Malakaus 2:1-12
Nqe cim:
“Nws zam kuv tej kev txhaum huv tibsi thiab kho kuv tej mob zoo hlo” (Ntawv Nkauj 103:3).
Lus nug rau sawvdaws xav:
– Vim li cas plaub tug phoojywg yuav kwv tus tuag tes tuag taw nce saum rutsev rhuav ib qho thiab tso lawv tus phoojywg nqis los rau Tswv Yexus?
– Tswv Yexus ua li cas rau tus tuag tes tuag taw?
– Peb kawm tau yam dab tsi hauv Tswv Yexus kev kho tus tuag tes tuag taw no?
Lub sijhawm uas tshwm muaj zaj xwm no yog thaum Tswv Yexus tabtom qhia rau tej neeg coob coob mloog nyob hauv ib lub tsev. Cov neeg coob coob ntawd muaj cov xibhwb uas qhia Vajtswv txoj Kevcai nyob ntawd thiab (nqe 6). Tseemceeb hauv zaj xwm no yog plaub tus neeg uas kwv lawv phoojywg tuag tes tuag taw tuaj rau Tswv Yexus pab kho. Lawv hnov Tswv Yexus yog tus muaj peevxwm kho tau txhua yam mob zoo, lawv thiaj xav pab lawv tus phoojywg tuag tes tuag taw kom zoo thiab. Tiamsis vim tibneeg coob heev ntawm tej qhov rooj los puv tas tsis tau kev coj tus phoojywg mus cuag Tswv Yexus. Lawv xav tau ib lub tswvyim zoo uas nce mus saum ruvtsev thiab rhuav ib qho ncaj ntawm Yexus lawm saum mam tso lawv tus phoojywg nqis los rau ntawm Tswv Yexus xub ntiag. Tej uas lawv ua yog ib tes haujlwm ntawm kev ntseeg thiab lub siab hlub tshua uas xav pab tus phoojywg kom zoo.
Tiamsis, Tswv Yexus tsis kho tus neeg tuag tes tuag taw tamsim raws li sawvdaws xav, Tswv Yexus hais tias: “Metub, kuv twb zam koj lub txim lawm” (nqe 5). Ua ntej kho sab nqaij tawv, Tswv Yexus xav qhia rau tus tuag tes taw hais tias, nws lub txim twb raug zam lawm, nws rov tau sib raug zoo nrog Vajtswv thiab tau kev kaj siab hauv sab ntsujplig. Qhov uas nws tau zam txim tseemceeb dua li kho zoo nws ob txhais kotaw. Tswv Yexus saib sab ntsujplig tseemceeb dua li sab nqaij tawv.
Tibneeg txhua tus puavleej ua txhaum thiab tu ncua Vajtswv lub tshwjchim lawm (Loos 3:23). Tus tuag tes tuag taw no kuj yog ib tug neeg txhaum, tej mob nkeeg ntawm tus neeg no kuj yog nqi zog ntawm txhua tus neeg uas tabtom ua neej nyob hauv ntiajteb tej kev txhaum. Tus tuag tes taw thiab tagnrho nws plaub tug phoojywg puavleej pom kev cheemtsum kho zoo sab nqaij tawv xwb, tiamsis Tswv Yexus pom kev cheemtsum yog tau zam txim yog yam loj dua huv tibsi. Thaum uas tau zam txim, sab ntsujplig rov tau sib raug zoo nrog Vajtswv, thiab tau txais koob hmoov uas tsis yog nyob tiam no xwb tiamsis tseem tau txais txhua yam uas yuav nyob mus ibtxhis thiab. Vim li ntawd, Tswv Yexus thiaj tawm suab txog kev zam txim rau tus tuag tes taw ua ntej mam ua txujci tseemceeb kho nws ob txhais kotaw zoo. Tus uas yav dhau los pw saum txaj sawv tsis taus li vim muaj plaub tug phoojywg kwv tuaj cuag Tswv Yexus, nimno nws sawv tsees thiab kwv nws daim pam pua chaw rov mus tsev.
Tswv Yexus los rau hauv ntiajteb no tsis yog kho mob xwb, tiamsis yog los qhia kev ntseeg thiab los cawm tibneeg. Tswv Yexus tau qhia hais tias: “Tiamsis nej yuav tsum xub nrhiav Vajtswv lub Tebchaws thiab ua raws li Vajtswv lub siab nyiam tso, Vajtswv mam muab tej no ntxiv rau nej” (Mathais 6:33). Tswv Yexus xav txog kev cheemtsum sab ntsujplig ntau dua sab nqaij tawv. Thaum sab ntsujplig tau kho zoo lawd, peb yeej ua neej kaj siab thiab txaus siab rau lub neej tiam no, txog hnub kawg mus nrog Vajtswv nyob, yuav tsis muaj mob muaj nkeeg, vim twb tau Nws kho zoo huv tibsi lawm.
Thov Vajtswv,
Vajtswv, thov pab kom nyuam yaus paub hais tias, kev kho zoo mob sab ntsujplig tseemceeb dua kho zoo mob ntawm sab nqaij tawv, kom nyuam yaus ua neej ntseeg ruaj thiab ua neej haum Koj siab hauv txhua lub sijhawm txawm yuav tau zoo lossis txomnyem. Nyuam yaus tuav Tswv Yexus Khetos lub npe thov, Amees.
Ib tsoom mloog uas hmov tshua
Peb puas xam pom hais tias tau kev zam txim tseemceeb dua kev kho zoo sab nqaij tawv?
Nyeem Vajluskub hauv peb lub xyoos: 1 Xwmtxheej Vajntxwv 22
Kênh Youtube BHKTHN:
