Mathais 20:24-28
Nqe cim:
“Ib yam li Neeg Leej Tub, nws los nws tsis tau kom leejtwg tu nws, tiamsis nws los tu sawvdaws thiab muab nws txojsia los txhiv ntau leej.” (Mathais 20:28)
Lus nug rau sawvdaws xav:
- Lwm tus thwjtim ua licas thaum hnov Yauhas thiab Yakaunpaus tej lus thov?
- Tswv Yexus qhia cov Timthawj zaj kawm licas?
- Peb tabtom ua haujlwm los ntawm nplooj siab zoo licas?
Tomqab uas hnov Timthawj Yauhas thiab Yakaunpaus thov Tswv Yexus pub rau nkawd nyob ntawm sab xis thiab sab laug, kaum tus thwjtim tau chim rau nkawd ob kwvtij. Lawv chim vim lawv kuj xav tau lub meejmom ntawd tiamsis lawv tsis tau thov xwb. Thaum ntawd, Tswv Yexus thiaj qhia rau cov thwjtim zajkawm hais txog tus cwjpwm ntawm tus thawjcoj nyob hauv Vajtswv Tebchaws uas yog yuav tsum ua haujlwm rau lwm tus los ntawm tus cwjpwm txawv tej thawjcoj hauv ntiajteb. Cov thawjcoj hauv ntiajteb siv hwjchim los tswjkav, quabyuam kom lwm tus ua raws li lawv lub siab xav qia dub, tiamsis tus thawjcoj hauv Vajtswv Lub Tebchaws tsis ua li ntawd. Tswv Yexus qhia hais tias: “Yog nej cov leejtwg xav ua tus hlob, tus ntawd yuav tsum ua nej tus tubtxib; thiab yog nej cov leejtwg xav ua tus thawj, tus ntawd yuav tsum ua nej tus qhev” (nqe 26-27).
“Tub txib” lossis “qhev” yog hom neeg poob qis tshajplaws nyob tiam ntawd, vim tus qhev yuav tsum ua raws li tus tswv lub siab nyiam, txhua yam uas nws ua yuav tsum muaj nqis rau tus tswv. Nws yog tus uas tsis xav txog tus kheej kev ntshaw lawm, thiab nws yog tus ua haujlwm tiag tiag, tsis yog lam hais ntawm ncauj tias yus yog “tub txib” tiamsis ho ua neej coj tus cwjpwm zoo li tus tswv, xav kom luag saib taus thiab pab nws xwb. Tswv Yexus tsis yog tsuas qhia xwb, tiamsis Nws kuj ua qauv zoo rau peb, Nws hais tias: “Ib yam li Neeg Leej Tub, nws los nws tsis tau kom leejtwg tu nws, tiamsis nws los tu sawvdaws thiab muab nws txojsia los txhiv ntau leej” (nqe 28).
Tswv Yexus xav kom Nws cov menyuam thaum ua haujlwm hauv Pawg Ntseeg tsis txhob nrhiav kev ua tus loj lossis ua yam muaj nqis rau tus kheej xwb. Tus Tswv xav kom peb ua haujlwm sib pab zoo li ib tug qhev tseeb, yim paub tus Tswv yim txo hwjchim ua haujlwm pab lwm tus. Kev loj hlob thiab koob meej sab ntsujplig tsis yog nyob ntawm lub meejmom tiamsis nyob ntawm tes haujlwm sib pab thiab ua txhua yam zoo rau lwm tus, thiab nyob ntawm kev txaus siab raug poob kom pab tau txhua tus. Tswv Yexus los rau lub ntiajteb no tsis yog los kom tau zoo, tiamsis Nws los pab thiab muab Nws tus kheej los txhiv tibneeg dim lub txim. Yog ib tug ntseeg tseeb, peb yuav tsum saib Pawg Ntseeg ua qhov chaw rau peb siv sijhawm, txoj koob hmoov, nyiaj txiag los pab kom tau coob tug. Peb txhua tus puavleej tau tus Tswv muab cob ib teg haujlwm coj ib pab neeg txawm yuav coob thiab tsawg, tsis txhob ua “zoo li tej neeg ntiajteb ua” tiamsis cia li ua ib tug thawjcoj ntawm nplooj siab zoo li tus qhev ib yam li Tswv Yexus.
Thov Vajtswv,
Tus Tswv, ua koj tsaug uas koj tau muab Koj txojsia los txhiv nyuam yaus. Thov pab kom nyuam yaus ua haujlwm zoo li ib tug qhev raws Koj tus qauv. Thov siv nyuam yaus lubneej ua muaj nqis rau lwm tus raws li Koj lub siab nyiam. Nyuam yaus tuav Yexus Khetos lub npe thov, Amees.
Koj puas tabtom ua haujlwm los ntawm nplooj siab zoo li tus qhev tiag tiag lawm tau?
Nyeem Vajluskub hauv peb lub xyoos: Yaxayas 56
Kênh Youtube BHKTHN:
