Luka 11:5-13
“Klaih kơ noh Yêsu pơma pơtih gia kơ lu sư thoi âu wă kơ lu sư băt kơ krao khan ling lang huay kơ hăl” (Luka 18:1)
Nơ̆r jet tơchĕng pơwao:
– Jơhngơ̆m thoi yơ đei Kră Yang Yêsu pơma kơplah krao khan?
– Yua kơ kiơ kăl kơ đei jơhngơ̆m thoi ‘nâu?
– Lu bơ̆n kăl kơ tơplih tơdrong kiơ lăm tơdrong krao khan?
Jơhngơ̆m pran đei roi lăm tơdrong pơtih gia ‘nâu athei adrin. Lu nơ̆r đei pơma lăm trong 9-10 thoi lĕ apinh, chơ chă, dơdŭ pơma kơ dang ei, pơma ‘bơm truh tơ ling lang. Thoi noh, krao khan ưh kơ sĭ tơ’bôh tơdrong lui mơlôh mơlônh đĕch ôh, dah trong wă tơgŭm lăm tơdrong anat đĕch ôh, mălei athei tơ’bôh lăm tơdrong tơpăt tơpă, đĭ jơhngơ̆m, hăm jơhngơ̆m adrin.
‘Bok George Muller, bơngai pơjing tơdrong jang wei rong lu kon mơti tơ dêh Engle lăm sơnăm 19, jơ̆ minh ‘nu bơngai adrin krao khan, sư pơtơm krao khan ‘nâu ding truh tơ loi 60 sơnăm. Tuch luch sư đei minh lăm ‘bar ‘nu buăl sư noh lui sơng iŏk Kră Yang adrol kơ ‘bok George Mulller lôch, păng buăl mă ‘bar noh lui kơ Kră Yang đơ̆ng rŏng kơ ‘bok George Muller lôch kơplah minh sơnăm.
Minh tơdrong đe juăt kơ jet hăm trŏ kơ adrin krao khan kơ minh tơdrong kăl pơma kơ đon lui bơ̆n kơ Kră Yang oei rơdu dêh? Yua kơ kiơ Yêsu wă kơ bơ̆n adrin krao khan? Lu bơ̆n athei ‘blŏk tơdrong adrin krao khan ưh kơ trŏ wă kơ Kră Yang kơtơ̆ng đĕch ôh, mălei wă kơ lu bơ̆n tơ’bôh đon lui bơ̆n lăm ‘Bok Kei-Dei. Adrin krao khan kư̆m tơgŭm bơ̆n oei adrin lăm Kră Yang, ưh kơ tơplih, ưh kơ hiơt dah mă wă chă trong nai pha ‘biơ̆, păng adrin krao khan wă tơ’bôh tơdrong bơ̆n krao khan tơpăt tơpă.
Tơdrong pơtrơp dơ̆ng đei jet adrin truh dang yơ? ‘nâu bơih nơ̆r anat kơ tơl, păng nơ̆r tơl trŏ kiơ̆ kơ tơdrong sư mơ̆n: Hơdrol hloh lu bơ̆n athei adrin krao khan kơ tơdrong kiơ bơ̆n băt sĭt tơpă kiơ̆ thoi ‘Bok Kei-Dei wă, krao khan tơgŭm kơ lu bơngai wă hiong gah bơhngol wă lei lu sư gơh klaih, akâu jăn kơdih wă ‘lơ̆ng rơgoh, wă kơ wơ̆ ‘lŏ păng pôm jơhngơ̆m lăm bơngai lui, kơ chăl arih gah bơhngol lăm hnam dơnŏ… mă khan lei ră, phŏ kư̆m đei tơdrong Kră Yang kư̆m lăp đon mălei lu bơ̆n ưh kơ băt hơđăl Kră Yang hăm ăn kơ bơ̆n ưh, pơtih gia thoi ‘bok George Muller. Adrin krao khan kơ bơngai nai lui sơng iŏk Kră Yang noh trŏ bơih, mă khan lei ră pơm thoi yơ băt hơđăl tơdrong dŏng pơklaih gơh đei kơ ‘bar ‘nu buăl sư noh? Tơdrong ‘nâu gô kơtơ̆ng đơ̆ng Yang Bơhngol ‘Lơ̆ng tơ’bôh ăn.
Hloh kơ noh dơ̆ng, bơngai krao khan athei đei đon lui kơ ‘Bok Kei-Dei, lu bơ̆n athei lui ngeh ‘Bok Kei-Dei jơ̆ Yang băt tôm tơdrong kiơ ‘lơ̆ng hloh kơ lu bơ̆n (trong 11-13). Păng tơdrong ‘lơ̆ng hloh mă ‘Bok Kei-Dei ăn kơ lu bơ̆n noh Yang Bơhngol ‘Lơ̆ng, jơ̆ Yang krao khan tơgŭm bơ̆n, jơ̆ Yang tơgŭm bơ̆n hlôh trŏ thoi ‘Bok Kei-Dei wă (Rôm 8:26-27).
Ơ Kră Yang, apinh Ih tơgŭm inh lui gơnang kơ Ih đĭ jơhngơ̆m đĭ chăl arih inh rim năr, chơ chă kiơ̆ thoi Ih lăp đon păng chu kơ Ih. Krao khan yua anăn Kră Yang Yêsu Krist, Amen.
Hăm đei tơdrong pơgăn kiơ pơm kơ bơ̆n ưh kơ wă adrin krao khan?
Đŏk Sơ̆p Hla bơar ‘Bok Kei-Dei lăm pêng sơnăm: Êsai 33
Kênh Youtube BHKTHN:
