĕch adrung sư hăm nơ̆r bơnê kơkuh kơ “ Kră Yang ‘Bok Kei-Dei tih hloh păng trŏ kơ kơkuh Tơ’ngla wei nơ̆r pơgơ̆p păng jơhngơ̆m ‘mêm mơnat kơ lu bơngai mă kơkuh ‘mêm kơ Sư, păng wei răk dôm nơ̆r tơtă đơ̆ng Sư” (tr.5). Đơ̆ng rŏng kơ noh sư pơm tơ’bôh tơdrong tơjur akâu kơdih, băt nhen tơdrong yoch kon pơlei, lăm noh đei sư, wă krao khan apinh Kră Yang mơnat ăn đơ̆ng Kră Yang roi tơdrong yoch sư kơdih, ‘nhŏng oh sư, adrĕch adrŭng sư (tr.6). Lăm nơ̆r krao khan, ‘bok Nêhêmi băt mơn kơdih sư, adrĕch adrŭng sư “ đei pơm yoch kơnê̆ dêh, ưh kơ wei răk nơ̆r Ih tơtă păng tơdrong juăt Ih đei bơtho khan bơih kơ ‘bok Môis, đĭch đam Ih” (tr.7) na đei pơpuh tơweh, lu kon pơlei mă oei oei, oei lăm tơdrong đe pơgŏ pơđep, yua ưh kơ đei dur bơwei . ‘Bok Nêhêmi apinh Kră Yang blŏk dơ̆ng kơ Nơ̆r Sư đei khan kơ ‘bok Môis: “Mă lei tơdah lu iĕm wih brŏk tơInh, wei răk pơm kiơ̆ dôm tơdrong Inh tơtă, mă khan lu iĕm tơklah tơklang jrok oei tôch kơ plĕnh teh, Inh kư̆m gô krao akŭm lu sư brŏk, păng Inh gô chông anhăk lu sư truh tơ anih Inh mă hơmet lê̆ bơih wă kơ Anăn Inh kư̆m oei tơnoh mơ̆n” (tr.9). Nơ̆r Kră Yang pơkă tơgŭm sư đei jơhngơ̆m pran krao khan apinh Sư ăn pŭn hiôk kơ tơdrong sư chă đon gpơh wih brŏk tơiung ming dur pơlei Jêru salem.
Khul Boangai dang ei ưh kơsĭ kơdrô̆ krao khan păng krao apinh kơ bơ̆n kơdih mă lei kư̆m athei ‘blŏk kơ krao khan kơ teh đak, adrĕch bơ̆n kơdih. Lu bơ̆n krao apinh Kră Yang mơnat ăn tơdrong yoch, pơdrŭt jơhngơ̆m kon pơlei Kră Yang pran lăm tơdrong jang năm chă bơtho Tơdrong ‘Nao ‘Lơ̆ng, păng apinh Kră Yang ăn kơ lơbơngai gơh klaih đơ̆ng bơ̆n krao khan tang păng pơm kơdranh kơ lu sư.
Ơ Kră Yang, apinh mơnat kơ inh, yua kơ inh tam mă đĭ jơhngơ̆m krao khan păng pơm kơdranh kơ adrĕch adrŭng inh, apinh Ih pơdrŭt jơhngơ̆m inh păng wă kơ lơ bơngai adrin krao khan păng năm ră roi Tơdrong ‘Nao ‘Lơ̆ng kơ,adrĕch adrŭng inh wă kơ lơ bơngai gơh klaih.Yua anân Kră Yang Yêsu Krist, Amen.
Lu bơ̆n oei krao khan thoi yơ kơ adrĕch adrŭng bơ̆n kơdih?
Đŏk Sơ̆p Hla ar ‘Bok Kei-Dei lăm pêng sơnăm: Tơdrong Pơđơ̆k 28
Kênh Youtube BHKTHN:
