Klei Aê Diê Blŭ: Klei Mphŭn Dơ̆ng 1:20-25
Êlan kliăng: “Ơ Yêhôwa, bruă ih lu êdimima! Ih ngă diñu jih hŏng klei thâo mĭn; lăn ala bŏ leh hŏng mnơ̆ng ih hrih” (Klei Mmuñ Hđăp 104:24)
Klei êmuh ksiêm mĭn: Si Aê Diê hrih mjing leh dŭm mta mnơ̆ng hdĭp? Ya klei mdê hjăn Ñu hrih mjing phung čĭm hlăm adiê, kan hlăm êa ksĭ, hlô mnơ̆ng? Si klei mđĭ ai drei tơdah ƀuh lăn ala mâo bŏ hŏng mnơ̆ng dhơ̆ng Aê Diê hrih mjing?
Leh bi bŏ adiê hŏng lu boh mngač, hlăm hruê hrih mjing tal êma leh anăn tal năm, Aê Diê lŏ dơ̆ng bi bŏ hlăm wăl adiê, êa ksĭ leh anăn lăn ala hŏng djăp mta mnơ̆ng dhơ̆ng hdĭp. Hlăm wăl adiê, djăp mta čĭm čap phiơr liŏ hŏng lu êa mil jăk siam snăk, djăp mta mnơ̆ng điêt, prŏng mdê mdê Ñu hrih mjing, Hlăm êa krông, êa ksĭ Aê Diê hrih mjing mnơ̆ng dhơ̆ng hdĭp, dơ̆ng mơ̆ng mnơ̆ng điêt dhiêt ală anak mnuih dleh dưi ƀuh, truh kơ kan êman mtah prŏng snăk luê hlăm êa. Bi ti rŏng lăn ala Aê Diê bi bŏ hŏng hlô dliê tui si mta diñu, leh anăn hlô mnơ̆ng rông tui si mta diñu, leh anăn jih jang mnơ̆ng êbat ban ti lăn tui si mta diñu (êlan 21, 25).
Klei Aê Diê hrih mjing yuôm bhăn snăk, lu jơr leh anăn mâo pruê̆. Lăn ala amâo djŏ jing anôk mkra mjing prŏng prĭn kơ dŭm mta mnơ̆ng dhơ̆ng dưi bi lar hŏng klei mjing sa anăn đuč ôh. Ƀiădah anăn jing lu mnơ̆ng hdĭp lar êngŭm, lu jơr, êa mil mdê mdê ti lăn ala mâo lu mta mnơ̆ng hdĭp dleh dưi thâo săng. Aê Diê brei mnơ̆ng hdĭp mđai bi lar êngŭm, bi bŏ êa ksĭ, leh anăn brei čĭm bi lar êngŭm ti lăn ala (êlan 22). Čĭm srăng kčeh boh jing čĭm, kan jing kan, hlô mnơ̆ng mđai hlô mnơ̆ng. Djăp mta mnơ̆ng dhơ̆ng hdĭp hrih mjing leh anăn lar êngŭm “hlue si mta”. Boh blŭ anei mñă klă brei ƀuh Khua Yang mkŏ mjing dŭm kdriêl anôk kơ klei hdĭp dưi mđĭ lar nanao djŏ pruê̆, rơ̆ng kơ klei Ñu hrih mjing êđăp ênang leh anăn lar êngŭm.
Ksiêm dlăng boh lăn hŏng lu mta mnơ̆ng dhơ̆ng mâo lu êa mil, ênai, đĭng kdriêk, klei kpư̆ hiu, drei sa ai hŏng pô čih hdruôm hră Klei Mmuñ Hđăp čiăng bi mni kơ Aê Diê Tlâo Čô Yang: “Ơ Yêhôwa, bruă ih lu êdimima! Ih ngă diñu jih hŏng klei thâo mĭn; lăn ala bŏ leh hŏng mnơ̆ng ih hrih” (Klei Mmuñ Hđăp 104:24). Hlăm klei Aê Diê hrih mjing, drei ƀuh sa lăn ala lu lĭn mta, bŏ hŏng ai hdĭp Ñu mprăp leh kơ anak mnuih. Drei đăo snei, tơdah Aê Diê bi bŏ leh boh lăn anei mơ̆ng anôk êhŏng truh kơ klei bŏ mnơ̆ng hdĭp, snăn Ñu ăt srăng bi bŏ klei hdĭp grăp čô drei hŏng klei hdĭp lu jơr, êbeh dlai mơ̆ng Ñu pô mơh. Sa klei hdĭp dôk hlăm Khua Yang amâo djŏ knŏng thâo kral kơ klei hdĭp ôh ƀiădah wăt lŏ jing sa klei hdĭp êbeh dlai (Y-Yôhan 10:10).
Drei dôk čang hmăng mâo Aê Diê bi bŏ klei hdĭp drei pô hŏng klei lu jơr, êbeh dlai, djăp mta êa mil mơ̆ amâodah hơaĭ?
Wah lač: Ơ Khua Yang, kâo bi mni kơ Ih kyua Ih hrih mjing leh boh lăn anei hŏng lu mta mnơ̆ng hdĭp. Tơdah kâo dlăng mnơ̆ng hdĭp jăk siam, mdê hjăn, lu jơr hlăm dliê kmrơ̆ng, dliê êa, ai tiê kâo myơr klei mpŭ mni kơ klei myang Ih hrih mjing thâo mĭn snăk. Ƀuăn jih klei hdĭp kâo thâo kơ klei Ih brei grăp hruê, čiăng kâo hdĭp yuôm bhăn leh anăn mpŭ mni Anăn Ama nanao. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Klei Yăl Dliê 26-27
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
