Klei Aê Diê Blŭ: Klei Bi Hriêng 24:30-34
Êlan kliăng: “Pĭt ƀiă, mdei ƀiă, kuăl kngan čiăng pĭt ƀiă, snăn klei ƀun ƀin srăng truh kơ ih msĕ si sa čô mnuih knĕ, leh anăn klei kƀah msĕ si sa čô mnuih djă mnơ̆ng bi blah.” (Klei Bi Hriêng 24:33-34)
Klei êmuh ksiêm mĭn: Ya jing boh jhat mơ̆ng mnuih alah? Drei dôk alah amâo dah hur har hlue ngă klei Khua Yang mtă? Si brei drei bi mlih mơ̆ng klei mĭn truh kơ bruă ngă hlăm klei hlue ngă bruă Khua Yang jao?
Mtao Salômôn kah mbha kơ klei ñu thâo kơ boh jhat mơ̆ng mnuih alah. “Mnuih alah” čiăng lač kơ mnuih alah, yap mbĭt hŏng “mnuih mluk”, jing mnuih amâo mâo klei thâo mĭn. Phung anei amâo čiăng mă bruă ôh kyua anăn alah bi mĭn, amâo thâo săng ôh ai tiê dleh dlan duh hruê mmông kriê dlăng srăng wiă boh tŭ kơ mnơ̆ng dhơ̆ng êdei anăp. Kyua anăn, phung alah bi kdung leh bruă knuă ngă truh kơ boh jhat hlăm đang boh kriăk ƀâo hrô kơ boh tŭ jăk, lŏ jing hĕ êruê pam tar ƀar hma; hrô kơ kdrăn lŏ dưi răng mgang bi jăk, jing leh anôk êruê ana guôm lăn, mnư̆ boh tâo klưh. Tơdah êbat găn kdrăn lŏ phung alah, Mtao Salômôn ksiêm dlăng, mphŭn mơ̆ng klei “ƀuh”, leh anăn truh kơ klei mđing uêñ “ksiêm mĭn”, “ƀuh leh anăn ksiêm mĭn”, leh anăn knhal tuč kah mbha leh “klei hriăm” tŭ dưn kơ anak. Ñu ƀuh sa klei bhiăn hlăm klei hdĭp jing mnuih alah, bi kdung bruă knuă srăng tŭ mă klei ƀun ƀin pral snăk, msĕ si sa čô mnuih knĕ, leh anăn klei kƀah msĕ si sa čô mnuih djă mnơ̆ng bi blah. Boh blŭ “Pĭt ƀiă, mdei ƀiă, kuăl kngan čiăng pĭt ƀiă” bi êdah sa klei bi kdung, alah mă bruă; kƀah klei răng hŏng phung knĕ leh anăn hlô mnơ̆ng bi rai. Phung alah srăng atăt truh kơ boh jhat jing klei hdĭp kƀah lu mta, ƀun ƀin, amâo mâo tŭ jing.
Hlăm klei hdĭp kđeh, mâo ƀiă phung ƀuôn sang Aê Diê alah hlăm bruă knuă tơl jing ƀun ƀin, ƀiădah hlăm klei hdĭp myang, mâo lu phung drei bi kdung leh hlăm bruă hiu hưn Klei Mrâo Mrang Jăk Khua Yang Yêsu. Truh leh mmông brei drei “dôk dlăng, leh anăn ksiêm mĭn, ƀuh leh anăn kâo hriăm” ya klei soh pô čiăng lŏ mkra wĭt.
Y-Môis lač leh: “Thŭn hmei dôk hdĭp mâo kjuh pluh thŭn, năng ai phung ktang mâo sa păn pluh thŭn…” (Klei Mmuñ Hđăp 90:10). Tơdah drei knŏng hdĭp kjuh pluh thŭn, grăp hruê mă bruă 8 mmông, grăp hruê kăm 6 hruê, leh anăn mâo hlăm brô 40 thŭn mă bruă. Tơdah bi mĭn snăn drei mâo giăm 12 thŭn čiăng mă bruă hlăm klei hdĭp. Khădah snăn, amâo mâo ôh hlei pô tlaih mơ̆ng klei ruă duam brei đih mdei, knăm mơak Têt… Knhal tuč, mnuih hdĭp 70 thŭn, jih hnơ̆ng knŏng adôk hlăm brô sa păn, dua păn thŭn klă sĭt mă bruă. Hruê mmông drei bhiâo snăk! Brei thâo srăng, huĭdah drei srăng jing hĕ phung mnuih “ƀun ƀin, alah, amâo mâo klei thâo mĭn” tơdah drei dôk bi kdung bruă Khua Yang jao. Klei Aê Diê Blŭ lač: “Brei diih hur har, đăm alah ôh. Brei diih mă bruă kơ Khua Yang hŏng jih ai tiê” (Rôm 12:11).
Drei kriăng, hur har hŏng bruă klam Aê Diê jao leh anăn bruă knuă čiăng hdĭp mda mơ̆?
Wah lač: Ơ Khua Yang, kâo bi mni kơ Ih djiê hrô leh kyua klei soh kâo. Akâo kơ Yang Mngăt Jăk mñă leh anăn brei kơ kâo klei ktang čiăng kơ kâo kriăng hlăm djăp mta bruă. Akâo kơ Ih đru kâo amâo alah bi kdung hlue ngă bruă klam Khua Yang jao, hiu hưn Klei Mrâo Mrang Jăk kơ lu mnuih thâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Klei Yăl Dliê 32
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
