Blŭng a 1:6-8
“Lu hơtăl plĕnh ră-roi tơdrong ư-ang Kră Yang ‘Bok Kei-Dei, Tơ plĕnh ti tơ’bôh tơdrong jang đơ̆ng ti Sư pơm.” (Hơriso 19:1)
Nơ̆r jet tơchĕng pơwao:
– Lăm năr mă ‘bar, ‘Bok Kei-Dei đei pơjing tơdrong kiơ?
– Tơdrong pơjing noh wă pơma tơdrong kiơ gah Kră Yang păng tơdrong Sư đêl proh hơmet?
– Bơ̆n pơhrăm iŏk tơdrong kiơ kơ bơ̆n kơdih?
Lăm năr mă ‘bar, Kră Yang ‘Bok Kei-Dei đei pơjing “anê̆ rơwơ̆ng” anăn anê̆ rơwơ̆ng noh “Plĕnh”. Anê̆ rơwơ̆ng noh đei pơjing klah asong đak tơ kơpal anê̆ rơwơ̆ng păng đak tơ ala anê̆ rơwơ̆ng. hơdrol kơ đei plĕnh, teh ưh kơ đei hơbŏ păng ưh kơ đei kiơ lăm noh, tơ jơ̆p jang oei măng mu ngăl (trong 2). Yua kơ tơdrong klah asong noh na teh đak âu jing tơproh ‘lơ̆ng păng gơh wei rong tơdrong arih. Păng pă minh wơ̆t dơ̆ng thoi bơ̆n oei ‘bôh lăm tơdrong pơjing, Kră Yang pơm tơdrong ‘nâu hăm nơ̆r Sư khan đĕch. Nơ̆r akhan Kră Yang pơm keh tơdrong Sư đei proh hơmet păng tơdrong kơnhăm Sư. Đak tơ ala plĕnh noh wă pơma kơ đak dơsĭ, đak krong, đak glung, đak dơnâu. Đak tơ kơpal plĕnh ti noh wă pơma kơ đak mong tơ kơpal rơwơ̆ng ti, mong lăm lu hơmơ̆l, hơyuh hơiuh. Đak tơ kơpal păng tơ ala jing minh dăr oei dăr hơnơ̆ng wă rong păng bơwei tơdrong arih oei pơtrơp ăn kơ teh đak âu. Lăm kơplah noh plĕnh ăn đei kial, pơm kơ ‘mi tŏ dăr trŏ kiơ̆ kơ bơyan. Đĭ đăng dôm tơdrong ‘nâu tơ’bôh tơdrong proh hơmet gơh hơgei păng ‘bôh tơdrong noh ‘lơ̆ng đơ̆ng Tơ’ngla pơjing. Kơplah ngoi lăng păng pơma ‘bơm tơ plĕnh ti, bơ̆n ưh kơ gơh wă ưh kơ pơma drơ̆ng hơdai hăm pơtao Đawit khan tơbăt thoi âu: “Lu hơtăl plĕnh ră roi tơdrong ư-ang Kră Yang ‘Bok Kei-Dei. Tơ plĕnh ti tơ’bôh tơdrong jang đơ̆ng ti Sư pơm” (Hơriso 19:1).
Tơchĕng pơwao gah tơdrong Kră Yang pơjing plĕnh, bơ̆n ưh kơ sĭ pơyơ̆r nơ̆r ư-ang kơ Kră Yang gah tơdrong mơsêh Sư pơm đĕch ôh, mă bơ̆n kư̆m lăng ‘bôh ‘Bok Kei-Dei bơih Kră Yang ăn dôm tơdrong tơproh ‘lơ̆ng, Sư ưh kơ sĭ pơjing đơ̆ng ưh kơ đei na jing đei đĕch ôh, mă sư kư̆m klah asong wă kơ đơ̆ng dôm tơdrong phara băl jing tơproh ‘lơ̆ng, đei yua păng đei kơnhăm. Kră Yang ‘Bok Kei-Dei đei klah asong đak păng đak wă pơjing tơ kơpal plĕnh ti, anih tơ’bôh pơdah tơdrong ‘lơ̆ng rŏ Sư. Lăm tơdrong arih gah bơhngol wă khan Kră Yang kư̆m klah lu bơ̆n jơ̆ lu bơngai gah Sư bơih klaih đơ̆ng dôm tơdrong yoch kơnê̆ ‘mê̆ ‘mach lăm teh đak âu thoi nơ̆r ‘Bok Kei-Dei đei bơtho: “Ơ lu ‘nhŏng oh mă inh ‘mêm kơeng, yua kơ ‘Bok Kei-Dei wă ăn kơ bơ̆n jing kon Sư thoi noh bơih, na bơ̆n athei tŭk lê̆ đĭ dôm tơdrong kơnê̆ ‘mê̆ ‘mach đơ̆ng akâu bơ̆n juăt kơ pơm hăm đơ̆ng jơhngơ̆m đon bơ̆n tơchĕng kơnê̆; bơ̆n athei adrin pơm mă tơpăt lăm tôm tơdrong, yua kơ bơ̆n băt hli kơ ‘Bok Kei-Dei (II Kôrintô 7:1). Nhen thoi tơ plĕnh ti tơ’bôh tơdrong jang đơ̆ng ti Kră Yang pơm, kon pơlei Kră Yang arih oei tơ ala teh âu, tơklah đơ̆ng tơdrong yoch kơnê̆ lăm teh đak âu wă ră roi tơdrong ‘lơ̆ng Kră Yang ‘Bok Kei-Dei ăn kơ đĭ đăng bơngai.
Ơ Kră Yang, inh bơnê kơ Kră Yang yua kơ Ih đei klah asong đak tơ kơpal păng tơ ala wă ăn kơ plei teh tơproh ‘lơ̆ng ăn kơ inh gơh arih păng hiôk chơt dang ei. Bơnê kơ Kră Yang yua kơ Ih ăn tôm mah dôm tơmam tơ ala teh âu. Hơpơi apinh Ih tơgŭm inh wă kơ chăl arih inh ling lang tơklah đơ̆ng dôm tơdrong kơnê̆ lăm teh đak âu wă tơ’bôh tơdrong pơjing tơproh ‘lơ̆ng đơ̆ng Ih. Yua anăn Kră Yang Yêsu Krist, Amen.
Dôm tơdrong kiơ lăm chăl arih bơ̆n kăl kơ tŭk lê̆ wă tơ’bôh tơdrong ‘lơ̆ng rŏ Kră Yang?
Plĕnh teh đơ̆ng Kră Yang pơjing
Dôm tơmam đei pơjing lăm teh đak âu
Kră Yang ăn pŭn hiôk rim năr
Tơdrong arih hiôk ‘lơ̆ng lăm tơpang ti Sư
Đŏk Sơ̆p Hla bơar ‘Bok Kei-Dei lăm pêng sơnăm: Tơdrong Pơđơ̆k 27
Kênh Youtube BHKTHN:
