Klei Aê Diê Blŭ: I Y-Samuel 8:1-9
Êlan kliăng: “Jih jang êlan mnuih jing kpă kơ ală gơ̆ pô, ƀiădah Yêhôwa ksiêm ai tiê.” (Klei Bi Hriêng 21:2)
Klei êmuh ksiêm mĭn: Si phung ƀuôn sang Israel bi êdah klei mĭn diñu čiăng mjing sa čô mtao kiă kriê diñu? Si mblang kơ klei mĭn diñu bi êdah anei? Si drei khăng bi êdah klei mĭn msĕ snăn čiăng mgang kơ klei drei amâo gưt tui si Klei Aê Diê Blŭ ôh?
Phung ƀuôn sang Israel bi êdah leh tlâo mta klei mĭn phŭn diñu kơ klei akâo brei Y-Samuel tŭ ư mjing sa čô mtao kiă kriê diñu (êlan 5). Tal sa, Y-Samuel mduôn leh, amâo lŏ mâo ai ktang leh anăn klei mĭn mngač dưi kiă kriê diñu ôh. Tal dua, knuih hdĭp phung anak Y-Samuel amâo mâo klei năng ôh. Tal tlâo, mâo sa jar kiă kriê tŭ dưn mkăn phung čar riêng gah dôk yua.
Brei drei mđing đa đa mta klei êlâo, čiăng thâo săng si klei mĭn anei jing djŏ amâodah hơăi. Tal sa, phung ƀuôn sang Israel knŏng knang kơ klei thâo mĭn diñu pô čiăng bi êdah bruă anei ƀiădah amâo tuôm êmuh si klei Aê Diê čiăng ôh. Klei mgaih mkra diñu bi êdah knŏng tui si klei dleh ti anăp ală ƀiădah amâo đăo knang kơ Khua Yang ôh.
Tal dua, phung ƀuôn sang Israel amâo thâo kral ôh klei mdê ti krah phung buôn sang Aê Diê hŏng phung ƀuôn sang tue. Mâo lu mta klei phung tue dưi mă yua ƀiădah phung ƀuôn sang Aê Diê amâo dưi ngă ôh. Lu mnuih ba jar rup leh anăn klei mgaih mkra mơ̆ng êngao bi mŭt hlăm Phung Sang Aê Diê leh anăn lač, si ngă drei amâo bi mlih tui msĕ si ênhă êlan ƀuôn sang dôk ngă ôh. Amâo djŏ ôh Phung Sang Aê Diê amâo dưi bi mlih mrâo, amâodah mă yua boh tŭ dưn hlăm klei kiă kriê hlăm ƀuôn sang, ƀiădah brei hŏng klei thâo săng, thâo kral klei mdê ti krah Phung Sang Aê Diê hŏng phung lăn ala. Phung Sang Aê Diê mdơ̆ng ti dlông tur Klei Aê Diê Blŭ, kyuanăn jih jang klei čuăn ngă brei kna ti dlông Klei Aê Diê Blŭ sơăi.
Tal tlâo, phung ƀuôn sang Israel wơr bĭt leh klei hriăm hlăm hruê êgao. Boh klei truh kơ gŏ sang Y-Samuel giăm msĕ hŏng gŏ sang khua ngă yang Y-Hêli mơh, ƀiădah lĕ, êjai Y-Hêli amâo tui duah ôh klei Aê Diê čiăng, bi Y-Samuel ăt huĭ mpŭ kơ Aê Diê leh anăn ñu jing mnuih wah lač. Leh anăn hlăm boh klei truh kơ Y-Hêli, hrô kơ klei mgơ̆ng sa čô mtao, Aê Diê brei sa čô khua phat kđi jing Y-Samuel kăp hrô, snăn si ngă phung ƀuôn sang Israel mâo lŏ đăo knang leh anăn dôk guôn klei Khua Yang mgaih mkra ôh?
Tal pă, klei phung ƀuôn sang Aê Diê bi kdơ̆ng jing boh mơ̆ng klei mgao, leh anăn amâo dưm Khua Yang jing phŭn ôh (êlan 8). Mta klei diñu mđing uêñ amâo djŏ ôh hlei yang jing Aê Diê kơ diñu, ƀiădah hlei yang ba klei tŭ dưn kơ diñu yơh. Boh blŭ “klei anăn amâo bi mơak kơ Y-Samuel ôh” (êlan 6) hlăm klei blŭ phŭn Hêbrơ mblang khăng ktang snăk, klei anăn jing “klei jhat ƀai tui si ală Y-Samuel”.
Lŏ wĭt kơ klei êmuh si ngă klei mĭn anei jing djŏ amâodah soh? Klei wĭt lač brei thâo drei dôk dưm hlei pô jing phŭn, jing atur kơ klei hdĭp leh anăn kơ jih klei drei čuăn ngă! Brei hdơr snei: “Jih jang êlan mnuih jing kpă kơ ală gơ̆ pô, ƀiădah Yêhôwa ksiêm ai tiê. …” hjăn Ñu yơh jing Pô čuăn ya klei jing djŏ, ya klei jing soh! Wah lač brei bĕ kơ Phung Sang Aê Diê leh anăn kơ gŏ sang drei čiăng đăm lĕ ôh hlăm êlan soh čhuai msĕ si phung ƀuôn sang Aê Diê hlăk đưm lĕ leh.
Si ngă drei khăng wah lač brei kơ gŏ sang leh anăn kơ Phung Sang Aê Diê čiăng mâo nanao klei čuăn ngă djŏ tui si klei Aê Diê čiăng mơ̆?
Wah lač: Ơ Khua Yang, akâo Khua Yang pap brei kơ klei mluk mgu kâo, lu blư̆ kâo mgao lačdah kâo yơh dưi čuăn si klei hdĭp kâo pô jing, ƀiădah amâo thâo kral ôh jih jang klei jăk jĭn jing, dưi dôk hlăm klei Khua Yang atăt gai, kiă kriê, khăp hơiêng. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Klei Yăl Dliê 11
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
