I Petus 1:13-16
Nqe cim:
“Yav tas los thaum nej tseem tsis tau paub Vajtswv, nej niaj hnub nyiam ua txhaum, tiamsis nimno nej yuav tsum mloog Vajtswv lus, nej tsis txhob cia tej kev phem kev qias kav nej lub siab.” (I Petus 1:14)
Lus nug rau sawvdaws xav:
– Tus Tswv cov menyuam uas mloog lus yuav tsum ua neej li cas?
– Vim li cas cov menyuam uas mloog lus yuav tsum dawbhuv hauv lawv tus cwjpwm thiab kev coj noj coj ua?
– Vajtswv Txojlus txhawb peb ua neej li cas thiaj tsimnyog hu ua cov menyuam uas mloog Nws lus?
Thaum tseem tos hnub uas Tswv Yexus Khetos rov los, Timthawj Petus qhia rau cov ntseeg uas yog neeg Yudais thiab lwm haiv neeg uas tawg mus nyob rau ntau qhov chaw hais tias, lawv yuav tsum ua neej kom tsimnyog hu ua cov “menyuam uas mloog lus.” Timthawj Petus siv lo lus no los hais tim rau “cov neeg uas tsis mloog Vajtswv lus” (Efexus 2:2). Qhov xubthawj, cov menyuam uas mloog lus yuav tsum tu lub siab zoo zoo tos, kub siab lug ua lub neej kom haum Vajtswv siab thiab cia siab ntsoov rau Vajtswv txoj koob hmoov (nqe 13). Qhov ob, cov uas yog menyuam nyob hauv Vajtswv tsev neeg, yog cov uas twb hloov dua tshiab lawm, ces yuav tsum tsis txhob cia tej kev phem kev qias kav lub siab, yog tej uas yav tas los thaum peb tseem tsis tau paub Vajtswv pheej ua (nqe 14). Qhov peb, yuav tsum ua neeg dawbhuv rau txhua yam uas peb ua, rau qhov Vajtswv tus uas tau hu peb los ua nws haivneeg, yog tus uas dawbhuv(nqe 15).
Nyob hauv lub meejmom ua cov menyuam mloog lus, cov ntseeg tseem yuav tsum vamkhom tus Tswv lub zog kom ua tau lubneej dawb huv txhua hnub. Vim txawm twb los ua Vajtswv cov meyuam lawm los, cov ntseeg yeej tseem nyob hauv txojcai “thaum xav ua qhov zoo, ho xaiv ua qhov phem” (Loos 7:21). Kev ua neej dawb huv yog kev ua tabpov rau lub meejmom ua Vajtswv cov menyuam uas mloog lus. Ntawd kuj yog povthawj tseeb tshaj plaws hais tias Tus uas peb ntseeg yog Tus Dawbhuv, Vajtswv Txojlus hais tias: “Nej yuav tsum ua neeg dawbhuv rau qhov kuv yog tus uas dawbhuv” (nqe 16). Lub neej dawbhuv yuav tsum yog lub homphiaj uas cov ntseeg tsom ntsoov rau, vim “Peb tsuas paub hais tias thaum Yexus Khetos rov qab los, peb yuav zoo li nws, rau qhov peb yuav pom tseeb hais tias nws zoo li cas tiag” (I Yauhas 3:2b). Tsis txhob muaj leejtwg uas twb los ua Vajtswv cov menyuam lawm los tseem tso nws tus kheej mus raws li tej kev ntshaw phem ib yam li thaum tseem tsis tau paub tus Tswv.
Vajtswv Txojlus txhawb peb lub zog tuav ruaj kev ntseeg mus ntxiv, qaij deb kev txhaum, ua neej tsimnyog qhov uas yog Vajtswv cov menyuam uas mloog lus. Nyob hauv lub neej no, kev txhaum thiab tej yam uas tsis haum Vajtswv siab yeej tseem pheej lo thiab ntxias kom peb mus raws qab. Hos tus ntseeg yeej vamkhom tsis tau tus kheej lub zog los ua neej dawb huv thiab mloog Vajtswv lus. Vim li ntawd, Vajtswv cov menyuam yuav tsum nrhiav Vajtswv ntau dua los ntawm kev thov Vajtswv, kawm Vajluskub nrog nplooj siab nqhis nqhawv, qaij deb kev txhaum,… Vaj Ntsujplig yuav pab kom peb ua neeg dawb huv txhua hnub mus ntxiv, ua rau Vajtswv tau koobmeej, thiab tos txais qhov khoom plig puv npo hnub uas Tswv Yexus Khetos tshwm los.
Thov Vajtswv,
Tus Tswv uas yog nyuam yaus Leej Txiv tus uas muaj kev hlub thiab dawb huv, thov pab nyuam yaus niaj hnub nco ntsoov tias nyuam yaus yog Koj tus me nyuam uas mloog lus, kom nyuam yaus ua tau lub neej dawb huv hauv txhua tes haujlwm. Thov ntxiv lub zog rau nyuam yaus kom ua tau lubneej dawb huv mus txog hnub uas ntsib Koj. Nyuam yaus tuav Yexus Khetos lub npe thov, Amees.
Peb tabtom qhia tshwm lub neej ntawm tus Tswv ib tug menyuam uas mloog lus licas?
Nyeem Vajluskub hauv peb lub xyoos: II Xwmtxheej 33
Kênh Youtube BHKTHN:
