1 Xamuyees 8:10-18
Nqe cim:
“Tus TSWV hais tias, “Kuv yuav rau txim rau tus neeg uas khiav tawm ntawm kuv mus cia siab rau neeg lub zog, thiab cia siab rau tej neeg uas txawj tuag” (Yelemis 17:5)
Lus nug rau sawvdaws xav:
– Vajtswv hais kom Xamuyees mus hais dabtsi rau cov Yixalayees?
– Vajtswv tej lus hais qhia pom qhov tseeb uas tseemceeb twg?
– Zeem paub qhov tseeb no pab peb li cas hauv tej kev txiav txim siab rau kev ua neej?
Nqe 10 qhia pom Xamuyees tau mloog Vajtswv lus kawg siab, “qhia txhua yam … uas tus TSWV hais” txawm paub hais tias ntawd tsis yog tej lus uas cov Yixalyees xav mloog. Vajtswv lo lus ceebtoom rau cov Yixalayees qhia tshwm qhov tseeb uas tseemceeb. Tim ib, tsis yog txhua yam puavleej zoo nkauj li pom sab nraud. Yog cov Yixalayees xav muaj ib tug vajntxwv kav lawv ib yam li luag lwm haivneeg muaj (nqe 5) ces kuj yuav tsum txais yuav qhov uas vajntxwv yuav kav lawv li cas thiab (nqe 11). Lub ntiajteb no muaj ntau yam kev coglus zoo kawg nkaus tos rawv peb tiamsis yam uas zais nkoos tom qab ntawd yog tej nujnqis uas hnyav kawg nkaus ntawm tej lus dag xwb. Adas thiab Evas xaiv ntseeg raws li yeebncuab Ntxwgnyoog kev coglus heev dua li ntseeg Vajtswv Tus uas yog qhov tseeb. (Chivkeeb 3:4-5). Lauj kuj cia txoj kev zoo nkauj “ib yam li tus TSWV lub Vaj lossis zoo ib yam li lub tebchaws Iziv” ntawm lub nroog Xaudoos thiab Kaumaulas dag nws (Chivkeeb 13:10) thiaj rhuav nws lub koob npe, pojniam, menyuam puastsuaj tas. Qhov uas muaj tseeb no kuj zoo thooj li niaj hnub nim no, thiab lo lus ceebtoom ntawd yeej cheem tsum kawg nkaus kom peb tig los ua tib zoo xav (1 Yauhas 2:15-17).
Tim ob, muab tibneeg los hloov Vajtswv yeej coj tsis tau tej yam uas zoo tshaj qub. Lo lus uas hais meej rau hauv ntu Vajluskub no yog: “coj”, “txeeb” hauv nqe 11,13,14,16 nws yog ob peb lo lus muaj lub ntsiab “txhav” lossis “txeeb” lwm tus tug yuav. Cov Yixalyees hnov qab sai heev hais tias Vajtswv tau tso lawv dim txoj kev ua qhev nram tebchaws Iziv los, thiab thaum no lawv taij kom muaj ib tug vajntxwv los hloov Vajtswv, tiamsis lawv “yuav tau ua nws qhev” (nqe 17). Niaj hnub nim no muaj ntau tus ntseeg nrog tus Tswv mus tiamsis lawv muaj kev hnyav siab heev vim xav hais tias tus Tswv tsis pub lawv muaj ib qho kev ywjpheej, tiamsis lawv tsis paub hais tias tsuas yog nyob rau hauv Tswv Yexus xwb lawv thiaj saj tau txoj kev ywjpheej tseeb, ywjpheej ua neej tsimnyog qhov uas Vajtswv tsim los, tsis raug ua qhev rau txoj kev nyiam, kev ntshaw ntawm sab nqaij tawv (Yauhas 10:10).
Tim peb, ib txoj kev txiav txim siab yuam kev yuav tseg tej nujnqis loj nyob ntev loo. Vajtswv twb tau ceebtoom rau cov Yixalyees txog tej nujnqis uas lawv cajces yuav ntsib, thiab txog thaum uas lawv zeem paub tej nujnqis ntawd ces twb lig heev thiab kiag Vajtswv los Nws twb tsis mloog tus neeg tawv ncauj tej lus thov lawm (nqe 18).
Lo lus ceebtoom uas tawv qhawv: Peb yuav sau tej yam uas peb tseb lawm. Yog li ntawd yuav tsum ua tib zoo ceev faj yus txoj kev txiav txim siab hauv kev xaiv, “Nej tsis txhob xav yuam kev, yeej tsis muaj ib tug yuav dag tau Vajtswv, txhua tus nyias yuav tau sau raws li tej uas nyias tseb.” (Kalatias 6:7).
Thov Vajtswv,
Vajtswv, thov hlub nyuam yaus, thov cia zaj kawm hauv keebkwm ntawm Koj haivneeg no ntuas nyuam yaus, thaum uas raug dag ntxias nrhiav ib yam dabtsi txawv lossis ib tug tibneeg twg hloov Koj chaw. Nyuam yaus tuav Tswv Yexus Khetos lub npe thov, Amees.
Peb txiav txim siab li cas thaum uas hnov Vajtswv tej lus ceeb toom dhau los hauv ntu Vajluskub no?
Nyeem Vajluskub hauv peb lub xyoos: 2 Xwmtxheej Vajntxwv 12
Kênh Youtube BHKTHN:
