Klei Aê Diê Blŭ: Y-Yakơ 5:12; Y-Mathiơ 5:33-37
Êlan kliăng: “Ƀiădah Ơ phung ayŏng amai adei, êgao hĭn kơ jih jang klei, đăm kat asei ôh, thâodah hŏng adiê amâodah hŏng lăn ala, amâodah hŏng klei kat asei mkăn, ƀiădah brei klei diih Ơ jing Ơ, leh anăn klei diih Ơ ơh jing Ơ ơh, čiăng kơ Aê Diê amâo phat kđi kơ diih ôh” (Y-Yakơ 5:12)
Klei êmuh ksiêm mĭn: Ya klei kat asei jing leh anăn hbĭl arăng khăng kat asei? Ya ngă Y-Yakơ lač “đăm kat asei ôh”? Ya Klei Aê Diê Blŭ mtô kơ klei kat asei leh anăn si drei srăng mă yua čiăng kơ djŏ?
Kat asei jing klei ƀuăn rơ̆ng srăng ngă djŏ tui si klei pô blŭ leh, jing ƀuăn rơ̆ng hŏng pô mkăn kơ klei pô jing mnuih kpă. Hlăm klei hdĭp, drei ƀuh klei kat asei hlăm lu mta bruă. Tăp năng hlăm hruê yuôm bhăn msĕ si hlăm klei bi kuôl ung mô̆, knăm mă tŭ bruă mơ̆ng phung khua dôk ti kŏ ala čar, phung hưn bi sĭt dôk ti anăp khua phat kđi, phung aê êa drao hlăm knăm ruê̆ adŭ hriăm. Mâo mơh klei ƀuăn amâo jăk đei yuôm ôh, si tô hmô klei drei ƀuăn sa mta klei hŏng phung anak čô, hŏng mah jiăng, hŏng phung bi blei mnia…
Y-Yakơ 5:12 mtô, “đăm kat asei ôh”. Tinei, Y-Yakơ lŏ mñă kơ klei Khua Yang Yêsu blŭ leh hlăm Y-Mathiơ 5:33-37 kơ klei “đăm kat asei” leh anăn đăm ktrâo kơ mnơ̆ng djŏ kơ Aê Diê hlăm klei kat asei ôh. Čiăng thâo săng ya ngă Khua Yang Yêsu mtô msĕ snăn, brei drei thâo săng hĕ kơ klei phung Yuđa kat asei. Kyua klei kat asei kñăm kơ klei jing yuôm, bi truh klei knang, ƀiădah pô kat asei srăng klam mă klei ñu kat asei anăn ti anăp Aê Diê, kyuanăn phung Yuđa amâo jhŏng kat asei hŏng Anăn Aê Diê ôh. Hrô kơ klei anăn diñu srăng ktrâo kơ mnơ̆ng mkăn djŏ tuôm hŏng Aê Diê, msĕ si adiê, lăn ala, ƀuôn Yêrusalem, amâodah Sang Kkuh Mpŭ,…hŏng klei kñăm čiăng kơ diñu amâo mâo klei kă ôh, leh anăn mơ̆ng anăn klei kat asei jing hĕ mnơ̆ng mgang kơ bruă diñu ngă hŏng klei luar. Khua Yang Yêsu bi êdah leh klei luar hlăm klei diñu kat asei hlăm Y-Mathiơ 23:16-22.
Snăn yơh, wăt Khua Yang Yêsu leh anăn Y-Yakơ amâo kăm ôh klei kat asei. Klei Aê Diê Blŭ mtă brei huĭ mpŭ kơ Aê Diê leh anăn kat asei hŏng Anăn Ñu (Klei Mtô Mñă Klei Bhiăn 10:20). Êgao hĭn kơnăn, Aê Diê pô ăt kat asei leh mơh tơdah ngă klei bi mguôp hŏng Y-Abraham (Hêbrơ 6:13). Ƀiădah Klei Aê Diê Blŭ mtă brei drei răng mơh tơdah kat asei leh anăn thâo săng kơ klei kat asei. Yuôm hĭn kơ klei kat asei, Y-Yakơ lŏ bi hdơr klei Khua Yang lač leh brei klei drei blŭ jing sĭt, amâo thiăm kăn dưi bi hrŏ rei “čiăng kơ Aê Diê amâo phat kđi” kơ drei ôh (Y-Yakơ 5:12).
Mdê hŏng yang jhat jing ama kơ klei blŭ luar, Aê Diê jing Pô kpă ênô leh anăn drei jing phng anak Ñu. Ti krah lăn ala “ƀuăn lu mơh, amâo bi sĭt klei ƀuăn lu mơh”, brei drei hdĭp hŏng klei kpă ênô, ênuah hŏng drei pô leh anăn hŏng pô riêng gah. Kyuanăn, brei ung mô̆ djă pioh klei ƀuăn khăp sĭt suôr tơl tuč klei hdĭp, Phung blei mnia bi sĭt klei ƀuăn leh hŏng phung bi blei mnia. Phung jing amĭ ama bi sĭt klei ƀuăn hŏng phung anak…Brei klei hdĭp ênuah leh anăn kpă ênô phung đăo bi êdah leh anăn bi hmăi kơ phung riêng gah.
Drei srăng bi sĭt ênŭm mơ̆ klei drei ƀuăn leh?
Wah lač: Ơ Khua Yang, Aê Diê Pô kpă ênô, hlăm Ih amâo mâo klei luar ôh. Kâo thâo kơ klei amâo klă ênŭm hlăm klei kâo blŭ, akâo kơ Ama pap brei leh anăn đru kâo jing sĭt nanao hlăm grăp klei kâo blŭ leh anăn bruă kâo ngă. Brei klei hdĭp kâo bi êdah klei sĭt nik Ih kơ phung riêng gah kâo. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Yakơ 5
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
