Klei Aê Diê Blŭ: Y-Mathiơ 20:24-28
Êlan kliăng: “Msĕ si Anak Mnuih hriê leh amâo djŏ čiăng kơ arăng mă bruă kơ ñu ôh, ƀiădah čiăng mă bruă kơ arăng, leh anăn jao klei hdĭp ñu pô jing ênoh bi tui kơ lu mnuih.” (Y-Mathiơ 20:28)
Klei êmuh ksiêm mĭn: Si phung ƀĭng kna adôk wĭt ngă tơdah leh hmư̆ klei Y-Yôhan leh anăn Y-Yakơ akâo? Ya klei Khua Yang Yêsu mtô leh phung khua ƀĭng kna? Hŏng Si ai tiê klei mĭn drei dôk mă bruă?
Leh hmư̆ ƀĭng kna Y-Yôhan leh anăn Y-Yakơ akâo kơ Khua Yang Yêsu kơ anôk dôk nah hnuă leh anăn nah điâo, pluh čô ƀĭng kna adôk ăl kơ dua čô ayŏng adei anei. Diñu ngêñ kyua diñu ăt mâo klei tluh kơ klei dưi snăn mơh ƀiădah ka hmao lač ôh. Ƀri mmông anăn, Khua Yang Yêsu mtô phung ƀĭng kna klei hriăm kơ knuih phung khua kiă kriê hlăm Ƀuôn Ala Mtao Adiê jing brei mă bruă hŏng ai tiê klei mĭn mdê hŏng klei mĭn kiă kriê aguah tlam. Phung khua kiă kriê hlăm lăn ala yua klei dưi čiăng kiă kriê, mgô̆ pô mkăn mă bruă kơ klei čiăng hjăn pô, ƀiădah phung khua kiă kriê hlăm Ƀuôn Ala Mtao Adiê snăn mklăk wĭt kluôm dhuôm. “Hlei pô čiăng jing prŏng hlăm phung diih, brei ñu jing dĭng buăl diih, leh anăn hlei pô čiăng jing mrô sa hlăm phung diih, brei ñu jing hlŭn diih” (êlan 26-27).
Dĭng buăl amâodah hlŭn jing phung hlŭn, gưl mnuih ti gŭ hĭn hlăm ala ƀuôn hlăk anăn, kyua phung hlŭn jưh knang kluôm dhuôm kơ khua pô, djăp mta bruă diñu ngă jing čiăng ba klei tŭ dưn kơ khua. Anei jing phung amâo lŏ bi mĭn ôh kơ klei tŭ dưn kơ pô, leh anăn jing mnuih mă bruă klă sĭt jing amâo djŏ ôh knŏng lač pô jing “dĭng buăl” ƀiădah lĕ hdĭp hlăm ai tiê klei mĭn “huă ti dlông dôk ti anăp”, čiăng mâo arăng duh brei leh anăn mpŭ. Khua Yang Yêsu amâo djŏ knŏng mtô ôh ƀiădah Ñu pô brei klei bi hmô “Msĕ si Anak Mnuih hriê leh amâo djŏ čiăng kơ arăng mă bruă kơ ñu ôh, ƀiădah čiăng mă bruă kơ arăng, leh anăn jao klei hdĭp ñu pô jing ênoh bi tui kơ lu mnuih” (êlan 28).
Khua Yang Yêsu čiăng kơ phung anak Ñu sĭt tơdah mă bruă hlăm Phung Sang Aê Diê amâo tui duah ôh klei dưi čiăng kiă kriê amâodah duah klei tŭ dưn kơ hjăn pô. Khua Yang čiăng kơ drei bi mă bruă hdơ̆ng pô hlăm ai tiê klei mĭn jing dĭng buăl klă sĭt, ƀrư̆ thâo kral Khua Yang ƀrư̆ luă gŭ mă bruă kơ pô mkăn lu hĭn. Klei hriê kơ prŏng leh anăn klei kjăp hlăm mngăt amâo dưi mkă hŏng bruă klam ôh ƀiădah hŏng klei mă bruă leh anăn ai tiê duh myơr kyua klei tŭ dưn kơ pô mkăn, ăt msĕ si ai tiê srăng săn asei čiăng đru kơ grăp čô mnuih. Khua Yang Yêsu hriê leh ti lăn ala amâo djŏ čiăng mâo arăng mă bruă kơ pô ôh ƀiădah Ñu hriê čiăng mă bruă leh anăn myơr Ñu Pô čiăng bi tui anak mnuih mơ̆ng klei soh. Jing phung anak Khua Yang sĭt, drei dlăng êpul êya phung đăo jing anôk drei duh myơr hruê mmông, klei thâo, prăk mah čiăng ba klei tŭ dưn kơ lu mnuih. Grăp čô drei mâo Khua Yang dưm hlăm sa bruă klam kiă kriê hlăm sa êpul êya prŏng amâodah điêt “đăm ngă tui si lăn ala anei ôh” ƀiădah brei jing sa čô kiă kriê hlăm ai tiê klei mĭn jing dĭng buăl msĕ si Khua Yang bi hmô leh.
Drei dôk mă bruă hŏng ai tiê klei mĭn jing dĭng buăl sĭt mơ̆?
Wah lač: Ơ Khua Yang, bi mni kơ Ih jao leh klei hdĭp Ih čiăng bi tui kâo, akâo kơ Ih đru kâo hdĭp mă bruă hlăm ai tiê klei mĭn jing dĭng buăl msĕ si Ih bi hmô leh. Akâo kơ Khua Yang mơak yua klei hdĭp kâo čiăng ba klei tŭ dưn kơ lu mnuih mkăn hlue si klei Ih čiăng. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsai 56
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
