Tơdrong Pơđơ̆k 24:30-34
“Tep ‘biơ̆ pơdơh ‘biơ̆, Kuăr ti ‘biơ̆. Lei tơdrong dơnuh gô truh kơ ih thoi bơngai ayăt. Păng tơdrong kơ’bah gô truh thoi bơngai chĕp tơmam tơblah oei tơblah.” (Tơdrong Pơđơ̆k 24:33-34)
Nơ̆r jet tơchĕng pơwao:
– Lĕch yua kơ đơ̆ng alah ‘noh kiơ?
– Lu bơ̆n alah dah adrin pơnam pơm keh Nơ̆r Kră Yang Tơtă?
– Lu bơ̆n kăl kơ tơplih thoi yơ đơ̆ng tơdrong tơchĕng truh tơdrong bơ̆n pơm lăm tơdrong pơkeh nơ̆r tơtă Kră Yang pơjao?
Pơtao Salômôn đei bơtho dôm tơdrong mă Sư đei iŏk gah tơdrong lĕch yua đơ̆ng tơdrong alah. “Bơngai kuă kơ jang” wă pơma tơ’bôh kơ bơngai alah, đei jơ lei lăi “bơngai kơtul”, wă khan bơngai ưh kơ gan hlôh, lu bơngai âu ưh kơ wă jang thoi noh alah kơ tơchĕng, ưh kơ hlôh băt tơdrong pơmat ‘mơ̆i, wei rong, wei rong gô yuă iŏk đei yua đơ̆ng tơdrong jang. Yua kơ thoi noh, bơngai alah sư pơhiơ̆ tơdrong jang ba ăn đơ̆ng rŏng kơ noh pơm kơ pơgar hơmu trŏ kơ đei plei, plei ‘ngam, mălei pơm kơ pơgar ‘bĕnh kơ ‘nhĕt jơla; trŏ kơ mir na ‘noh bơwei pơ’lơ̆ng, mălei jing ưh kơ yua kiơ, dur pơgar pơchah răm. Kơplah yak năm brih kơ mir pơgar bơngai alah. Pơtao Sôlômôn lăng hơlen, đơ̆ng blŭng a lăng “bôh” đơ̆ng noh “tơchĕng tơtăm”, “’bôh păng đei iŏk” păng tuch luch sư đei bơtho dôm tơdrong “Tơdrong bơtho” đei yua ăn kơ kon sư. Sư đei ‘bôh minh tơdrong juăt lăm chăl arih ‘noh jơ̆ bơngai alah, pơhiơ̆ tơdrong jang gô iŏk tơdrong dơnuh tĕnh tĕnh, dêh tơpă thoi bơngai tơtông tơgar tơmam năm jrok tơ anăp pran dêh. Nơ̆r pơdơh ‘biơ̆, tep ‘biơ̆, kuăr ti pơdơh ‘biơ̆” tơdrong tơ’bôh ăn hiơ̆ hyĭn, pơhiơ̆, alah kơ jang; ưh kơ đei layơ wă kơchăng hăm bơngai tơtông tơgar păng lu sem bri pơrăm tơmam. Bơngai alah ba truh tơdrong lĕch yua noh chăl arih kơ’bah kơ’bôch, dơnuh hin, ưh kơ keh jing.
Gah tơdrong sĕch akar, tŏ sĕt đĕch lu kon Kră Yang alah lăm tơdrong jang na jing dơnuh hin pơmat tat, mălei gah bơhngol, đei lơ bơngai lăm lu bơ̆n oei pơhiơ̆ wă pơkeh nơ̆r Tơtă Kră Yang wă bơtho Tơdrong ‘Nao ‘Lơ̆ng Kră Yang Yêsu. Truh jơ năr lu bơ̆n “lăng ‘bôh, ‘blŏk tơchĕng, ‘bôh păng băt kơnăl” dôm tơdrong yoch glăi lu bơ̆n wă kơ gơh hơmet ming dơ̆ng.
‘Bok Môis đei khan: “Sơnăm lu nhôn kư̆m lăp truh tơpơh jĭt, dah đei pran ‘biơ̆ truh tơ tơhngam jĭt…” (Hơriso 90:10). Pơtih dah bơ̆n arih truh tơ tơpơh jĭt sơnăm, rim năr jang 8 jơ, minh giĕng 6 năr, păng đei dang 40 sơnăm jang. Dah bơ̆n tơchĕng rŏ kơ thoi noh, lei lu bơ̆n đei dang 12 sơnăm wă bơ̆jang lăm chăl arih. Mă khan thoi ei ră, ưh kơ đei bư gơh weh wer kơ tơdrong jĭ jăn athei pơdơh, phĕt sơnăm ‘nao.v.v… Tuch luch, bơngai arih 70 sơnăm, tôch ai, dang tơhngam, tơsĭn sơnăm tơpă đei jang. Jơ ‘năr arih kơ đeh dêh! Athei mă kơchăng, ưh kơ hơgei lu bơ̆n gô jing bơngai “dơnuh, bơngai alah, kơtul bơlŭk” Kơplah lu bơ̆n pơhiơ̆ tơdrong jang Kră Yang pơjao, nơ̆r Kră Yang khan: “Bơ̆n adrin jang tơdrong Kră Yang tôch bơneh kơ bơ̆n jang” (Rôm 12:11).
Kơkuh kơ Ih Kră Yang, inh bơnê kơ Ih lôch yua kơ tơdrong yoch inh. Apinh Yang Bơhngol ‘Lơ̆ng tơ’blŏk păng ăn kơ inh mơsêh pran wă kơ inh pơnam tơdrong jang. Apinh tơgŭm inh wă huay kuă kơ jang păng pơhiơ̆ nơ̆t tơtă Kră Yang pơjao, chă năm bơtho Tơdrong ‘Nao ‘Lơ̆ng kơ lơ bơngai băt kơ Kră Yang. Yua anăn Kră Yang Yêsu Krist, Amen.
Lu bơ̆n hăm pơnam, adrin hăm nơ̆r Kră Yang tơtă Kră Yang pơjao păng tơdrong jang băt chă đon ưh?
Đŏk Sơ̆p Hla bơar ‘Bok Kei-Dei lăm pêng sơnăm: II Hơ’mon 32
Kênh Youtube BHKTHN:
