Tes Haujlwm 4:23-31
Nqe cim:
“Rau qhov tus Ntsujplig uas Vajtswv pub rau peb yeej xav kom peb muaj lub siab tawv. Nws yuav ua haujlwm rau hauv peb lub siab kom peb muaj hwjchim, kom muaj lub siab hlub lwm tus, thiab kom peb paub tswj peb lub siab” (2 Timautes 1:7)
Lus nug rau sawvdaws xav:
– Thaum uas Petus thiab Yauhas tau tawm hauv tsev lojcuj los, Pawg Ntseeg tau ua dabtsi?
– Yam dabtsi tshwmsim thaum uas Pawg Ntseeg koom siab thov Vajtswv?
– Zaj xwm no txhawb peb lub siab ua dabtsi rau Pawg Ntseeg hauv tes haujlwm qhia txoj Moo Zoo?
Cov thwjtim xub thawj tabtom raug tsimtxom hnyav heev vim kev ntseeg thiab txoj kev tshaj tawm txoj Moo Zoo. Nyob hauv tshooj no, timthawj Petus thiab Yauhas raug ntes mus kaw hauv tsev lojcuj. Nkawd raug cov Yudais cov thawjcoj hu los nug txog qhov uas nkawd tau kho tus txivneej tuag ceg ntawm lub Roojvag Zoo Nkauj. nkawd tabtom raug kev tsimtxom vim qhia txog Tswv Yexus (Tes Haujlwm 4:1-12). Kiag lub sijhawm uas tau tso tawm los, nkawd tau los ntsib lwm cov uas yog thwjtim thiab piav txhua yam qhia rau lawv. Tom qab ntawd, lawv koom ib lub siab thov Vajtswv ua ked. Muaj ntau yam hauv lawv tej lus thov Vajtswv ua ntej ntawd. Nyob hauv nqe 29 lawv thov Tus Tswv hais tias “Tus Tswv, nimno thov koj tsa qhovmuag saib tej uas lawv ua nruj ua tsiv rau peb. Thiab thov koj pab peb cov uas yog koj cov tubtxib kom muaj lub siab tawv qhia koj Txojlus”. Hais rau lwm seem, thov Vajtswv pab kom lawv muaj lub siab tawv qhia Vajtswv Txojlus thaum raug ua nruj ua tsiv, tsis ntshai thaum raug kev tsimtxom tiamsis hajyam muaj zog heev dua qhia txoj Moo Zoo.
Cov thwjtim tej lus thov Vajtswv qhia pom hais tias lawv raug luag ua nruj ua tsiv thiab raug tej kev sim siab thaum qhia txog Tswv Yexus. Tiamsis, yim ntsib kev txomnyem Pawg Ntseeg yim muaj zog rau hauv kev thov Vajtswv thiab kev vamkhom tus Tswv pab hauv kev tshaj tawm Txoj Moo Zoo. Lawv thov Vajtswv pab kom lawv muaj lub siab tawv tshaj tawm Vajtswv Txojlus thiab ua tej txujci tseemceeb “thaum peb tuav Yexus uas yog koj tus tubtxib uas dawbhuv lub npe, thov koj ua tej txujci tseemceeb rau sawvdaws pom” (nqe 30). Qhov no qhia pom hais tias cov thwjtim muaj lub siab ntshaw kom ua tiav lawv lub luag haujlwm tsis ntshai thaum ntsib kev txomnyem.
Nqe 31 Hais txog nqi zog ntawm tej lus thov Vajtswv: “qhov chaw uas lawv nyob ntawd txawm ua zog koog; Vaj Ntsujplig tus Dawbhuv txawm los kav lawv txhua tus lub siab, lawv thiaj muaj lub siab tawv qhia Vajtswv Txojlus”. Saj dhau tej txujci tseemceeb no pab rau lawv hajyam muaj zog tshaj tawm Vajtswv Txojlus ntxiv. Kev “ua zog koog” ua tim khawv qhia txog Vajtswv thiab Nws lub hwjchim nrog peb nyob. Qhov no qhia tshwm Vajtswv teb cov thwjtim tej lus thov thiab lawv txiav txim siab rov tshaj tawm txoj Moo Zoo.
Ntawm no yog ntu Vajluskub hais muaj zog thiab txhawb zog txog qhov tseemceeb ntawm kev thov Vajtswv, kev ntseeg, thiab kev cia siab rau Vaj Ntsujplig thaum ntsib kev tawmtsam. Qhov no yuav txhawb thiab ntuas cov ntseeg niaj hnub no kom thov Vajtswv kawg siab ntsws rau Pawg Ntseeg kev tshaj tawm txoj Moo Zoo rau lub ntiajteb uas niaj hnub tawmtsam peb txoj kev ntseeg.
Thov Vajtswv,
Vajtswv, thov pub kom nyuam yaus muaj lub siab tawv qhia Txoj Moo Zoo txawm yuav ntsib kev tawmtsam losxij. Thov Koj pub rau Pawg Ntseeg saj tau Vaj Ntsujplig lub hwjchim uas pab, tiv thaiv dhau los ntawm Pawg Ntseeg kev koom siab thov Vajtswv, kom peb txhua tus muaj lub siab tawv tshaj tawm txoj Moo Zoo. Nyuam yaus tuav Tswv Yexus Khetos lub npe thov, Amees.
Peb puas tau thov Vajtswv kawg siab ntsws rau Pawg Ntseeg kom muaj lub siab tawv tshaj tawm txoj Moo Zoo?
Nyeem Vajluskub hauv peb lub xyoos: 2 Xwmtxheej Vajntxwv 8
Kênh Youtube BHKTHN:
