II Xwmtxheej Vajntxwv 32:1-3
Nqe cim:
“Tsis yog li ntawd xwb, peb zoo siab qhov uas peb raug kev txomnyem ntawd ua rau peb ua taus siab ntev, qhov uas peb ua taus siab ntev haum Vajtswv siab, thiab qhov uas peb ua haum Vajtswv siab ua rau peb muaj kev cia siab.” (Loos 5:3-4)
Lus nug rau sawvdaws xav:
– Tom qab uas Vajntxwv Hexekiyas ua tiav txhua yam haujlwm zoo, ces muaj dabtsi tshwm sim?
– Vim licas Vajtswv ho cia kev nyuaj siab tshwm tuaj?
– Kev sim siab pab tau dabtsi rau peb?
Tom qab uas Vajntxwv Hexekiyas tau ua ntau yam haujlwm ncaj ncees raws li sau cia hauv II Xwmtxheej Vajntxwv txij tshooj 29 mus txog tshooj 31, ces nyob rau xyoo tim kaum plaub ntawm nws lub sijhawm ua vajntxwv (saib II Vajntxwv 18:13), kwv yees li xyoo 701 ua ntej yug Yexus, tus Vajntxwv kav tebchaws Axilias uas hu ua Xenakhelis tau txhij tubrog tuaj tua lub tebchaws Yudas tej nroog uas muaj ntsa yeej thaiv khov kho thiab xav txeeb lub nroog Yeluxalees.
Yog peb nyob hauv Vajntxwv Hexekiyas lub tsamthawj raug luag tuaj tua ntawd, tej zaum yuav muaj coob tug hnov poob siab. Raws li phau Xwmtxheej Vajntxwv sau cia, Vajntxwv Hexekiyas twb tas siab txhim tsa kev pehawm thiab kev ua haujlwm rau Vajtswv hauv lub Tuamtsev, nrhiav Vajtswv los ntawm kev mloog thiab coj raws li Nws Txoj kevcai (II Xwmtxheej Vajntxwv 31:20-21), tiamsis lub tebchaws Yudas tseem ntsib kev nyuaj siab loj npaum ntawd. Txawm hais tias hauv Vajluskub Qub thiab hauv phau Xwmtxheej Vajntxwv yeej hais tias leejtwg mloog Vajtswv lus mas yuav tau txais koob hmoov thiab kev thajyeeb nyab xeeb, tiamsis qhov ntawd tsis tau txhais hais tias cov uas ua raws li Vajtswv Txojlus yuav tsis ntsib kev sim siab lossis kev txomnyem. Yauj kuj yog ib tug neeg “hwm thiab muab siab npuab Vajtswv. Nws yog neeg zoo thiab tsis ua kev phem kev qias” (Yauj 1:1), los nws tseem ntsib kev txomnyem. Txawm yuav tsis nkag siab tias vim li cas nws raug kev txom nyem, los nws yeej tseem hais tias: “Vajtswv yuav muab kuv tua povtseg los xij peem. Kuv yeej yuav mus nrog nws hais kuv zaj xwb” (Yauj 13:15). Vajntxwv Hexekiyas kuj zoo ib yam nkaus li ntawd, txawm nws twb nrhiav Vajtswv kawg siab kawg ntsws los nws tseem ntsib kev nyuaj siab loj. Tiamsis qhov kev sim siab ntawd ua rau nws cia siab rau Vajtswv heev ntxiv, los ntawm qhov ntawd nws thiaj txhawb cov pejxeem lub zog hais tias: “Nej cia li ua siab tawv qhawv thiab tsis txhob ntshai tus vajntxwv uas kav lub tebchaws Axilias thiab nws cov tubrog” (II Xwmtxheej Vajntxwv 32:7).
Kev nrog tus Tswv mus tsis yog kev ua neej uas tsis muaj kev sim siab, tiamsis yuav tsum muaj kev sim siab los sim peb txojkev ntseeg kom loj hlob ntxiv. Vajtswv yeej tsis tau coglus tias yuav tsis pub peb ntsib kev sim siab, tiamsis Nws coglus hais tias Nws yuav nrog peb nyob hauv txhua yam kev sim siab ntawd. Muaj ntau zaug peb nrhiav Vajtswv kawg siab kawg ntsws, nquag mus pehawm, thov Vajtswv thiab nyeem Vajluskub txhua hnub, mob siab ua Vajtswv haujlwm,… tsimnyog peb tau lub neej kaj siab tiamsis ho raug tej kev nyuaj siab loj. Tej zaum yuav yog kev khwv rau nyiaj txiag, kev poob haujlwm, lossis kev mob nkeeg ntawm tus kheej lossis hauv tsev neeg,…
Timthawj Paulus qhia hais tias: “Tsis yog li ntawd xwb, peb zoo siab qhov uas peb raug kev txomnyem ntawd ua rau peb ua taus siab ntev, qhov uas peb ua taus siab ntev haum Vajtswv siab, thiab qhov uas peb ua haum Vajtswv siab ua rau peb muaj kev cia siab” (Loos 5:3-4). Thaum ntsib kev sim siab, thov Vajtswv pab kom peb tsis txhob ua xyemxyav rau Nws txojkev hlub, tiamsis yuav tsum ua raws tus Tswv lub siab nyiam thiab ntseeg tias Nws muaj ib txoj kev npaj zoo los txhim kho peb txojkev ntseeg kom peb loj hlob ntxiv hauv Nws.
Thov Vajtswv,
Vajtswv, thov koj zam txim rau nyuam yaus tej kev txhaum. Thov pub nyuam yaus muaj lub siab txais yuav txhua yam kev sim siab, kev txomnyem, thiab niaj hnub cia siab rau Koj hauv txhua lub tsamthawj, vim nyuam yaus ntseeg tias Koj yeej ib txwm pub qhov zoo tshaj plaws rau nyuam yaus. Nyuam yaus tuav Yexus Khetos lub npe thov, Amees.
Peb puas txais yuav tej kev sim siab txomnyem thiab niaj hnub cia siab khov kho rau tus Tswv lawm?
Nyeem Vajluskub hauv peb lub xyoos: I Xwmtxheej Vajntxwv 5-6
Kênh Youtube BHKTHN:
https://www.youtube.com/c/bhkthn
