Klei Aê Diê Blŭ: Y-Markôs 2:1-12
Êlan kliăng: “Ñu pap brei kơ jih jang klei soh ih; Ñu bi hlao jih jang klei ruă duam ih;” (Klei Mmuñ Hđăp 103:3)
Klei êmuh ksiêm mĭn: Ya ngă pă čô mah jiăng kkung mnuih êwiên ba ti dlông sang, pŏk čuôr găp bi mtrŭn mah jiăng diñu kơ Khua Yang? Ya klei Khua Yang Yêsu ngă leh kơ mnuih êwiên ? Ya klei hriăm kơ drei mơ̆ng hdră êlan Khua Yang bi hlao mnuih êwiên?
Klei yăl dliê hưn mdah brei ƀuh mâo lu snăk mnuih bi knhiêt hlăm sang mâo Khua Yang Yêsu dôk mtô mblang. Hlăm phung lu anăn mâo mbĭt wăt phung khua kiă kriê klei đăo mơh (êlan 6). Rup êdah hĭn hlăm klei yăl dliê anei, anăn jing mâo pă čô êkei kkung sa čô êwiên hriê kơ Khua Yang. diñu hmư̆ hing Khua Yang Yêsu jing Pô dưi bi hlao djăp mta klei ruă duam, kyuanăn diñu čiăng đru mah jiăng diñu mâo klei êwiên. Ƀiădah kyua phung ƀuôn sang lu đei, ti anăp ƀăng bhă amâo lŏ mâo anôk hŏng ôh, knhal tuč, diñu mĭn sa hdră êlan mdê hĭn hŏng yang đar, anăn jing pŏk čuôr găp leh anăn bi mtrŭn mnuih êwiên klă anôk Khua Yang dôk mtam. Anei jing sa bruă ngă kbiă hriê mơ̆ng klei đăo leh anăn ai tiê khăp pap čiăng đru mah jiăng pô hŏng jih djăp êlan hdră.
Ƀiădah lĕ, Khua Yang Yêsu amâo bi hlao klei ruă êwiên kơ mnuih anăn mtam ôh, ƀiădah Ñu lač: “Ơ dam, klei soh ih mâo klei pap brei leh” (êlan 5). Êlâo kơ bi hlao klei ruă asei mlei kđeh, Khua Yang Yêsu čiăng rơ̆ng hŏng mnuih êwiên snei klei soh gơ̆ pap brei leh, gơ̆ mâo klei bi grăng hŏng Aê Diê leh anăn dưi mâo klei êđăp ênang hlăm mngăt ai tiê. Klei anei jingyuôm hĭn kơ klei dưi bi hlao jơ̆ng êwiên gơ̆. Khua Yang kñăm kơ mta phŭn mngăt ai tiê hĭn kơ asei mlei kđeh.
Jih jang mnuih soh leh sơăi, leh anăn amâo tơl mâo klei guh kơang Aê Diê ôh (Rôm 3:23). Mnuih êwiên anei ăt jing sa čô mnuih soh msĕ mơh, klei ruă gơ̆ jing boh tŭ jhat mơ̆ng bruă anak mnuih ngă soh blŭ jŭm, dôk hdĭp hlăm sa lăn ala soh jhat. Jih wăt mnuih êwiên leh anăn pă čô mah jiăng kkung ba gơ̆ kơ Khua Yang knŏng ƀuh klei čiăng dưi bi hlao klei ruă hlăm kđeh asei mlei, ƀiădah Khua Yang brei ƀuh klei pap brei klei soh yơh jing klei čiăng yuôm hĭn. Tơdah klei soh mâo klei pap brei leh, mngăt ai tiê dưi lŏ bi grăng hŏng Aê Diê, dưi bi mguôp hŏng Ñu leh anăn mâo klei jăk mơak amâo djŏ knŏng ti lăn ala anei ƀiădah wăt hlăm ênuk nanao hlŏng lar. Kyuanăn, Khua Yang hưn klă klei soh mnuih êwiên dưi pap brei leh, êlâo kơ Ñu ngă bruă yuôm bhăn bi hlao jơ̆ng êwiên kơ gơ̆. Mnuih êlâo kơnăn knŏng dôk đih sa anôk ti jhưng, brei pă čô mah jiăng kkung ba kơ Khua Yang, ară anei dưi kgŭ dôk dơ̆ng kkung ba wĭt jhưng gơ̆ êbat wĭt kơ sang.
Hdră kñăm čiăng phŭn kơ klei Khua Yang Yêsu hriê ti lăn ala, amâo djŏ knŏng čiăng bi hlao klei ruă ôh, ƀiădah čiăng mtô klei đăo leh anăn bi mtlaih mnuih. Ñu tuôm mtô leh snei: “Ƀiădah brei diih duah êlâo hĭn ƀuôn ala mtao Aê Diê leh anăn klei kpă ênô Ñu, leh anăn Ñu srăng thiăm brei kơ diih jih jang mnơ̆ng anăn.” (Y-Mathiơ 6:33). Khua Yang Yêsu mđing uêñ kơ klei čiăng hlăm mngăt ai tiê drei hĭn kơ klei čiăng hlăm kđeh asei mlei. Tơdah mngăt ai tiê mâo klei bi hlao, drei dưi dôk hdĭp êđăp ênang mơak mơai ti krah lăn ala anei, leh anăn hlăm hruê knhal tuč wĭt hŏng Khua Yang, amâo srăng lŏ adôk klei ruă duam ôh kyuadah mâo leh klei bi hlao kluôm ênŭm.
Si ngă drei mâo klei bi knal mơ̆ kơ klei mâo klei pap brei klei soh jing yuôm hĭn kơ klei bi hlao hlăm kđeh asei mlei?
Wah lač: Ơ Khua Yang, akâo Ih đru kâo thâo kral klei Ih pap brei klei soh leh anăn mâo klei bi mtlaih jing yuôm hĭn kơ klei bi hlao hlăm kđeh asei mlei, čiăng kơ kâo đăo knang kơ Khua Yang kdlưn hĭn, leh anăn dôk hdĭp bi mơak kơ Khua Yang hlăm jih jang klei truh hlăm kơ klei hdĭp kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Klei Yăl Dliê 22
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
