Mathiơ 21:33-41
“Lu đei noh rôp hloi kon tơ’ngla mir hiŏng hơtat tơ jih mir pơlôch hloi” (Mathiơ 21:39)
Nơ̆r jet tơchĕng pơwao:
– Lu bơngai jang mơng mir hơmu hlôi oei sa hăm tơ’ngla mir păng kon sư thoi yơ?
– Lĕch sư thoi yơ? Kră Yang wă bơtho bơngai Isơrael thoi yơ?
– Kră Yang Yêsu roi hơ’mon tơdrong ‘noh tơ’blŏk kơ bơ̆n thoi yơ?
Kră Yêsu pơtrơp roi tơdrong pơtih gia nai dơ̆ng wă pơma kơ lu kon pơlei Isơrael pơm kơnê̆ hơlĕnh pơdăr păng ưh kơ băt bơnê kơ Kră Yang đêl Kră Yang mơnat dŏng tơgŭm lu sư. Đei minh ‘nu bơngai adrol kơ wă năm tơ dêh ataih,sư hơmet lê̆ mir hơmu sư ‘lơ̆ng tôm ‘mơ̆i, na sư ăn lu bơngai nai jang mir sư wă choh, pơtăm, wei mir sư noh. Truh tơ bơyan phĕ plei, tơ’ngla mir ‘bar ‘măng sư wơh lu đam sư năm iŏk plei hơmu, mălei lu bơngai mă jang mir sư ei ưh kơ ăn lu đam sư plei hơmu; ưh kơ pôm ưh kơ ăn plei hơmu đĕch mă-lei “lu bơngai jang mir ei rôp lu đĭch đam sư, mơ’nah sư tôn teh, mơ’nah sư pơlôch, mơ’nah sư klơ̆m păng tơmo”(tr.35). Tơpo hơtuch, tơ’ngla mir wơh kon drŏ-nglo sư kơdih năm tơ mir ei yua kơ sư tơchĕng khan “Lu đe noh gô chu yom kơ kon inh thâu”(tr.37), mă-lei lu bơngai jang mơng mir hơmu ei tă tơ tơchĕng khan: Bơngai âu bơih kon ‘bok tơ’ngla mir âu, wă iŏk yua tơmam âu,na dang ei bĕ bơ̆n pơlôch sư na mir âu jing mir bơ̆n”, jơhngơ̆m lu sư hmơ̆n dêh rôp kon tơ’ngla mir ei pơlôch lê̆ hloi.(tr.38,39). Kră Yang Yêsu hlôi jet lu ‘bok soi păng lu kră wei lăng khan lu đe noh pơm kơ kon sư thoi noh bơih na ‘bă sư mă tơ’ngla mir ‘nei năm tơ noh, sư gô pơm kiơ kơ lu bơngai noh, lu sư tơl đei trong anăn dêh,trŏ thoi tơdrong juăt hloi: “Sư gô pơlôch đĭ lu bơngai pơm kơnê̆ noh, na ăn kơ bơngai nai jang dơ̆ng,na lu bơngai jang mơng đơ̆ng rŏng noh gô klah asong sư plei hơmu tơpă. (tr.41). Rŏ lăng lu sư chhôk dêh nơ̆r mă lu sư tơl trŏ noh, mă-lei tơdrong Kră Yang pơtih ei, lu bơngai pơm kơnê̆ ‘nei wă khan lu sư bơih, mă-lei lu sư ngeh kơ đe đĕch,lei na nơ̆r lu sư tơl noh lu sư tŏk-bŏk khan kơdih lu sư pơm kơnê̆,mă-lei lu sư ưh kơ băt lu sư khan kơdih lu sư pơm kơnê̆.
Adrĕch Isơrael đĭ hiơt kơ lu sư âu ưh kơ ‘lơ̆ng hloh‘biơ̆ lu adrĕch nai, kơnê̆ lei-lăi đĕch, mă-lei Kră Yang hlôi ‘mêm mơnat rơih iŏk lu sư jing kon pơlei Sư (Bơtho khôi juăt 7:7-8). Mă khan lei ră, lơ wơ̆t lu sư sơngah kuă kơ Kră Yang hăt druh kiơ̆ lu rup yang. Hơ’mon chăl arih lu kon pơlei mă Kră Yang rơih ‘nâu đơ̆ng jơhnơr ‘nâu truh tơ jơhnơr pơtrơp pơtrơp, Kră Yang hlôi wơh lơ bơngai năm pơtruh nơ̆r Sư, lu đe ei tơbăt lê̆ adrol tơdrong răm gô truh yua kơ đơ̆ng pơm kơnê̆,kư̆m tơ’blŏk kơ lu sư gah tơdrong lu sư arăng kơ̆l păng tơdrong lu sư kuă kơ lui. Mă khan lei ră, lu sư hlôi oei sa hăm lu bơngai pơtruh nơ̆r‘Bok Kei-Dei noh kơnê̆ dêh, mơ’nah lu sư tôn teh, mơ’nah lu sư klơ̆m păng tơmo, mơ’nah lu sư pơlôch lê̆ hloi.v.v.
Tơpo hơtuch, ‘Bok Kei-Dei wơh Kon Sư Kră Yang Yêsu jur tơ ala teh âu mă-lei “Sư jur tơ teh đak Sư kơdih, mă-lei lu buăl Sư ưh kơ wă sơng iŏk Sư”(Yôhan1:11)
Bơ̆n bơngai mă kiơ̆ Kră Yang bơih, bơ̆n kăl kơ lăng lăng bơ̆n kơdih, dôm tơdrong Kră Yang tơ’blŏk
kơ bơ̆n, bơ̆n hăm oei arăng kơ̆l ưh? Athei kơchăng,phŏ bơ̆n ưh ‘maih mơ̆ng nơ̆r Kră Yang,ưh kơ ăn nơ̆r Kră Yang bơtho hơmet bơ̆n. Bơ̆n kăl kơ ‘blŏk, bơ̆n ‘nâu bơngai yoch wă lôch răm lăm tơdrong yoch, mă-lei Kră Yang tơ’bôh bơih tơdrong Sư mơnat kơ bơ̆n, Sư ăn kơ bơ̆n jing kon Sư. Bơ̆n athei ling-lang băt bơnê kơ Sư, păng pơyơ̆r kơ Sư đĭ chăl arih.Tơdah bơ̆n oei arăng kơ̆l ưh kơ ‘bôh kơnăl dôm lu tơdrong Kră Yang tơbăt lê̆ adrol tơdrong răm wă truh lei kơplah Kră Yang jur tơ bơ̆n dơning kơnh, Sư gô jô̆ bơ̆n “bơngai kơnê̆”, na pơrăm lê̆ bơ̆n.
Kơkuh kơ Ih Kră Yang mă ‘mêm kơeng,bơnê kơ Ih yua kơ Ih dŏng pơklaih huai iŏk inh.Apinh Ih tơgŭm inh băt bơnê kơ Ih,awih awăn kơ Ih tơnăp ling-lang, arih kiơ̆ thoi Ih wă, lăp đon, wă kơ năr tơ’bơ̆p Ih kơnh, inh gơh oei hơdai Ih arih pŭn hiôk ling-lang.Inh krao khan yua anăn Kră Yang Yêsu Krist, Amen!
Tơdrong mơnat tih-tin mă Kră Yang ăn kơ bơ̆n noh, bơ̆n tơl tơwih kơ Sư thoi yơ?
Đŏk Sơ̆p Hla bơar ‘Bok Kei-Dei lăm pêng sơnăm: II Hơ’mon 19
Kênh Youtube BHKTHN:
