Klei Aê Diê Blŭ: II Klei Yăl Dliê 33:1-11
Êlan kliăng: “…mă hĕ klei jhat hlăm klei diih ngă mơ̆ng klei ti anăp ală Kâo, mdei bĕ ngă klei jhat” (Y-Êsai 1:16b)
Klei êmuh ksiêm mĭn: Ya klei jhat Mtao Manasê ngă leh ti anăp ală Aê Diê? Ya Aê Diê ngă čiăng brei ñu thâo kơ ñu ngă soh leh? Drei thâo kơ ya klei brei drei kmhal leh anăn lui hĕ?
Y-Manasê mâo pluh dua thŭn tơdah ñu dơ̆ng jing mtao, ñu kiă kriê êma pluh êma thŭn. Trăn Klei Aê Diê Blŭ anei brei thâo ƀrư̆ hruê ƀrư̆ ñu kdlŭt êlam hlăm klei ƀai leh anăn ngă klei jhat ƀrư̆ hruê ƀrư̆ kjham hĭn. Mơ̆ng “ngă klei jhat” (êlan 2), truh kơ “ngă lu klei jhat” (êlan 6), leh anăn “ngă klei jhat lu hĭn kơ phung găp djuê Yêhôwa bi rai leh” (êlan 9). Ñu lŏ mdơ̆ng anôk dlông ama ñu bi klưh leh, mdơ̆ng knưl kơ yang Ƀaal, ngă rup yang mniê Asêra, pô arăng yap jing mô̆ yang Ƀaal. Hlăm klei bhiăn kkuh mpŭ kơ yang Asêra, phung êkei srăng mjing diñu pô jing sa hŏng yang Ƀaal čiăng bi dôk êkei mniê hŏng phung mniê knhông, bi hmô kơ yang Asêra. Boh klă gơ̆, anei jing êlan anak mnuih duah mjing mă čiăng bi hrăp klei kđeh diñu pô tluh. Mtao Manasê kkuh mpŭ kơ phung mtŭ hlăm adiê leh anăn mdơ̆ng lu boh knưl ngă yang, ngă rup yang Asêra hlăm wăl sang kkuh mpŭ kơ Aê Diê amâo djŏ ti êngao msĕ si phung mtao jhat ƀai mkăn êlâo tinăn ngă leh ôh. Ñu ngă wăt klei Aê Diê bi êmut kheh msĕ si myơr anak ñu pô jing mnơ̆ng myơr čuh kơ yang Môlek; ksiêm mnơ̆ng čiăng hưn êlâo, ngă klei mdian, ngă bruă mjâo, duah phung blŭ hrăm hŏng phung mnuih djiê, leh anăn phung mdian, ñu ngă lu klei jhat čiăng mčhur ai ngêñ Aê Diê (êlan 6).
Tơdah amâo huĭ mpŭ kơ Aê Diê ôh, Mtao Manasê atăt phung ƀuôn sang hlăm klei čhuai, čiăng kơ diñu ngă klei jhat lu hĭn (êlan 9). Wăt tơdah mâo ama jing Mtao Hêsêkia sa čô huĭ mpŭ kơ Aê Diê dưn, ƀiădah Mtao Manasê ngă bi klăk hŏng klei ama ñu ngă leh. Aê Diê hưn êlâo leh tơdah phung ƀuôn sang Ñu ngă jih jang klei bhiăn, klei mtă leh anăn klei mtrŭn Ñu brei leh kơ Y-Môis sĭt nik digơ̆ ăt srăng dưi dôk hlăm lăn čar Ñu brei leh kơ phung aê digơ̆ (êlan 8). Ară anei, mtao atăt phung ƀuôn sang kkuh mpŭ kơ rup yang, tơl diñu ngă klei jhat lu hĭn kơ phung găp djuê Aê Diê bi rai leh ti anăp phung ƀuôn sang Israel, leh anăn kơ êdei Aê Diê brei arăng mă diñu nao jing mnă. Aê Diê khăp, čiăng kơ Y-Manasê leh anăn phung ƀuôn sang kmhal kơ klei soh, kyuanăn hŏng ƀăng êgei phung khua pô hưn êlâo Aê Diê blŭ kơ diñu, “ƀiădah diñu amâo uêñ ôh”. Ƀiădah Aê Diê mâo êlan čiăng kơ diñu uêñ. Anăn jing, Aê Diê atăt phung kahan Asiri nao wang blah diñu. Arăng mă kă Mtao Manasê hŏng săng đai đoh ba ñu kơ ƀuôn Ƀaƀilôn.
Klei soh đĭ lar nanao, leh anăn đoh ktŭng lu mnuih ngă soh msĕ mơh. Tơdah amâo uêñ leh anăn amâo ngă ôh tui si klei Khua Yang mtă leh hlăm Klei Ñu Blŭ, snăn phung đăo ăt srăng ngă klei jhat mơh ti anăp Khua Yang; tui ngă klei jhat ƀai lăn ala leh anăn kkuh mpŭ kơ rup yang amâo dưi ƀuh ôh hlăm ai tiê hrô kơ brei Aê Diê kiă kriê; đăo kơ klei mdian, đăo kơ klei ƀuê mjâo hrô kơ đăo kơ Klei Aê Diê Blŭ; ngă klei plă plia atăt truh kơ klei bi mproh anak ĭ, bi mdjiê anak mơ̆ng gơ̆ ka kkiêng ôh,…Kmhal bĕ mtam, tơdah amâo kmhal ôh, truh ti mmông Khua Yang, Ñu srăng ƀuah mkra drei ktrŏ snăk čiăng brei drei thâo kral klei soh drei.
Drei dôk ngă klei jhat čiăng mčhur ai ngêñ Aê Diê mơ̆?
Wah lač: Ơ Khua Yang, brei kâo lui jih klei amâo bi mơak kơ Ih ôh hlăm ai tiê, hlăm klei mĭn amâodah hlăm klei hdĭp kâo, leh anăn đru kâo thâo uêñ kăp hmư̆ leh anăn ngă tui si Klei Ih Blŭ. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: II Klei Yăl Dliê 15
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
